Ձեր վստահելի աղբյուրը

Այսօր Ազատության հրապարակում Րաֆֆի Հովհաննիսյանի հերթական ելույթը նախորդներից տարբերվում էր նրանով, որ Ժառանգության առաջնորդը պահանջեց Սերժ Սարգսյանին ինքնաբացարկ հայտնել ու տեղեկացրեց, որ մինչև Սուրբ Զատիկ, մինչև մարտի 31-ը, հայտարարում է հացադուլ ու մնալու է Ազատության հրապարակում:

Նշենք, որ մինչ այդ հայտարարվել էր, որ վճռական հանրահավաք է լինելու, որտեղ հայտարարվելու է գործուն քայլերի մասին: Մինչ իր ելույթի բուն մտքին անցնելը, Հովհաննիսյանը տեղեկացրեց, որ մարտի 15-ին նույն վայրում տեղի է ունենալու հաջորդ հանրահավաքը, որտեղ խոսելու է «դուխով»: 

«Հերոս Լեոնիդ Ազգալդյանը ասել է. «Սա հայրենիք է և վերջ», բայց նա հայրենիքի ապագայի համար է ասել, ուրեմն պետք չէ հղում կատարել նրա անկեղծ կոչին՝ հետապնդելով նեղ կուսակցական շահեր»: Ես փորձեցի լուծում գտնել, իմ ոտքով գնացի Բաղրամյան 26, որտեղ ասացի՝ նշանակեք նոր ընտրություններ, եթե չեք վախենում, բայց ամեն ինչի պատասխանը «ոչ» էր: Առաջարկեցի լուծման հնարավորություններ, բայց մերժվեցին բոլորը, որից հետո ես այլևս ասելիք չունեմ: Այսուհետ ես Բաղրամյան 26-ում էլ չեմ լինի: Եթե ինքը ասելիք ունի, նրան հարգանքով կլսեմ, բայց Ազատության հրապարակում, ուրիշ ոչ մի տեղ: Նոր Հայաստանի ծնունդը երկունքի մեջ է, նշանակում է, որ երկունքը ուղեկցվելու է ցավով, սադրանքով, կրիմինալով: Սիրելի ժողովուրդ, մենք գնալու ենք դեպի մեր հաղթանակը, խաղաղ ձևով ու Սահմանադրությամբ, օրենքով, բայց եթե որևէ մեկը համարձակվի ձեռք բարձրացնել ժողովրդի վրա, պատասխան է տալու ժողովրդի դատարանի առջև», - իր ելույթում մասնավորապես նշեց Հովհաննիսյանը:

Ինչ վերաբերում է գործուն քայլերին, ապա նա ասաց, որ հայտարարում է հացադուլ և մինչև մարտի 31-ը, կմնա Ազատության հրապարակում ու պահանջում, որ մինչև ապրիլի 9-ը Սերժ Սարգսյանը ինքնաբացարկ ներկայացնի: Իսկ եթե այնուամենայնիվ, Սերժ Սարգսյանը, Հովհաննիսյանի խոսքով, երդվի Աստվածաշնչի ու Սահմանադրության վրա, ապա նա դա կանի իր դիակի վրայով:

«Եթե ապրիլի 9-ին պարոն Սարգսյանը կեղծ երդում տա մեր Սահմանադրության և Սուրբ Աստվածաշնչի վրա, եթե Վեհափառ Հայրապետը պղծի Աստվածաշունչը օրհնելով ժողովրդին խեղող, ծախող թեկնածուին, դա իրենք կանեն իմ դիակի վրա», հայտարարեց Հովհաննիսյանը:

Հովհաննիսյանը ժողովրդին վստահեցրեց, որ ապրիլի 9-ին իրենք տոնելու են նոր Հայաստանի երդմնակալությունը: Իսկ ինչ վերաբերում է հաջորդ հանարահավաքին, որը կկայանա մարտի 15-ին, Հովհաննիսյանն ասաց. «Այդ օրը մենք կքննարկենք մեր ապագա անելիքները՝ Երևանի քաղաքապետի ընտրությունները, Սահմանդրական դատարանի վճիռը, կքննարկենք մեր գործողությունները»:

Նախորդող հրապարակումներ. Գործող նախագահը կանգնած է Ձեր դիմաց. Տիգրան Խզմալյան

Սահմանադրական դատարանի մոտ պահանջելու ենք վավերացնել նորընտիր նախագահ Րաֆֆի Հովհաննիսյանի հաղթանակը. Խուրշուդյան

Հաջորդ հանրահավաքին ավելի դուխով կխոսեմ. Րաֆֆի Հովհաննիսյան

Եկեք, եկեք. Հովհաննիսյանը հրապարակ է հրավիրում բոլորին անկախ կուսակցական պատկանելությունից

Մինչև մարտի 31-ը Րաֆֆին Ազատության հրապարակում «հացադուլ, վախադուլ, ստադուլ» է հայտարարում