Ձեր վստահելի աղբյուրը

«Այն մարդիկ, ովքեր իրենց քվեն տվել են Րաֆֆի Հովհաննիսյանի օգտին 500 հազարից հաստատ ավելին են: Կա զանգվածի մի քանակ, որը որևէ իշխանություն, որևէ դիկտատոր չի կարող ուղղակի անտեսել»,- այս մասին Ազատության հրապարակում լրագրողների հետ ճեպազրույցում ասաց «Հանրապետություն» կուսակցության նախագահ Արամ Սարգսյանը:
Անդրադառնալով ազգային ընդհանուր ճակատ ստեղծելու գաղափարին` նա նշեց, որ յուրաքանչյուր քաղաքական ուժ ինչ-որ բանով պետք է օժանդակի ու պատասխանատվություն վերցնի իր վրա: Հիշեց անձնական փորձը.

«Հոկտեմբերի 27-ից հետո, երբ ես դարձա վարչապետ, ազգային համաձայնության կառավարություն ձևավորեցի` և ԱԺՄ-ին տեղ տվեցի, և կոմունիստներին, որովհետև տեսնում էի, որ երկրում, որտեղ այդ կարգի դաժան իրողություն է տեղի ունեցել, հասարակության վստահությունը մեծացնելու համար յուրաքանչյուր քաղաքական ուժ ինչ-որ բանով պետք է օժանդակի և ինչ այդ ուժին հոգեհարազատ է ` պատասխանատվությունն այդ մասով իր վրա վերցնի»,- նշեց նա:

Այն հարցին, թե ինչպե՞ս է պատկերացնում այլընտրանքային խորհրդարանի, կառավարության ապագա գործունեությունը, որի պահանջը առաջ է քաշվում, Ա.Սարգսյանը նշեց, որ այնքան էլ այդ գաղափարի կողմնակից չէ.

«Ես տեսել եմ, որ իմ եղբայրը` Վազգենը` նման ազդեցություն ունեցող, նման ճանապարհ անցած մարդ, իր կառավարությունը ձևավորելուց հենց իր թիմում բազմաթիվ ծանր ու դժվարին խնդիրների առաջ կանգնեց այն դեպքում, երբ նա արդեն իշխանություն էր: Ընդդիմության պարագայում պետության մեջ պետություն ձևավորելը մի փոքր վերացական գաղափար է: Եվ թող ինձ ներեն այն մարդիկ, ովքեր այդ գաղափարի կողմնակիցներն են, բայց մեր պարագայում այն անիրականանալի եմ համարում»,- հավելեց նա:
Panorama.am-ի թղթակիցը հաղորդում է, որ այս պահին Ազատության հրապարակում են գտնվում ՀՅԴ-ական Լիլիթ Գալստյանը, Ժիրայր Սեֆիլյանը, «Ժառանգության» ներկայացուցիչ Անահիտ Բախշյանը և այլք: Հացադուլ հայտարարած Րաֆֆի Հովհաննիսյանն էլ մի շիշ ջուր ձեռքին վերադառնում է հացադուլի իր տեղը: