Ձեր վստահելի աղբյուրը

Հայ Ազգային կոնգրես խմբակցությունը քննարկում է ԱԺ Էթիկայի հանձնաժողովից իր ներկայացուցիչ Լյուդմիլա Սարգսյանին հետ կանչելու մասին հարցը: ՀԱԿ խմբակցության քարտուղար Արամ Մանուկյանն այդ որոշումը բացատրեց նրանով, որ ԱԺ Էթիկայի հանձնաժողովի վերջին փոփոխություններով քաղաքացիական վերահսկողության կորուստ տեղի ունեցավ:

«Եթե կար մի մարմին, որտեղ քաղաքացին կարող էր դիմում գրել, բողոք ներկայացնել պատգամավորների էթիկայի հետ կապված դեպքերի մասին, կարող էր լինել վերահսկողություն, ապա այդ մարմինն այսօր չկա», -հավելեց Արամ Մանուկյանը:

Այդպիսի մտադրություն ունի նաև ԱԺ Հ. Յ. Դաշնակցություն խմբակցությունը, ինչի մասին հաստատեց նաև խմբակցության անդամ Արծվիկ Մինասյանը, սակայն քննարկման արդյունքներից մանրամասներ չփոխանցեց:

ԱԺ Էթիկայի հանձնաժողովում «Ժառանգություն» խմբակցությունը ներկայացնող Թևան Պողոսյանը Panorama.am-ի թղթակցի հետ զրույցում ասաց, որ իրենց խմբակցությունում Էթիկայի հանձնաժողովի աշխատանքները բոյկոտելու մասին քննարկում չի կայացել: «Եթե դա լինի համատեղ որոշում բոլոր ընդդիմադիր խմբակցությունների ներսում, ինձ թվում է կարելի է այդ քայլին գնալ: Բայց ընդհանրապես, նիստերին չմասնակցելու գաղափարը այնքան էլ ճիշտ չէ, քանի որ, այնուամենայնիվ, այդ հանձնաժողովը թույլ է տալիս քննել այնպիսի հարցեր, այնպիսի խախտումներ, որոնք տեղի են ունենում ու հանձնաժողովում լուծումներ ստանում», -հավելեց Պողոսյանը:

«Ժառանգություն» խմբակցության անդամի խոսքով, հնարավոր է հանձնաժողովի աշխատանքները սկզբում թույլ լինեն, բայց ամեն ինչ առջևում է: «Երկար ճանապարհը սկսվում է առաջին քայլից, և ես ուրախ եմ, որ ունենք այնպիսի դեպքեր, որտեղ քննվել են Սամվել Ալեքսանյանի, Մհեր Սեդրակյանի հարցը: Կա մեծ խնդիր էթիկայի հանդեպ, որը ինձ թվում է կբերի պատգամավորների շրջանում իրենց դիրքի, դերի պահվածքի ավելի բարձր գիտակցման: Էթիկայի հանձնաժողովը, միգուցե ոչ հարյուր տոկոսանոց, բայց փորձում է իր գործը կատարել», -լրացրեց Պողոսյանը: Այնուամենայնիվ, «Ժառանգության» ներկայացուցիչը կարծում է, որ եթե ընդդիմադիր խմբակցությունների միջև Էթիկայի հանձնաժողովի աշխատանքները բոյկոտելու պայմանավորվածություն կայանա, ապա դա որոշ իմաստ կունենա: «Իսկ եթե առանձին դուրս գալու խնդիր լինի, ապա ինձ թվում է ադեկվատ չի լինի», -հավելեց ընդդիմադիր խորհրդարանականը:

Էթիկայի հանձնաժողովի աշխատանքները բոյկոտելուն դեմ չէ նաև «Բարգավաճ Հայաստան» խմբակցությունը: «Եթե Էթիկայի հանձնաժողովը փորձ արվի վերածել քաղաքական մահակի, քաղաքական գործիքի, ապա «Բարգավաճ Հայաստան»-ը կքննարկի այդ հանձնաժողովում ներկայացուցիչ ունենալու նպատակահարմարության հարցը», -Panorama.am-ի թղթակցի հետ զրույցում տեղեկացրեց Նաիրա Զոհրաբյանը` միևնույն ժամանակ նշելով, որ մինչ այս պահը նման հարց չի քննարկվել իրենց խմբակցությունում: 

Դիտարկմանը, թե այնուամենայնիվ ԲՀԿ-ն չի բացառում Էթիկայի հանձնաժողովի աշխատանքները բոյկոտելը, տիկին Զոհրաբյանն ասաց, որ եթե հանձնաժողովը շարունակի նման աշխատաոճը, ապա խմբակցությունը կքննարկի այդ հարցը: «Եթե փորձ արվի Էթիկայի հանձնաժողովին օժտել գերլիազորություններով, ինչի փորձը այս պահին արվում է անհեթեթագույն նախագծերով ու փոփոխություններով, ապա մենք կքննարկենք այդ հարցը», -հավելեց «Բարգավաճ Հայաստան» խմբակցության քարտուղարը:

Էթիկայի հանձնաժողովի անդամներն են Հանրապետական խմբակցության անդամ Դավիթ Հարությունյանը (Հանձնաժողովի նախագահ), ՀԱԿ-ից Լյուդմիլա Սարգսյանը, ՀՀԿ-ից Կորյուն Նահապետյանը, ԲՀԿ-ից Վահան Բաբայանը, ՕԵԿ-ից Հովհաննես Մարգարյանը, ՀՅԴ-ից Վահան Հովհաննեսյանը և Ժառանգությունից Թևան Պողոսյանը:

«ԱԺ կանոնակարգ-օրենքի» համաձայն, ԱԺ Էթիկայի հանձնաժողովը կազմավորվում է Ազգային ժողովի առաջին նստաշրջանում, ինչպես նաև յուրաքանչյուր հերթական նստաշրջանի առաջին չորսօրյա նիստում` խմբակցությունների ներկայացմամբ: Էթիկայի հանձնաժողովի կազմը հաստատում է, ինչպես նաև նախագահին և նրա տեղակալին նշանակում է ԱԺ նախագահը:

Էթիկայի հանձնաժողովի նախագահի պաշտոնը հաջորդաբար զբաղեցնելու իրավունքը պատկանում է ամենաշատ ընդդիմադիր և ոչ ընդդիմադիր խմբակցություններին, այս դեպքում` «Հայ ազգային կոնգրես» և Հանրապետական խմբակցություններին:
Նախորդ տարի ամռանը ձևավորված Էթիկայի հանձնաժողովը նախ ղեկավարել է Հանրապետական խմբակցության անդամ Դավիթ Հարությունյանը, իսկ աշնանային նստաշրջանում` Նիկոլ Փաշինյանը: