ԿԸՀ-ն կարծում է, որ Հովհաննիսյանի դիմումը ենթակա է մերժման

Իրավունք 16:03 12/03/2013

ԿԸՀ-ն կարծում է, որ Հովհաննիսյանի դիմումը ենթակա է մերժման

Սահմանադրական դատարանում ընտրությունների արդյունքները վիճարկող «Ժառանգություն» կուսակցության առաջնորդ Րաֆֆի Հովհաննիսյանի դիմումի մեջ ներկայացված են հիմնազուրկ դատողություններ: Այդ մասին այսօր Սահմանադրական դատարանում թեկնածուներ Րաֆֆի Հովհաննիսյանի ու Անդրիաս Ղուկասյանի դիմումների քննության ժամանակ իր ելույթում հայտարարեց պատասխանող ԿԸՀ նախագահ Տիգրան Մուկուչյանը:

Նրա խոսքով, Հովհաննիսյանի դիմումի մեջ օրենքներին վկայակոչումներն արված են ընտրանքային եղանակով, իսկ ԵԱՀԿ/ԺՀՄԻԳ-ի զեկույցից էլ «ծաղկաքաղ» է արված:

Ներկայացնելով տվյալներ, Մուկուչյանն ասաց, որ ընդհանուր առմամբ ընտրությունների օրը գործող 1988 ընտրատեղամասերից միայն 1884-ում է «Ժառանգություն» կուսակցությունը վստահված անձինք ունեցել: Նա տեղեկացրեց, որ մինչև ընտրությունների արդյունքների հրապարակումը այդ կուսակցության ու Հովհաննիսյանի վստահված անձանց կողմից որևէ դիմում-բողոք չի ստացել:

ԿԸՀ քարտուղար Արմեն Սմբատյանը լրացնելով Տիգրան Մուկուչյանին իր ելույթում ասաց, որ ընտրական հանձնաժողովներն անկախ են և գործում են Հայաստանի սահմանադրությանը համապատասխան: «Դիմումում վկայակոչված նորմերը, կարծում ենք, պարզապես նպատակ ունեն ծավալ հաղորդել դրան: Ոչ մի տեղամասի արդյունքի վրա կասկած չի հարուցվել առանձին վերցված: ԿԸՀ-ն ու ԸԸՀ-ները գործել են Հայաստանի օրենսդրության համապատասխան և դիմումները ենթակա են մերժման», -հայտարարեց Սմբատյանը:

Նախագահի ընտրությունների արդյունքները անվավեր համարելու մասին նախագահի թեկնածուներ Րաֆֆի Հովհաննիսյանի և Անդրիաս Ղուկասյանի դիմումների քննությունը ՍԴ-ում այս պահին շարունակվում է: Այժմ ՍԴ անդամները պատասխանող կողմի ելույթից հետո հարցեր են ուղղում Տիգրան Մուկուչյանին:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: