Ձեր վստահելի աղբյուրը

«Տավուշի մարզի Գետահովիտ համայնքում ՓՀԷԿ–ի կառուցումով բնապահպանական լուրջ խնդիրների առաջ կկանգնենք»: Այս մասին այսօր լրագրողների հետ հանդիպման ժամանակ հայտարարեցին Համահայկական բնապահպանական ճակատի անդամները:

Աշխարհագրագետ Լևոն Գալստյանի խոսքերով՝ հերթական անգամ պարզ է դառնում, որ ՀՀ բնապահպանության նախարարությունը բնապահպանական խնդիրներին մատների արանքով է նայում, և ցանկացած նախագիծ, ցանկացած եղանակով պատրաստ են ընդունել՝ առանց հաշվի առնելու, թե դա ինչ բնապահպանական և սոցիալական վնասներ կարող է բերել մեր պետությանը:

Նշենք, որ վաղը՝ մարտի 15-ին բնապահպանության նախարարությունում տեղի կունենա Գետահովիտ համայնքում նախատեսվող «Խաչաղբյուր-2» ՓՀԷԿ-ի կառուցման վերաբերյալ հանրային լսումները:

Լ.Գալստյանը հայտնեց, որ «Խաչաղբյուր-2» ՓՀԷԿ-ի կառուցման նախագիծն արժանացել է Գետահովիտ համայնքի բնակիչների մերժմանը, սակայն նախարարությանն այդ ամենը չի հետաքրքրում և հանրային լսումներ է անցկացնում:
Ներկայացնելով նախագծի վերաբերյալ առկա խնդիրները: Լ.Գալստյանը նախ նշեց, որ ՀԷԿ կառուցելու վերաբերյալ նախագիծը ներկայացվել է նախորդ տարվա հունիսին: Նախագծի համաձայն՝ նախատեսվում է Իջևանի արգելավայրերի անտառապատ տարածքում կառուցել փոքր ՀԷԿ:

«Մեր ահազանգից հետո բնապահպանության նախարարությունից ասացին, որ դեռ նախագիծ է ներկայացված: Սակայն դրանից մի քանի օր հետո Տավուշի մարզի Ենոքավանի գյուղապետարանում կազմակերպվում է հասարակական լսումներ՝ «Խաչաղբյուր-2» ՓՀԷԿ-ի աշխատանքային նախագծի վերաբերյալ: Արդյունքում, այդ նախագիծը ստացավ դրական փորձաքննական եզրակացություն»,-ասաց Լ.Գալստյանը:

Նրա խոսքերով՝ ուսումնասիրելով «ԷՌԱ» ՍՊԸ-ի կողմից մշակված «Խաչաղբյուր-2» ՓՀԷԿ-ի աշխատանքային նախագիծն ու դրա բնապահպանական մասը, պարզել են ակնհայտ սխալ և իրարամերժ բազմաթիվ տվյալներ ու տեղեկություններ: Այդ աշխատանքային նախագիծը տրամադրվել է և՛ «Մեգաէներջի» ՍՊԸ-ին, և՛ «Բնապահպանական փորձաքննության» ՊՈԱԿ-ին: Հետաքրքիրն այն է, որ «Բնապահպանական փորձաքննության» ՊՈԱԿ-ի փորձագետները, առանց որևէ հիմնավորման, տեղազննման և արգելավայրերի սահմանները ճշտելու, «Մեգաէներջի» ՍՊԸ-ին տրամադրել են բնապահպանական փորձաքննության դրական եզրակացություն:

Բացի այդ, նախագծում նշված է, որ «Շինարարության ժամանակ ծառահատումների անհրաժեշտություն չկա, քանի որ խողովակաշարն անցնում է ավտոճանապարհին զուգահեռ»: «Սա նույնպես ակնհայտ սուտ տեղեկատվություն է, քանի որ հովիտի այն մասը, որտեղով անցնելու է խողովակաշարը անտառապատ է և դժվարանցանելի նույնիսկ մարդու համար, ոչ մի ավտոճանապարհ այնտեղ չկա ու չի եղել, իսկ 2,8 կմ երկարությամբ խողովակաշարը անցկացնելու համար ծանր տեխնիկայով ճանապարհ բացելու ընթացքում արդեն արմատախիլ են արվել մեծ թվով ծառեր, որոնց ականատես են եղել Գետահովիտի բնակիչներն ու բնապահպանները»,- ասաց Լ.Գալստյանը՝ հավելելով, որ այդ ամենը իրենք տեսանկարահանել են:

Բնապահպանի հայտնեց, որ այս ամբողջ աղմուկից հետո բնապահպանության նախարարությունը ստեղծել է աշխատանքային խումբ, որը չեղյալ է համարել իրենց կողմից տրված դրական եզրակացությունը: «Հարց է առաջանում՝ ինչպես պատահեց, որ դրական եզրակացություն ստացած նախագիծը 15-20 օր հետո չեղյալ է համարվում: Այդ ինչպես եղավ, որ ոչ մեկ չնկատեց, որ այդ տարածքում կա արգելավայր, կա անտառ: Այսինքն՝ ներկայացվել են չհիմնավորված, կեղծ տվյալներ: Սա ԺԵԿ-ի մակարդակով արված աշխատանք է»,- ասաց Լ.Գալստյանը:

Նա նաև հայտնեց, որ նախարարության աշխատանքային խումբը Գետահովիտ համայնքում կատարված խախատումների վերաբերյալ բնապահպանության նախարարին է ներկայացրել 5 առաջարկ, որոնցից ոչ մեկը մինչ օրս լուծում չի ստացել:
Այս ամենից ելնելով, բնապահպանները դիմել են ՀՀ գլխավոր դատախազին և ոստիկանապետին՝ հանցագործության մասին հայտարարությամբ հանդես գալով: Ըստ նրա, այս պահին գործը գտնվում է հետաքննության փուլում:

Սակայն այս ամենից հետո նախագծող ընկերությունը նոր նախագիծ է ներկայացրել, որի քննարկումն արդեն տեղի է ունեցել Գետահովիտ համայնքում: Նոր նախագծում արդեն նշվում է, որ տվյալ տարածքում կա արգելավայր, անհրաժեշտ է 141 ծառ հատել և այլն: Գյուղացիները դեմ են արտահայտվել նախագծին և դրանից հետո իրենք էլ իրենց հերթին դիմել են ՀՀ նախագահին և գլխավոր դատախազին:

«Սակայն այս ամենից հետո, նախարարությունը հանրության կարծիքը հաշվի չառնելով, որոշել է անցկացնել երկրորդ լսումները»,- նշեց Լ.Գալստյանը: Նա նաև հայտնեց, որ թե գյուղացիների, թե բնապահպանների վրա ճնշումներ են գործադրվում:
Բնապահպանների տվյալներով՝ ՓՀԷԿ-ը կառուցվում է ռուսաստաբնակ հայերի կողմից: