Ձեր վստահելի աղբյուրը

Ուկրաինայի Հանրապետությունում առաջին ատյանի դատարանի վճռով ցմահ դատապարտված ՀՀ քաղաքացի, խոշոր գործարար Մերաբ Ալոյանի (Սուսլովի) հարազատները, ընկերները Հայաստանի արտաքին գործերի նախարարության դեմ բողոքի ակցիա էին կազմակերպել` պահանջելով, որպեսզի Ուկրաինայում Հայաստանի դեսպանատան ներկայացուցիչները հետևեն Մեհրաբի դատավարությանը, այցելեն նրան:

Հարազատները պնդում են, որ ուկրաինական բանտում Մեհրաբը խոշտանգումների է ենթարկում, ապա մեջբերում. «Հայաստանի Հանրապետության Հյուպատոսական ծառայության մասին օրենքի 35-րդ հոդվածի համաձայն, օտարերկրյա պետությունում ՀՀ հյուպատոսական հիմնարկի ղեկավարը պարտավոր է հետևել, որպեսզի կալանավորված ՀՀ քաղաքացու նկատմամբ պահպանվեն նստավայր պետության օրենքները և Հայաստանի Հանրապետության և տվյալ պետության միջև կնքված պայմանագրերի դրույթները: Նույն օրենքի 36-րդ հոդվածի համաձայն, Հյուպատոսական հիմնարկի ղեկավարը պարտավոր է շահագրգիռ անձանց խնդրանքով կամ իր նախաձեռնությամբ այցելել կալանավայրերում Հայաստանի Հանրապետության քաղաքացիներին և հետևել, որպեսզի այդ քաղաքացիները չենթարկվեն դաժան և մարդկային արժանապատվությունը նսեմացնող վերաբերմունքի»: Մեհրաբի հարազատների պնդմամբ, Հայաստանը արտասահմանում չի պաշտպանում իր քաղաքացու իրավունքները:

Նշենք, որ Մ.Ալոյանը 2010-ին ձերբակալվել է Ռուսաստանում և արտահանձնվել Ուկրաինային: Ուկրաինայում նրան առաջադրվել է մեղադրանք` սպանության պատվիրման համար. նա մեղադրվում է իր գործընկերոջ (որը նաև իր ազգականն է) սպանությունը պատվիրելու մեջ: 2012 թվականի նոյեմբերի 8-ին առաջին ատյանի դատարանը կայացրել է դատավճիռ՝ դատապարտելով նրան ցմահ ազատազրկման: Ներկայումս դատական գործը գտնվում է Վերաքննիչ դատարանում, դատականը նիստը կայանալու է մարտի 28-ին:

Իրավապաշտպան Միքայել Դանիելյանն ասաց, որ youtube-ում կա մի տեսանյութ, որտեղ պարզ երևում է, որ սպանվողի տղան է պատվիրել սպանությունը, «կիլլերին էլ ասում է, որ եթե քեզ բռնեն, կասես Մեհրաբն է պատվիրել»: Նա ասաց, որ իրենք դիմել են ԱՄՆ պետդեպարտամենտ, որպեսզի վերջինս էլ դիմի Ուկրաինայում ԱՄՆ դեսպանատանը` հետևեն Մեհրաբի գործին, այցելել նրան, քանի որ հայկական կողմը որևէ քայլ մինչ այժմ չի արել:

Մեհրաբ Ալոյանի մանկության ընկերը` Կարենը, համոզված է, որ նա չէր կարող որևէ մեկին սպանելու պատվեր տար: Նա կարծում է, որ ցանկանում են Մեհրաբի բիզնեսը վերցնել, իսկ դրա լավագույն միջոցը մեկուսարանն է: «Մարդուն դատապարտելու համար պետք է գոնե ապացույց ունենալ: Հասարակ ապացույց չունեն»,- ասաց Կարենը: Նա նշեց, որ իրենք այսօր այստեղ են` պահանջելով Հայսատանի ԱԳՆ-ից, որպեսզի մասնակցեն դատական նիստներին, հետևեն, որ ամեն ինչ կանոնավոր ընթանա:

Փաստաբան Կարեն Ղազարյանը նախ ասաց, որ թեև ինքը Մերաբ Ալոյանի դե ֆակտո փաստաբանը չէ, այլ հետևում է գործին Հայաստանից, ապա լրագրողներին ներկայացրեց գործի նախապատմությունը, ընթացքը` նույնպես նշելով, որ որևէ ապացույց չկա, որ Մեհրաբը մարդ սպանելու պատվեր է տվել:

ԱԳՆ հյուպատոսական վարչությունից Տիգրան Վարդանյանը մոտեցավ բողոքի ակցիայի մասնակիցներին: Նա տեղեկացրեց, որ իրենք ծանոթ են խնդրին, դիմել են Ուկրաինայում ՀՀ դեսպանատան միջոցով Ուկրաինայի իշխանություններին, որպեսզի այցելության թույլտվություն տան, որից հետո իրենց ներկայացուցիչը գնա նրան տեսության: