Կալիֆորնիայում հայերը բողոքի ցույց են անցկացրել Ադրբեջանի պատվիրակության` Սենատ այցելության դեմ

Հասարակություն 11:22 14/03/2013

Կալիֆորնիայում հայերը բողոքի ցույց են անցկացրել Ադրբեջանի պատվիրակության` Սենատ այցելության դեմ

Կալիֆորնիայում հայերը բողոքի ցույց են անցկացրել Ադրբեջանի պատվիրակության` Սենատ այցելության դեմ: Այս մասին տեղեկացնում է Ամերիկայի «Ասբարեզ» պարբերականը` հղում անելով Հայ դատի Ամերիկայի հանձնախումբին:

ԱՄՆ Կալիֆորնիա նահանգի հայերը բողոքի ցույց են անցկացրել տեղի Կապիտոլիումի դիմաց, Ադրբեջանի խորհրդարանական և պետական նավթային ընկերության պատվիրակության` Կալիֆորնիա նահանգի Սենատ այցելության դեմ:

«Կալիֆորնիա նահանգի Սենատն ամերիկյան ժողովրդավարության կարևոր կենտրոն է և դա Ալիևի բռնատիրական ռեժիմի ներկայացուցչության ցուցադրությունների տեղը չէ»,- ասել է Հայ դատի Ամերիկայի հանձնախմբի արտաքին հարցերի գծով տնօրեն Թերեզա Երիմյանը:

Կալիֆորնիա նահանգի օրենսդիր ժողովի անդամներ Կարո Աչադյանը, Ադրին Նազարյանը, Ջիմ Փաթերսոնն ու Սքոթ Ուիլքը միացել են Հայկական երիտասարդական ֆեդերացիայի և Հայ դատի Ամերիկայի հանձնախմբի կողմից կազմակերպված բողոքին:

«Սումգայիթում, ապա Բաքվում, Կիրովաբադում և Մարաղայում հայերի ջարդերից 25 տարի անց Հայաստանի և Լեռնային Ղարաբաղի հանդեպ ագրեսիան շարունակվում է: Սենատում Ալիևի բռնատիրական ռեժիմի ներկայացուցչության ընդունելությունը վատ մեսիջներ է պարունակում: Բաքուն ընդդիմանում է ԱՄՆ-ի` Ադրբեջանում ժողովրդավարական բարեփոխումներ անցկացնելու կոչերին և ի չիք դարձնում տարածաշրջանային խնդիրները խաղաղ ճանապարհով կարգավորելու միջազգային ջանքերը»,- նշել է Ադրին Նազարյանը:

«Ադրբեջանի պատվիրակության` Սենատ այցելությունից մեկ օր առաջ Ալիևի վարչակազմը ջրցան մեքենաներ, ռետինե փամփուշտները էր օգտագործել խաղաղ ցուցարարներին ցրելու համար: Սրանք իսկապես այն արժենքերն ու ժողովրդավարական ավանդություները չեն, որոնք Կալիֆորնիան կամ էլ ԱՄՆ-ում որևէ մեկը կիսում է»,- նշել է ՀՅԴ ներկայացուցիչ Սևակ Թչեկիջյան (Tchekidjian):

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: