«Եվրասիանեթ». Սերժ Սարգսյանը ոչ մի նախանշան ցույց չի տվել, որ իր վարչակազմի բազմավեկտոր քաղաքականությունը կփոխվի

Քաղաքական 12:56 14/03/2013

Չնայած Ռուսաստանի հետ իր երկարատև հարաբերություններին, Հայաստանը ձգտում է հրաժարվել Ռուսաստանի կողմից առաջարկվող դաշինքից: Այս մասին գրում է «Եվրասիանեթ» կազմակերպության պաշտոնական կայքը:

Ըստ աղբյուրի՝ ՀՀ նախագահ Սերժ Սարգսյանը, ով երկրորդ անգամ փետրվարին վերընտրվեց այդ պաշտոնում, հաջողությամբ կարողացավ շրջանցել Ռուսաստանի կողմից գործադրվող ճնշումները և իր երկիրը ուղղորդել դեպի Արևմուտք` ԵՄ, իսկ այդ ընթացքում ավելի խորացրեց Ռուսաստանի հետ ռազմական դաշինքը:

Մարտի 12-ին ՌԴ նախագահ Վ. Պուտինի հետ հանդիպելու ընթացքում, Սարգսյանը ոչ մի նախանշան ցույց չի տվել, որ իր վարչակազմի բազմավեկտոր քաղաքականությունը կփոխվի:

Նախապես տեղեկություններ էին շրջանառվում այն մասին, որ նախագահներ Վլադիմիր Պուտինի և Սերժ Սարգսյանի հանդիպման հիմնական թեման նախկին խորհրդային միության տարածքում ինտեգրացիոն գործընթացներն են լինելու, սակայն հանդիպումից հետո պարզ դարձավ, այս առումով թեման բեկումնային չէ:

Դեռևս նախորդ տարի Հայաստանի տարբեր բարձրաստիճան գործիչներ հրապարակայնորեն բարձրաձայնում էին Մաքսային միությանը միանալու անհնարինության մասին՝ պնդելով, որ ընդհանուր սահմանի բացակայությունը մի շարք խնդիրներ է առաջացնում:

Պարբերականի փոխանցմամբ, դեռ իր պաշտոնավարման առաջին ժամկետում Սերժ Սարգսյանը գովասանքի էր արժանացել Արևմտյան մայրաքաղաքների և ՆԱՏՕ-ի հետ համագործակցությունն ընդլայնելու և ԱՄՆ աջակցությամբ Թուրքիայի հետ բանակցություններ վարելու համար:

Ըստ աղբյուրի՝ սա է այն պատճառներից մեկը, որ արևմտյան առաջնորդները, այդ թվում՝ Բարաք Օբաման, նրան շնորհավորեցին վերընտրվելու կապակցությամբ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: