Ձեր վստահելի աղբյուրը

Հայաստանի ֆուտբոլի ազգային հավաքականի և Դոնեցկի «Շախտյորի» կիսապաշտպան Հենրիխ Մխիթարյանը «Չեռնոմորեցի» հետ Ուկրաինայի առաջնության հերթական տուրի հանդիպումից առաջ ակումբի պաշտոնական կայքի թղթակցին տված հարցազրույցում խոսել է իր ակնկալիքների մասին:

- Հենրիխ, ներկայումս «Չեռնոմորեցն» ընթանում է մրցաշարային աղյուսակի 5-րդ հորիզոնականում և 5 միավորով զիջում է «Դինամոյին»: Ի՞նչ ես կարծում, օդեսացիներն այս մրցաշրջանում կարո՞ղ են պայքարել` մրցանակային եռյակում տեղ գրավելու կամ 4-րդ հորիզոնականը զբաղեցնելու համար:
- Այո, կարող են: Կարծում եմ, որ «Չեռնոմորեցն» այնպիսի մարզավիճակում է գտնվում, ինչպիսին դեռ չունի առաջնության և ոչ մի թիմ: Նրանք հիանալի են հասկանում իրենց ներկայիս դիրքը և մնացած բոլոր խաղերում ամեն ինչ կանեն, որպեսզի հասնեն առավելագույն արդյունքի:
Բնականաբար, առաջիկա խաղում թույլ չենք տա, որպեսզի նրանք Դոնեցկից միավորներ տանեն: «Չեռնոմորեցն» ունի լավ ֆուտբոլիստներ և լավ գլխավոր մարզիչ: Ուրախ եմ, որ առաջնությունում կան նման թիմեր, քանի որ եթե թիմը ձգտում է հասնել առավելագույն հաջողության, դրանից մեծանում է մրցակցությունը, ու բարձրանում է առաջնության մակարդակը:

- Համաձա՞յն ես, որ «Չեռնոմորեցն» առաջին հերթին մարզչական թիմ է:
- Այո, Գրիգորչուկը շատ հզոր թիմ է ստեղծել, և նրանք արժանիորեն տեղ են զբաղեցնում 5-րդ հորիզոնականում: «Չեռնոմորեցը» հիանալի ֆուտբոլ է ցուցադրում և հասնում է լավ արդյունքների:

- Երբ ասացիր, որ «Չեռնոմորեցը» լավ մարզավիճակում է, նկատի ունեիր գարնանային հատվածում նրանց տոնած 2 հաղթանա՞կը:
- Այո: Բացի այդ, առաջնության վերջին 9-ը խաղից 8-ում այդ թիմը հաղթանակ է տոնել: Հաղթանակների շարքը չի ընդհատվել դեռ նախորդ մրցաշրջանից:

- Նման մրցակիցը Ձեզ չի վախեցնո՞ւմ:
- Ոչ, չի վախեցնում: Մենք հասկանում ենք, որ այս թիմին հաղթելը հեշտ չի լինելու, սակայն մենք էլ վատ մարզավիճակում չենք: Կփորձենք լավ խաղալ, հաղթել և ուրախացնել մեր երկրպագուներին:

- Այս թիմերի նախորդ դիմակայության ժամանակ «Շախտյորն» Օդեսայում կարողացավ հաղթել խոշոր` 5:1 հաշվով, իսկ դու դարձար հեթ-տրիկի հեղինակ: Այդ հանդիպման ժամանակ հաջողության հասնելը Ձեզ հե՞շտ տրվեց:
- Չէի ասի, որ հեշտ հաղթանակ տոնեցինք: Մեզ շատ օգնեց այն հանգամանքը, որ կարողացանք արագ գոլ խփել` դրանով իսկ «Չեռնոմորեցին» ստիպելով դուրս գալ պաշտպանությունից և գրոհել: Եթե հաշիվը չոր մնար, նրանք մեզ հետ բաց ֆուտբոլ չէին խաղա: Չնայած եզրափակիչ արդյունքին` 5:1, անչափ ծանր հանդիպում էր: Հուսանք, որ այս անգամ ավելի հեշտ կլինի: