Լևոն, Նելլի, Միլենա… Փոքրիկներ, ում բոլորս օգնել ենք
Panorama.am-ը գրել է այս փոքրիկների մասին` 10-ամյա Լևոն Այվազյանի, ում մոտ գլխուղեղի աճող ուռուցք է հայտնաբերվել, 4-ամյա Միլենայի, ում աչքը հեռացվել է չարորակ ուռուցքի պատճառով, 3-ամյա Նելլի Պետրոսյանի` արյան սուր լեյկոզով և մյուս փոքրիկների մասին, որոնց օգնության ձեռք մեկնվեց ու նրանց ծնողներին միայնակ չմնացին դժվարին այդ պայքարում:
Մեր փորքիկ հերոսների կյանքում որոշակի տեղաշարժեր են եղել, Աստված առաջ` դրական. ամեն դեպքում ժամանակին վրա հասած օգնությունը իր ազդեցությունն ունեցավ:
Այդպես, գյումրեցի Լևոնը, ում հաշվեհամարին հրապարակումից հետո ֆինանսական լուրջ փոխանցումներ եղան ու նաև պաշտոնյաների կողմից, իսկ անհայտ բարերարի կողմից փոխանցվեց հենց Մոսկվայում կատարվելիք վիրահատության գումարը` 8 հազար ԱՄՆ դոլարը, Մոսկվայից վերադարձից հետո Երևանում անցավ քիմիաթերափիայի բոլոր փուլերը: Նախօրեին մեզ հետ զրույցում Լևոնի հայրը` Ռուբեն Այվազյանը տեղեկացրեց, որ հետազոտման վերջին արդյունքները ուղարկել է Մոսկվա` պրոֆեսորին, ով ուրախացրել է` քիմիաթերափիան իր արդյունքը տվել է, ուռուցքը գրեթե երեք անգամ փոքրացել է.
«Ըսավ` բեր Լևոնիգին Մոսկվա, լազերով վառենք, քանի քնած է (նկատի ունի ուռուցքը), ու ամեն ինչ լավ կլինի, մի մտածի»,- փոխանցեց հուզված հայրը: Նրա խոսքով, Լևոնը իրեն լավ է զգում, միայն նեղվում է, որ մազերը թափվեցին քիմիաթերափիայից, բայց հայրը նրան հանգստացնում է` «դա հեչ , կանցնի»:
Այվազյանների ընտանիքը նորից ճանապարհի վրա է, առաջիկա օրերին պետք է մեկնեն Մոսկվա, Առողջապահության նախարարությունը կհոգա տոմսերի հարցը: Մոսկվայում կմնան 1.5 ամիս, ու դրանից հետո կվերադառնան Հայաստան` ակնկալիքով, որ հաջորդ անգամ իրենց ընտանիքը ինքնաթիռ կնստի միայն հանգստի մեկնելու նպատակով…
Միլենա Քոչարյանն էլ ծնողների հետ ևս Մոկսվայի ճամփան է բռնել. մի քանի օր առաջ փոքրիկի հայրը` Արտակ Քոչարյանը, տեղեկացրեց, որ իրենք մեկնում են Մոկսվա հետազոտման, տոմսերը դարձյալ Առողջապահության նախարարությունն է հոգացել:
Հիշեցնենք, օգոստոսին երեխային վիրահատել են Մոսկվայում, մի աչքը հեռացրել են, բայց քանի որ մտավախություն կա, որ սարսափելի այդ հիվանդությունը տարածվում է երկու աչքի վրա, քիմիաթերափիայից հետո բժիշկները հորդորել էին նորից տանել Մոսկվա հետազոտման…. մնում է հուսալ, որ ամեն ինչ բարեհաջող կլինի:
Վերջին մեր փոքրիկ հերոսուհին 3-ամյա Նելլի Պետրոսյանն էր, ով այս պահին արյունաբանական կենտրոնում բուժում է ստանում` Նելլիին հարկավոր է շուտափույթ տեղափոխել Գերմանիա: Մեր հրապարակումից հետո ոչ միայն ֆինանսական փոխանցումներ եղան նշված հաշվեհամարին, այլև Panorama.am-ի խմբագրություն էին զանգահարում բազմաքիվ քաղաքացիներ և առաջարկում իրենց օգնությունը: Անգամ Գերմանիայի հայ ընթերցողներն էին առաջարկում հնարավորը` աջակցել կեցության, ֆինանսական, մնացած հարցերում հենց տեղում` Գերմանիայում: Բացի այս, և այդ մասին գրվել է, մարտի 13-ին «Օգնենք հայ մանուկներին» բարեգործական հասարակական կազմակերպությունը Երևանի պետական տիկնիկային թատրոնի աջակցությամբ կազմակերպեց բարեգործական համերգ՝ «Բարդ» ակումբի երգիչների մասնակցությամբ:
Panorama.am-ի հետ զրույցում հկ-ի ներկայացուցիչներից մեկն ասաց, որ այս պահին հնարավոր չէ ասել, թե ինչքան գումար հավաքվեց համերգից` վերջնական գումարի չափը պարզ կլինի երկուշաբթի օրը, քանի որ բացի տոմսերի վաճառքից գոյացած գումարից, համերգի շրջանակներում կազմակերպվել է գրքերի ու և ձայնասկավառակների վաճառք, ինչի հեղինակը երգիչներն են եղել, որի հասույթը ևս տրամադրվելու է Նելլիին: Տեղադրված եղել նաև հանգանակությունների արկղ, որպեսզի ցանկացողները կարողանան աջակցել նաև այս կերպ:
Մարտի սկզբին Նելլին ընդունեց քիմիաթերափիայի առաջին կուրսը: Հոր` Ալբերտ Պետրոսյանի խոսքերով երեխան լավ է տարել այն, հիմա ինքնազգացողությունը նորմալ է: Մնում է հուսալ, որ Գերմանիա գնալու խնդիրը, որը կախված է մի շարք հանգամանքներից` և ֆինանսական, և փաստաթղթային, արագ լուծում կստանա և ընտանիքը կմեկնի Գերմանիա երեխայի երկարատև բուժման նպատակով:
Նախորդիվ`
10-ամյա Լևոնը օգնության կարիք ունի. «Չեմ կարա թողնիմ աչքիս դեմը մարի…»
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
