Ձեր վստահելի աղբյուրը

 ՀՀ տրանսպորտի և կապի փոխնախարար Արտաշես Ավետիսյանը, ճանապարհային ոստիկանության պետի տեղակալ Արթուր Տոնոյանը և ՀՀ կառավարության աշխատակազմի «Օրենսդրության կարգավորման ազգային կենտրոն»-ի ղեկավար Արմեն Եղիազարյանը այսօր լրագրողներին մեկ անգամ ևս ներկայացրեցին տաքսի ծառայության ոլորտին վերաբերող օրենսդրական նախաձեռնությունը:

Հիշեցնենք, որ «Օրենսդրության կարգավորման ազգային կենտրոն»-ի կողմից ներկայացվել է տաքսի ծառայության ոլորտին վերաբերող օրենսդրական նախաձեռնություն, ըստ որի՝ առաջարկվում է տաքսիների դեղին համարնիշները փոխարինել ինքնակպչուն կտրոններով, ինչպես նաև վերացնել բուժզննման և տեխզննման գործառույթները: Այս առաջարկությունները տաքսու վարորդների շրջանում առաջացրել են դժգոհություններ:

ՏԿ փոխնախարար Արտաշես Ավետիսյանը նշեց, որ հաշվի առնելով կուտակված փորձը և բողոքները, ընդառաջելով ներկայացված բազմաթիվ առաջարկությունները, մշակվել են կանոնակարգային նոր մոտեցումներ՝ ուղղված բացառապես վարորդների աշխատանքի դյուրացմանը, ադմինիստրատիվ-բյուրոկրատական միջամտությունների առավելագույն կրճատմանն ու գրանցմանը:
Փոխնախարարի խոսքերով՝ հիմնականում չորս բարփոխումներ են արվել: Առաջինը, բարելավվել է լիցենզիայի հատկացման գործընթացը՝ այն տրվելու է փաստաթղթերը ներկայացնելուց 5 աշխատանքային օրվա ընթացքում (ներկայիս 30 օրվա փոխարեն):
Բացի այդ, նոր փաթեթով պետական տուրքի նախկին 25 հազար դրամ միանվագ վճարումը միացվել է արտոնագրային վճարին և բաժանվել տասներկու ամսվա վրա:

Երկրորդ փոփոխությամբ դեղին պետհամարանիշները շրջանառությունից հանվում են և վերադարձ է կատարվում սպիտակ համարներին: «Այս թեմայի շուրջ խոսակցություններ կան, թե արդյոք պետք է վերադառնալ սպիտակ համարներին, քանի որ ժողովուրդը սովորել է դեղին համարներին: Դա մի քիչ անհասկանալի հիմնավորում է, քանի որ դեղին համարն առաջին հերթին վերահսկողական ֆունկցիաները կատարելու համար էր, որպեսզի տրանսպորտային տեսչությունը հնարավորություն ունենար ճիշտ վերահսկողություն կատարեր»,- ասաց Ա.Ավետիսյանը:

Այսպիսով, ըստ նրա, առաջարկում են դեղին համանիշի համար 17 հազար դրամ այլևս չվճարել, իսկ դրանց փոխարեն տրանսպորտի նախարարությունը տաքսիստներին անվճար տրամադրելու է ինքնակպչուն կտրոն:
Բացի այդ, ինչպես նշեց Ա.Ավետիսյանը, հանվելու է ամենօրյա բուժզննման և տեխզննման պահանջը: Ըստ նրա՝ ուսումնասիրությունները ցույց են տվել, որ դա հիմնականում ֆորմալ բնույթ է կրում և ամենօրյա բուժզննում և տեխզննում անցկացնելը իրականությանը չի համապատասխանում:

Լրագրողների հարցին, թե ՀՀ կառավարությունը ինչո՞ւ 6 տարի առաջ տաքսիստներից պահանջեց դեղին համանիշներ հանել և այսօր էլ այլ պահանջներ է ներկայացնում, Ա.Ավետիսյանը նշեց, որ համարանիշն ընդամենը վերահսկողության և հաշվառման միջոց է, սակայն դրա անհրաժեշտությունն այլևս չկա:

Ճանապարհային ոստիկանության պետի տեղակալ Արթուր Տոնոյանն էլ ասաց, որ ժամանակին վերահսկողության մեխանիզմ է պետք եղել հսկելու տաքսիստների գործունեությունը, բայց ժամանակի ընթացքում պարզ է դարձել, որ քաղաքացիները դեղին համարները ստանալու համար լուրջ խնդիրներ են ունենում ոչ միայն ֆնանսական, այլև բյուրոկրատական տեսանկյունից:
«Օրենսդրական կարգավորման ազգային կենտրոնի» ղեկավար Արմեն Եղիազարյանն էլ հայտնեց, որ այս փոփոխությունների արդյունքում վարորդները խնայողություններ կանեն:

Նշենք, որ անհատ տաքսիստները մտահոգություն ունեն, որ այս քայլերով փորձ է արվում իրենց «խոշորոցանել», այսինքն՝ տանեն դեպի խոշոր տաքսապարկեր, սակայն Ա.Ավետիսյանը նշեց, որ նման բան գոյություն չունի:

«Օրենսդրության կարգավորման ազգային կենտրոն»-ի կողմից առաջարկվում է նաև պարտադիր ստուգաչափել տաքսիների հաշվիչները: Լրագրողների հարցին, թե այդ գործընթացն ինչպես են վերահսկելու, ՏԿ փոխնախարարը պատասխանեց. «Հատուկ ուշադրություն է դարձվելու հաշվիչների ստուգաչափմանը և վարորդները պարտավորվելու են տարին մեկ անգամ հաշվիչները ստուգաչափման ներկայացնեն»,- ասաց Ա.Ավետիսյանը:

Նախորդող՝ Արմեն Պողոսյան. «Անտրամաբանական և անընդունելի է դեղին համարանիշի հանելը»