Ձեր վստահելի աղբյուրը

Հայտնի է, որ գարնանը սրանում են խրոնիկ ընթացք ունեցող բոլոր հիվանդությունները, այդ թվում նաև սրտանոթայինները: Դրա համար, ինչպես այսօր լրագրողների հետ հանդիպման ժամանակ նշեց Երևանի գլխավոր սրտաբան Պարունակ Զելվեյանը, սրտանոթային հիվանդությամբ տառապողները հատկապես գարնանը պարբերաբար պետք է խորհրդակցեն բժիշկների հետ և բուժման հարցում ինքնագործունեությամբ չզբաղվեն:

Նրա խոսքերով՝ պետք է ապրել առողջ կենսակերպով և օրգանիզմից եկող ազդակներն անմիջապես քննարկել բժիշկների հետ: «Քաղաքակիրթ մոտեցում է պետք: Ցանկացած փոփոխություն, ցանկացած գանգատ չպետք է անուշադրության մատնել, չպետք է անտեսել, չպետք է ինքնաբուժությամբ զբաղվել կամ հարևանների հետ սուրճի գավաթի շուրջ քննարկել, թե այսօր ինչ պետք է փոխեն իրենց բուժման մեջ: Հարգենք մեզ և բժիշկներին, և համատեղ ջանքերով իրականացնենք բուժման այն սխեմաները, որոնք արդյունավետ են կանխարգելում հիվանդությունը»,- ասաց Պ.Զելվեյանը:

«Ինթրա» հոգեկան առողջության կենտրոնի գլխավոր հոգեբան Խաչատուր Գասպարյանը նշեց, որ մարդիկ դժվարությամբ են հարմարվում ինչպես եղանակային, այնպես էլ այլ փոփոխությունների հետ: «Հայտնի է, որ բարդ հոգեկան հիվանդությունները և գարնանը, և աշնանը սրվում են: Պատահական չէ, որ խրոնիկական հիվանդներին խորհուրդ է տրվում այդ շրջանում մեկ անգամ ևս վերանայել բուժման ընթացքը»,- ասաց հոգեբանը: Նա նաև նշեց, որ եղանակային փոփոխություններով պայմանավորված կարող է առաջանալ գերակտիվություն: Օրինակ, ըստ Խ.Գասպարյանի, այդ փոփոխության ժամանակ մարդիկ սկսում են ավելի շատ պարտքեր կուտակել, ավելի շատ խաղամոլությամբ տարվել և այլն:

Անդրադառնալով սրտանոթային խնդիրներին, Պ.Զելվեյանն ասաց, որ ինչպես ամբողջ աշխարհում, այնպես էլ Հայաստանում, մահացությունների 50%-ից ավելին սրտանոթային բարդություններին է բաժին ընկնում: Նրա խոսքերով՝ ամբողջ աշխարհում տարեկան 17 մլն մարդ մահանում է սրտանոթային հիվանդություններից. կանխատեսվում է, որ 2030թ-ին այդ թիվը կհասնի 23 մլն-ի:

Այդուհանդերձ, Պ.Զելվեյանը նկատեց, որ Հայաստանում ոչ թե ավելացել է սրտանոթային հիվանդություններով տառապող մարդկանց թիվը, այլև՝ հայտնաբերելիությունը: Նա ընդգծեց, որ Հայաստանում վերջին տարիներին նկատվում է սրտանոթային հիվանդությունների հայտնաբերելիության երիտասարդացում, այսինքն` երիտասարդներն արդեն սկսել են գիտակցել իրենց առողջության կարևորությունը և տարեկան մեկ անգամ դիմում են բժշկի: «Եթե երիտասարդը զարկերակային գերճնշման խնդիր ունի, ապա ժամանակին չհայտնաբերելու և գրագետ բուժում չիրականացնելու արդյունքում կվերածվի լուրջ բարդությունների: Դրա համար պետք է առավել ուշադիր լինենք մեր առողջության նկատմամբ»,- ասաց սրտաբանը:

Ըստ Պ.Զելվեյանի՝ հետազոտությունները ցույց են տվել, որ մահացությունը հնարավոր է նվազեցնել ռիսկի գործոնների` ալկոհոլի, ծխախոտի, անառողջ սննդի, թերակտիվության վերացման դեպքում: Այսինքն՝ կենսակերպի փոփոխության, առողջ ապրելակերպի դեպքում սիրտ-անոթային հիվանդությունները ակնհայտորեն կնվազեն: Սրտաբանը ռիսկի գործոններից առանձնացրեց նաև ավելցուկային քաշը: Ըստ նրա՝ այսօր մեր բնակչության 60%-ն ունի ավելցուկային քաշ: «Իսկ ամենասարսափելին այն է, որ դպրոցահասակ երեխաների շրջանում ավելցուկային քաշի տարածվածությունը հասնում է 40 տոկոսի: «Երեխաների գերակշիռ մասը անառողջ կենսակերպով է ապրում՝ ինչպես սննդի, այնպես էլ թերակտիվության հետ կապված: Այսինքն՝ եթե այս տեմպերը շարունակվեն, ապա ապագայում ունենալու ենք ճարպակալման տեսքով լուրջ համաճարակ: Այսինքն այն, ինչ այսօր ունի Միացյալ նահանգները»,- ասաց Պ.Զելվեյանը:

Անդրադառնալով Հայաստանում պարտադիր բժշկական ապահովագրության ներդրմանը, նշեց, որ այն նպաստել է սրտանոթային հիվանդությունների ժամանակին հայտնաբերմանը և բուժմանը, ինչպես նաև կտրուկ բարձրացել է բժշկի դիմելիությունը: «Եթե առաջ ինչ-ինչ հանգամանքներից ելնելով չէին դիմում, ապա այժմ կտրուկ բարձրացել է դիմելիությունը, հատկապես ուսուցիչների շրջանում: Կարծում եմ, որ դա կնպաստի առողջացմանը»,- ընդգծեց սրտաբանը: