Ձեր վստահելի աղբյուրը

Օրերս հրապարակվել է «Ռազմավարական հետազոտությունների միջազգային ինստիտուտ» (The International Institute for Strategic Studies, IISS) բրիտանական կազմակերպության «The Military Balance 2013» զեկույցը, որում գնահատականներ են տրվել նաև Հայաստանի ու Ադրբեջանի ռազմական ներուժերին: ՀՀ զինված ուժերի առնչությամբ` որպես բացասական երևույթ, փորձագետները նշել են «բանակում կոռուպցիոն երևույթների և ֆինանսների կառավարման ցածր արդյունավետության» առկայությունը: Զեկույցում հնչած գնահատականների վերաբերյալ Panorama.am-ը զրուցեց ռազմական փորձագետ Հրաչյա Պետրոսյանցի հետ:

«Վերցվել են պաշտոնապես ներկայացված ինչ-որ թվեր` այսինքն որքան է մեր բյուջեում ներկայացված ռազմական ծախսերը, որքան է Ադրբեջանի բյուջեից հատկացված ռազմական ծախսերին, այնուհետև այդ թվերի համադրություն է արվել: Բացի այդ, ըստ երևույթին, միջազգային կազմակերպությունների կողմից կատարված որոշակի հաշվետվություններ են նաև վերցվել ու դրանց հիման վրա իրենց կարծիքն են ներկայացրել»,- նշեց նա:

Հարցին, թե ինչպե՞ս կմեկնաբանեք զեկույցում տեղ գտած այն դրույթը, թե ՀՀ բանակում կոռուպցիոն ռիսկեր կան, իսկ ֆինանսական կառավարումն արդյունավետության խնդիրներ ունի, փորձագետը նշեց. «Գիտեք, այսօր ես չեմ կարող պատասխանատվութուն վերցնել և ասել` հայկական զինված ուժերում կոռուպցիան ընդհանրապես բացակայում է, բայց համոզված եղեք, որ դա եթե կա էլ, հասցված է նվազագույնի: Եթե այսօր ՀՀ-ում կա որևէ կառույց, որտեղ կոռուպցիոն ռիսկը ամենացածրն է, դա զինված ուժերն են: Ես անձամբ, համոզված եմ դրանում»:

Հ. Պետրոսյանցի կարծիքով` անհասկանալի է, թե ինչի հիման վրա են ֆինանսների կառավարման վերաբերյալ այդպիսի եզրակացություններ արվում, քանի որ Պնախարարությունում ֆինանսների անարդյունավետ կառավարման խնդիր չկա:

«Դա կարելի է շատ պարզ ասել Ադրբեջանի մասին, որտեղ իրոք, ֆինանսների անարդյունավետ կառավարումը բերում է նրան, որ և´ մենք, և´ Ադրբեջանը ձեռք ենք բերում նույնատիպ սպառազինություն և տեխնիկա, բայց մենք կարողանում ենք այդ ամեն ինչը անել շատ սահմանափակ` մի քանի հարյուր միլիոն դոլարի սահմաններում, իսկ նրանք դա անում են 1 միլիարդ, 700 միլիոն դոլարի սահմաններում»,- հավելեց ռազմական փորձագետը:

«Բրիտանացի փորձագետները ոչ թե անձամբ ժամանել և իրենց տեսածի հիման վրա փորձագիտական եզրակացություններ են կատարել, այլ հիմնվել են ուրիշների գրած որոշակի ոչ արժանահավատ փաստաթղթերի վրա: Կարծում եմ այդ զեկույցներին պետք չէ նման կարևորույթուն տալ, քանի որ հաջորդ զեկույցը կարող է միանշանակ մեր դեմ լինել»,- եզրափակեց Հ. Պետրոսյանցը:

Նախորդիվ` Բրիտանացի ռազմական փորձագետներ. Հայկական բանակն իր մարտունակությամբ գերազանցում է ադրբեջանական բանակին