Ձեր վստահելի աղբյուրը

«Սուտ է այն նախադասությունը, որ ես ասել եմ, թե չեմ հաղթել: Ես ասել եմ, որ համատարած կեղծիք եղել է, ձեր թվաբանությունը իրականության չի համապատասխանում, և դրա համար առաջարկում եմ` բացեք բոլոր ընտրատուփերը, և կտեսնենք,  լցոնումներով հանդերձ, որն է իրական պատկերը»,-Ազատության հրապարակում ընթացող ասուլիսում հայտարարեց Րաֆֆի Հովհաննիսյանը` արձագանքելով Սերժ Սարգսյանի` նախօրեին մի քանի լրատվամիջոցներին տված հարցազրույցում հնչեցրած հայտարարությանը:

Րաֆֆի Հովհաննիսյանը կրկնեց իր առաջարկները, որոնք ներկայացրել է Բաղրամյան 26-ում և մերժել է Սերժ Սարգսյանը:

«Սխալ է նաև այն նախադասությունը, որ իր առաջարկած երեք ճանապարհներից երրորդը քննարկվել է: Ոչ ինքը, ոչ ես երբևէ չենք քննարկել իմ մասնակցությունը կառավարական որևէ աշխատանքում: Դա ևս չի համապատասխանում իրականությանը»,-ասաց Հովհաննիսյանը:

Նրա խոսքով, չի եղել նաև գրավոր «փաստաթուղթ» ուղարկելու մասին պայմանավորվածություն: Հովհաննիսյանի խոսքով, ինքը Բաղրամյան 26-ում ասել է, որ իր առաջարկները սպառվել են:

«Վերադարձա հրապարակ, հրավիրեցի նրան հրապարակ, բայց պարոն Սարգսյանը նպատակահարմար չգտավ»,-ասաց «Ժառանգության» ղեկավարը, հիշեցնելով, որ մարտի 10-ից հետո է ՀՀ նախագահի աշխատակազմի ղեկավարն իրեն հրավիրել նստավայր, բայց ինքն ասել է` «արդեն ուշացել են»:

Հովհաննիսյանի խոսքով, դրանից հետո պաշտոնյա և ոչ պաշտոնյա անձանց կողմից միջնորդություններ են եղել, որ Հովհաննիսյանը դուրս գա հրապարակից, հանդիպում ունենա: Սակայն դրանք մերժվել են:
Հովհաննիսյանը հետո առաջարկել է, եթե պարոն Սարգսյանը ցանկանում է հանդիպել, ապա կարելի է դա կազմակերպել այլ վայրում, օրինակ մոտակա սրճարանում, որտեղ ժողովուրդը կտեսնի, որ երկու ախոյաններն իրար ձեռք են սեղմում:
«Այս 3-4 առաջարկներին հանգուցալուծում չկար: Եվ վերջում ես ասացի, որ եթե կա հոգեբանական արգելք, ամեն մարդ ունի իր ներքին խնդիրը, ես ասացի, որ պարոն Սարգսյանը գրավոր հաղորդակցության տարբերակը կարող է դիտարկել: Սա էր վերջին տարբերակը, որը պահեստային էր»,-ասաց Հովհաննիսյանը:

Նա հիշեցրեց, որ մի քանի օր առաջ երեկոյան ժամին իրեն այցելել էր ԱԺ նախագահ Հովիկ Աբրահամյանը:
«Ես իր աչքերին նայեցի ու ասացի, որ դուք միջնորդ ու սուրհանդակ չեք»,-ասաց Հովհաննիսյանը, շարունակելով, որ հաջորդ օրը Աբրահամյանը զանգում է Արմեն Մարտիրոսյանին, տալիս փակ ծրար, որի վրա գրված է «Ազգային Ժողով»:
«Բացում եմ ծրարը, երկու էջանոց փաստաթուղթ է»,-պատմեց Հովհաննիսյանը, ավելացնելով, որ մարտի 16-ին ստացել է մարտի 5-ով թվագրված թուղթ: Առաջարկն էլ սահմանադրական փոփոխությունների հանձնաժողովի նախագահի պաշտոնը զբաղեցնել է: Հովհաննիսյանը նշեց, որ այդ առաջարկը մերժվել է «Ժառանգության» խմբակցության ղեկավարի կողմից դրանից մի քանի օր առաջ:

«Ուրեմն ես ոչ թե խաչ քաշեցի, որովհետև խաչը սուրբ է, իքս դրեցի երկու էջերի վրա, շրջան գծեցի ամսթվի շուրջ, շրջան գծեցի «Ազգային ժողով» բառերի շուրջ ու իմ ստորագրությամբ փակ ծրարով ուղարկեցի Սերժ Սարգսյանին»,-ասաց Հովհաննիսյանը:

Հիշեցնենք, որ Սերժ Սարգսյանը երեկ հայտարարել է, որ իր ուղարկած գրավոր առաջարկները հետ է ստացել՝ վրան խաչ քաշած:

Ինչ վերաբերում է ապագա անելիքներին, ապա Հովհաննիսյանն ասաց, որ ուրբաթ օրը կայանալիք հանրահավաքում կընթերցի փաստաթուղթը, ինչից հետո կուղարկի Սերժ Սարգսյանին, խոստացավ, որ սրանից հետո ամեն ինչ պետք է լինի բաց, թափանցիկ, ժողովրդի աչքի առաջ:

Ըստ «Առավոտի», նախագահականում Րաֆֆի Հովհաննիսյանի հետ հանդիպման ժամանակ Սերժ Սարգսյանն առաջարկել է  երեք ճանապարհ: Առաջինը՝ Րաֆֆի Հովհաննիսյանը գնում է Ազատության հրապարակ, շարունակում է պնդել, որ ստացել է քվեների 80 տոկոսը, իրեն հռչակում է նախագահ և փորձում է ստեղծել իշխանության այլընտրանքային կառույցներ: Այդ դեպքում իրավապահ կառույցները կատարելու են իրենց վերապահված պարտականությունները:

Երկրորդ՝ Րաֆֆի Հովհաննիսյանը, շարունակելով պնդել, որ ընտրություններն արդար չեն անցել, որ ինքը իրականում հավաքել է պաշտոնականից ավելի բարձր տոկոսներ, ուժեղացնում է իր կառույցները, մասնակցում է Երևանի ավագանու ընտրություններին, ստանում է մեծամասնություն, դառնում է Երևանի քաղաքապետ և ղեկավարում է հանրապետության մեկ երրորդը:

Երրորդ ճանապարհը՝ դադարում է ընդդիմություն լինելուց՝ ներգրավվելով իշխանական կառույցների մեջ և պայքարում է կոռուպցիայի ու արտագաղթի դեմ, ինչպես որ խոստացել է ընտրարշավի ժամանակ:
Ինչպես լրագրողներին հայտնեց ՀՀ նախագահը, այս երրորդ առաջարկի վերաբերյալ Րաֆֆի Հովհաննիսյանը ճշտեց՝ արդյոք խոսքը կոալիցիայի՞ մասին է: Դրան Սերժ Սարգսյանը պատասխանել է, որ բոլոր քննարկումները կլինեն Րաֆֆի Հովհաննիսյանի սկզբունքային դիրքորոշումը հայտնելուց հետո: Երկու գործիչները պայմանավորվել են՝ իրար փոխանցել գրավոր առաջարկներ: