Սահմանը հատած 2 քաղաքացիական անձինք հանձնվել են հայկական կողմին
Շուրջ մեկ ժամ առաջ Տավուշի մարզի Կայանավան բնակավայրի մոտ Կարմիր Խաչի միջազգային կոմիտեի Երևանի և Բաքվի գրասենյակների միջնորդությամբ ադրբեջանական կողմը Հայաստանին է հանձնել Դովեղ և Այգեհովիտ գյուղերի բնակիչներին: Այդ մասին Panorama.am-ին տեղեկացրեց ՀՀ Գերիների, պատանդների և անհայտ կորածների հարցերով զբաղվող հանձնաժողովին առընթեր աշխատանքային խմբի ղեկավար Արմեն Կապրիելյանը:
Նա դժվարացավ քաղաքացիական անձանց առողջության հետ կապված որևէ բան հայտնել և ասաց, որ այդ մասին հավելյալ պաշտպանության նախարարությունը հայտարարությամբ հանդես կգա:
Ավելի վաղ Panorama.am-ը տեղեկացրել էր, որ Տավուշի մարզի Դովեղ գյուղի բնակիչ Մնացական Քառյանը և Այգեհովիտ գյուղի բնակիչ Անահիտ Առաքելյանը անհետ կորել են և գյուղերում վարկածներ ան, որ նրանք հատել են հայ-ադրբեջանական սահմանը: Երկու գյուղացիներն էլ առողջական խնդիրներ են ունեցել:
Անահիտ Առաքելյանի բարեկամը Panorama.am-ին ասաց, որ իր մորաքույրը դեռ տուն չի եկել: «Կարմիր խաչում է հիմա, ասեցին, որ շուտով կբերեն», -փոխանցեց նա:
Կարմիր խաչի միջազգային կոմիտեն իր հերթին տեղեկացնում է. «Նախքան հայրենադարձումը ԿԽՄԿ-ի պատվիրակները այցելել են քաղաքացիական անձանց՝ ազատազրկման պայմանները և նրանց հանդեպ վերաբերմունքը գնահատելու նպատակով։
Գործելով որպես չեզոք միջնորդ և իր հանձնագրին համաձայն, ԿԽՄԿ աջակցել է այս հայրենադարձման գործողությանը՝ Ադրբեջանի Հանրապետության և Հայաստանի Հանրապետության իշխանությունների հետ համատեղ։ Նախքան գործողության իրականացումը, ներկալված անձինք հավաստիացրել են ԿԽՄԿ-ին, որ վերադառնում են հայրենիք իրենց հոժար կամքով»։
Նախորդող հրապարակում. Որտե՞ղ են Տավուշի մարզի երկու բնակիչները. Գյուղերում չեն բացառում սահմանն անցնելու վարկածը