Ձեր վստահելի աղբյուրը

«Ազերբայջան» հեռուստաալիքով հեռարձակվող «Ինչ, որտեղ, երբ» հեռուստախաղի մասնակից Իլյաս Նաիբովին, ով հայերի ջարդերի մասին պատմող «Քարե երազներ» վեպի հեղինակ Աքրամ Այլիսլիի որդին է, հեռացրել են նախագծից, հայտնում է «Gafgazinfo»-ն:

Իլյաս Նաիբովին հեռուստանախագծից հեռացնելու պատճառը պարզելու նպատակով կայքը դիմել է ծրագրի` Ադրբեջանի ներկայացուցիչ Բալաշ Գասըմովին: Վերջինս հայտնել է, որ Իլյաս Նաիբովը պարզապես թիմն է փոխել:

Կայքը նշում է նաև, որ Ադրբեջանում «Ինչ, որտեղ, երբ» ծրագրի` ռուսերեն լեզվով հեռարձակումը տարբեր ժամանակներում քննարկման թեմա է եղել: Չնայած Ազգային հեռուստառադիոխորհուրդը հայտարարել է, որ օտար լեզուներով ծրագրերը Ադրբեջանի հեռուստաեթերում արգելված են, սակայն, այդ հեռուստանախագիծը դեռ շարունակվում է հեռարձակվել ռուսերենով:

Հիշեցնենք, որ «Քարե երազներ» գրքում, որը տպվել էր դեռևս 2012 թ-ի դեկտեմբեր ամսին «Ժողովուրդների բարեկամություն» ամսագրում, հեղինակը ականատեսների վկայությամբ, վերարտադրել է Ադրբեջանի ԽՍՀ տարածքում հայաբնակ բնակչության նկատմամբ ադրբեջանցիների կողմից 1919թ-ին, ինչպես նաև 1988-90 թթ-ին իրականացված վայրագությունները: Գրքի հրապարակումից հետո ադրբեջանական հասարակական և քաղաքական շրջանակները նախադեպը չունեցող արշավ են սկսել գրողի նկատմամբ՝ նրան մեղադրելով «ադրբեջանցիներին և թուրքերին խայտառակող ու նսեմացնող» գիրք գրելու, «դավաճանության», «սադրանքի» և այլ հանցագործությունների մեջ: