Ձեր վստահելի աղբյուրը

Երևանի ավագանու ընտրություններին Հայաստանի Հանրապետական կուսակցության  կողմից Կենտրոնական ընտրական հանձնաժողովին ներկայացված ցուցակում Հայոց ցեղասպանության թանգարան-ինստիտուտի տնօրեն Հայկ Դեմոյանը գրանցված է 17-րդ հորիզոնականում, ինչը քննադատական վերաբերմունք է առաջացրել ընդդիմության որոշ ներկայացուցիչների մոտ:   

«Ավագանու անդամ դառնալը զուտ միջոց է աշխատանք անելու, համագործակցելու քաղաքապետարանի հետ»,-panorama.am-ի լրագրողի հետ զրուցում մեկնաբանելով վերոնշյալը`ասաց նա ու հավելեց, թե  անկուսակցական է և իր վերաբերյալ քաղաքական մեկնաբանությունները ճիշտ չի համարում

«Ես ցուցակում կամ որպես անկուսակցական»,-ասաց նա ու մանրամասնեց, որ իր  հիմնական թեզը, որով առաջնորդվում է, այն է`   օգտակար լինել թիմային աշխատանքի մեջ, եթե կարող է:

Մեր զրուցակիցը նշեց, որ նա պատասխանատվություն է զգում մայրաքաղաքի ապագայի համար ոչ միայն որպես հասարակ բնակիչ, այլ նաև որպես թանգարան-ինստիտուտի տնօրեն`հիշեցնելով, որ պատասխանատու է նաև Երևանի ամենամեծ կանաչ գոտու համար:

«Շատերը մոռանում են, որ Ծիծեռնակաբերդի 100 հեկտար տարածքը կցված է թանգարան-ինտիտուտին, այսիսնքն՝ իմ պատասխանատվության տակ է: Այս զբոսայգին 6 տարի շարունակ ես փորձել եմ պահել շինարարություններից և ծառահատումներից, շատերն են դա մոռանում: Եվ այս զբոսայգին 30 անգամ ավելի մեծ է, քան Մաշտոցի պուրակը», - ասաց նա:

«Մոտակա երկու տարիներին որտե՞ղ են լինելու խոշոր միջոցառումներ: Մայրաքաղաքում: Ցեղասպանության 100-ամյակի կապակցության միջոցառումների շրաջանակներում Ծիծեռնակաբերդի այգին ահռելի մեծ ծավալի աշխատանքներով վերածվելու է պարկային գոտու՝ հանգստի համար: Վերականգնվելու է կանաչ զանգվածը, հողեր առողջացման աշխատանքներ են տարվելու: 

Այս աշխատանքները կարելի է անել և որպես թանգարանի տնօրեն, բայց ավելի շահեկան ինձ համար կլինի, որ ես կարողանամ իմ աշխատանքի հետ, և ժամանակի ռեսուրսի առումով, և աշխատունակության, լինել աշխատանքային թիմի մեջ», - ասաց թանգարանի տնօրենը:

Եզրափակելով` նա կրկին նշեց, որ երբեք որևէ քաղաքական մեկնաբանություն իրեն թույլ չէր տվել.«Ես աշխատում եմ մի բան փոխել հօգուտ ընդհանուր շահերի: Դա իմ համար առաջնորդող ուղենիշի նման մի բան է, երբ ես կարող եմ ծառայել պետական շահի համար: Այդ առումով ես պատրաստ եմ համագործակցել և Հանրապետայան կուսակցության, և «Բարգավաճ Հայաստանի», Դաշնակցության կամ «Ժառանգության» հետ, որոնցից յուրաքանչյուրի մեջ ես ունեմ լավ ընկերներ և ոչ թե հակառակորդներ»: