Ձեր վստահելի աղբյուրը

Տուբերկուլոզի դեմ պայքարի համաշխարհային օրն այս տարի նշվում է «Կանգնեցնենք տուբերկուլոզը մեր կյանքի ընթացքում» կարգախոսով: Այն արտահայտում է տուբերկուլոզից ազատ աշխարհ և տուբերկուլոզից զրո մահվան դեպք ունենալու գաղափարը:

Ամեն տարի 1.6 միլիոն մարդ է մահանում տուբերկուլոզից, որոնց մեծամասնությունը զարգացող երկրների բնակիչներ են: Ամբողջ աշխարհում 1/3-ը վարակված է տուբերկուլոզով: Չնայած տուբերկուլոզը բուժելի է, այն շարունակում է տարածվել` սպառնալով միլիոնավոր մարդկանց առողջությանը, տնտեսական և սոցիալական բարեկեցությանը: 2011թ-ին աշխարհում գրանցվել է տուբերկուլոզի մոտ 8.7 մլն նոր դեպք, իսկ 1,4 մլն մարդ մահացել է դրանից:

ՀՀ առողջապահության նախարարության «Տուբերկուլոզի դեմ պայքարի 2007-2015 թվականների ազգային ծրագրի» շրջանակներում իրականացված միջոցառումների արդյունքում` վերջին տարիներին Հայաստանում արձանագրվել է տուբերկուլոզի համաճարակաբանական իրավիճակի բարելավում: Տարեցտարի նվազող հիվանդացության ցուցանիշը 2012-ին կազմել է 37, իսկ մահացության ցուցանիշը` 2 (100000 բնակչի հաշվարկով):

2012 թվականին Հայաստանի Հանրապետությունում արձանագրվել է 1125 առաջնակի հիվանդ (2011 թվականին` 1247): Տղամարդկանց շրջանում հիվանդացության ցուցանիշը մոտ 3.3 անգամ բարձր է, քան կանանց, և 2012 թվականին կազմել է 58.2 (2011 թվականին` 57.6), իսկ կանանց շրջանում` 17.8 (2011-ին`19.9): Առաջնակի դեպքերից շուրջ 18%-ը հիվանդացել են արտերկրում:

Ազատազրկման վայրերում 2012 թվականի ընթացքում արձանագրվել է տուբերկուլոզի 24 դեպք, որից 9-ը առաջնակի թոքային, իսկ 22.2%-ը` մանրէազատող:

Նշենք նաև, հանրապետությունում տուբերկուլոզով հիվանդ երեխաների թիվն այսօր հանրապետությունում հասնում է 25-ի:

Panorama.am-ի թղթակցի հետ զրույցում ՀՀ առողջապահության նախարարության «Տուբերկուլոզի դեմ պայքարի ազգային գրասենյակ»-ի տնօրեն Արմեն Հայրապետյանը նշեց, որ 2010 թվականից Հայաստանի ողջ տարածքում իրականացվում է դեղորայքակայուն տուբերկուլոզով հիվանդների բուժման ծրագիր: «Ունենք նաև բուժման ելքերի բարձր տոկոս: 2012-ին բուժման բարեհաջող ելքը կազմել է 77 տոկոս, սակայն նախատեսվում է մինչև 2015-ը հասցնել 85% բարեհաջող ելքի»,- ասաց Ա.Հայրապետյանը: Նա միաժամանակ նշեց, որ 2013 թ-ի հունվարի 1-ի դրությամբ դեղորայքակայուն տուբերկուլոզով 275 հիվանդ գտնվում է բուժման մեջ:

Նրա խոսքերով` տուբերկուլոզի աճը կանգնեցնելու ուղղությամբ իրականացվում են մի շարք ծրագրեր, մասնավորապես, բուժումն իրականացվում է լաբորատոր նոր մեթոդների կիրառմամբ, տրամադրվում է սոցիալական աջակցություն հիվանդներին, որպեսզի խթան հանդիսանա բուժումը չընդհատելու և բուժման բարեհաջող ելք ունենալու համար:

Ա.Հայրապետյանը նշեց, որ բնակչությանը տուբերկուլոզի մասին տեղեկացնելու և տուբերկուլոզի դեմ պայքարն առավել համախմբված ու արդյունավետ դարձնելու նպատակով կազմակերպվում են իրազեկման միջոցառումներ: «ԶԼՄ-ների դերը տուբերկուլոզի դեմ պայքարում կարևոր նշանակություն ունի, քանի որ նրանց միջոցով կարողանում ենք հասարակությանը հասցնել ճիշտ ինֆորմացիա: Եթե բնակչությունը իրազեկված լինի, ապա խնդիրների դեպքում ժամանակին կդիմի համապատասխան բուժհաստատություն»,- ասաց նա:

Ա. Հայյրապետյանը նշեց, որ թեև վերջին տարիներին Հայաստանում տուբերկուլոզով հիվանդների և մահացության ցուցանիշը նվազում է, իրազեկվածության մակարդակը զգալիորեն բարձրացել է, այդուհանդերձ կան մարդիկ, ովքեր հրաժարվում են բուժումից: Նրանց թիվն այդքան էլ մեծ չէ, իսկ բուժումից հրաժարվելու պատճառներն էլ բազմաթիվ են: «Օրինակ` վախենում են, որ բարեկամները, հարևանները կիմանան և կխուսափեն իրենց հետ շփվել: Սակայն պետք չէ դրանից ամաչել: Գրիպով հիվանդանալու դեպքում մենք չենք թաքցնում, որ հիվանդ ենք և միաժամանակ գիտակցում ենք, որ կարող ենք վարակել նաև շրջապատի մարդկանց: Այս դեպքում էլ պետք չէ ամաչել: Տուբերկուլոզը բուժելի հիվանդություն է, պարզապես պետք է ժամանակին դիմել բժշկի»,- նշեց Ա.Հայրապետյանը:

Նշենք, որ հանրապետությունում տուբերկուլոզով հիվանդների հայտնաբերումը, բուժումը և հետագա վերահսկումն իրականացվում է պետական պատվերի շրջանակներում և լիովին անվճար է: Ժամանակին և ճիշտ կազմակերպված բուժման դեպքում տուբերկուլոզը լիարժեք բուժվում է: Չբուժվելու դեպքում վարակիչ հիվանդը 1 տարվա ընթացքում վարակում է 10-15 մարդու /առաջին հերթին ընտանիքի անդամներին/, որոնց 10%-ը հետագայում հիվանդանում է տուբերկուլոզով: Չբուժված հիվանդների 50%-ը մահանում է առաջին 5 տարվա ընթացքում, 25%-ի մոտ կայուն իմուն համակարգի շնորհիվ տեղի է ունենում սպոնտան առողջացում, մնացած 25%-ի մոտ զարգանում է խրոնիկ տուբերկուլոզ:

Նախորդող հրապարակում` Վերջին տարիներին Հայաստանում տուբերկուլոզով հիվանդների և մահացության ցուցանիշը նվազում է 

Մարտի 24` Տուբերկուլյոզի դեմ պայքարի համաշխարհային օր 

Լուսանկարներն` այստեղ