Ձեր վստահելի աղբյուրը

Վեց տարի առաջ այս օրը մահացել է ՀՀ վարչապետ (2000 թ. մայիսի 12-ից մինչև մահը) Անդրանիկ Մարգարյանը: Այդ կապակցությամբ Կոմիտասի անվան պանթեոն ականավոր քաղաքական գործչի հիշատակին հարգանգի տուրք մատուցելու էին եկել ՀՀ նախագահ Սերժ Սարգսյանը, վարչապետ Տիգրան Սարգսյանը, ԱԺ նախագահ Հովիկ Աբրահամյանը, Անդրանիկ Մարգարյանի որդի` Երևանի քաղաքապետ Տարոն Մարգարյանը, մի շարք քաղաքական և հասարակական գործիչներ:

Անդրանիկ Մարգարյանի գլխավորած կառավարության կազմում Ֆինանսների և էկոնոմիկայի նախարարի պաշտոնը զբաղեցրած Վարդան Խաչատրյանը panorama.am- ի հետ զրույցում նշեց, որ Անդրանիկ Մարգարյանը ՀՀ նորանկախ պատմության ամենաականավոր պետական գործիչներից մեկն է:

«Անդրանիկ Մարգարյանը ինձ համար հարապետության վարչապետն է և դրանով իսկ ամեն ինչ ասված է»,- նշեց Վարդան Խաչատրյանը:

Այն հարցին թե ի՞նչ ունի սովորելու նոր սերունդը Անդրանիկ Մարգարյան քաղաքական և պետական գործչից, Վարդան Խաչատրյանը նշեց. «Անդրանիկ Մարգարյանի ողջ կենսագրությունը ենթակա է ուսուցման: Անդրանիկ Մարգարյանը ազգասեր չի դարձել հեղափոխությունից հետո: Նա ի ծնե այդպիսին էր: Անդրանիկ Մարգարյանը հենց այն անձնավորության էր որից նոր սերունդը սովորելու շատ բան ունի»,- նշեց Վարդան Խաչատրյանը:

Իր հերթին Անդրանիկ Մարգարյանի գլխավորած կառավարության կազմում արդարադատության նախարարի պաշտոնը զբացրած, ներկայումս ԱԺ պետաիրավական հանձնաժողովի նախագահ Դավիթ Հարությունյանը նշեց, որ Անդրանիկ Մարգարյանի դերակատարումը հայոց պետականության կայացման գործում մենք ի վիճակի կլինենք արժանավույն գնահատել միայն տարիներ հետո:

«Այն ժամանակ հետադարձ հայացք նետելով մենք կկարողանանք հասկանալ, թե ինչպիսի կարևորագույն խնդիրներ նա կարողացավ լուծել և ինչպիսի դժվար իրավիճակներում է կարողացել գտնել, երբեմն թերևս, միակ ճիշտ որոշումը: Ինչ վերաբերում է իր հետ աշխատանքի տարիներին, պետք է նշեմ, որ թեև մենք բազմիցս վիճել ենք տարբեր հարցերի շուրջ, ունեցել ենք տարբեր մոտեցումներ, բայց Անդրանիկ Մարգարյանը այդ առումով զարմանալի ճկուն մարդ էր: Նա փորձում էր միշտ հասնել նրան, որ կամ դու իրեն համոզես, կամ նա քեզ համոզի: Ի պատիվ իրեն պետք է նշեմ, որ նա բացարձակապես չէր վախենում ընդունել, որ սխալ մոտեցում էր ցուցաբերել մինչ այդ, ճիշտ պահին կանգ առնել և գտնել տվյալ պահին ամենաճիշտ որոշումը: Սա խոսում է մարդու ոչ միայն ուղեղի ճկունության, այլ նաև լայնախոհ լինելու մասին: Ես իսկապես ցավում եմ, որ մենք կորցրեցինք այսպիսի քաղաքական գործչի, որի կարիքը հատկապես այսօր մենք շատ ունենք»,- նշեց Դավիթ Հարությունյանը:

Անդրանիկ Մարգարյանը ծնվել է 1951 թ.-ի հունիսի 12 Երևանում: 1967-1972 թ սովորել է Երևանի պոլիտեխնիկական ինստիտուտի տեխնիկական կիբեռնետիկայի ֆակուլտետում` ստանալով հաշվիչ մեքենաների ինժեների որակավորում:

Անդրանիկ Մարգարյանը 1972-74 թթ. աշխատել է Գազի արդյունաբերության համամիութենական գիտահետազոտական ինստիտուտի Երևանի մասնաճյուղում` որպես գիտաշխատող, ավագ ինժեներ: 1977-78 թթ. Հայաստանի էներգետիկայի գիտահետազոտական ինստիտուտում գլխավոր ինժեներ է եղել:

1990-94 թթ.աշխատել է Հատուկ ծրագրերի պետական վարչությունում` որպես ինֆորմացիայի բաժնի ղեկավար: 1994-95 թթ. Հայաստանի պետական ճարտարագիտական համալսարանում` որպես կրտսեր գիտաշխատող:

1995-1999թթ. Ազգային ժողովի առաջին գումարման պատգամավոր էր:

1999 թ.-ին Ա. Մարգարյանը դարձյալ ընտրվել է ԱԺ պատգամավոր, եղել մեծամասնություն կազմած «Միասնություն» խմբակցության ղեկավարը, իսկ 2000-2007 թթ. ՀՀ վարչապետ: 2007 թ. մարտի 25-ին հանկարծամահ է եղել` սրտի կաթվածից:

Քաղաքականությամբ զբաղվել է 1965 թ - ից: 1968 թ-ից եղել է խորհրդային տարիներին ընդհատակյա գործող Ազգային Միացյալ Կուսակցության անդամ, 1973 թ.-ից` ԱՄԿ խորհրդի անդամ: Հանդես է եկել խորհրդային տոտալիտար համակարգի քննադատությամբ, Հայ դատի պաշտպանության դիրքերից և հայ ժողովրդի ապագան տեսել ժողովրդավարական, անկախ պետության առկայության պայմաններում: Իր գաղափարների տարածման և ծավալած գործունեության համար 1974-ին ձերբակալվել է և դատապարտվել երկու տարվա ազատազրկման:

1992 թ-ից Հայաստանի Հանրապետական կուսակցության (ՀՀԿ) անդամ էր, 1993-1997 և 1998-2005 թթ.` ՀՀԿ խորհրդի նախագահ: 1997-98 թթ. եղել է ՀՀԿ նախագահ, 2005թ-ին դարձյալ ընտրվել է ՀՀԿ նախագահ:

1998 թ-ից Երկրապահ կամավորականների միության (ԵԿՄ) անդամ էր, այնուհետև` ԵԿՄ վարչության անդամ:

Հայաստանի Հանրապետության անկախության հռչակման 15-րդ տարեդարձի կապակցությամբ, պետականության կայացման և տնտեսության զարգացման գործում ներդրած մեծ ավանդի համար ՀՀ նախագահի հրամանագրով պարգևատրվել է Սուրբ Մեսրոպ Մաշտոցի շքանշանով:

Պարգևատրվել է նաև ՀՀ ՊՆ «Վ. Սարգսյան», «Գ. Նժդեհ» մեդալներով, ԵԿՄ «Վ. Սարգսյան» շքանշանով, ՀՀ Ոստիկանության «Արամ Մանուկյան» մեդալով, Ֆ. Նանսենի հիմնադրամի «Ֆ. Նանսեն» մեդալով: