Ձեր վստահելի աղբյուրը

«Քաղաքացիական դիրքորոշում» ՀԿ-ի նախագահ Գևորգ Դոստուրյանի նախաձեռնությամբ այսօր կրկին բողոքի ակցիա էին կազմակերպել տաքսու վարորդները: Տաքսիստները չեն ցանկանում հրաժարվել դեղին համարանիշներից՝ պատճառաբանելով, որ դա անհավասար դաշտ կստեղծի տաքսու վարորդների համար: Օրինական գործող տաքսիստներն ասում են, որ իրենք 5-6 տարի է հարկեր են վճարել, իսկ անօրինական դաշտում գործող տաքսիները խուսափել են հարկեր վճարելուց և նոր կարգի համաձայն՝ նրանք հանդես են գալիս շահողի կարգավիճակում: Բացի այդ, վարորդները կարծում են, որ դեղին պետհամարանիշը վստահություն է ներշնչում հաճախորդին, իսկ սպիտակի դեպքում գուցե պատվիրատուների թիվը նվազի:

Հիշեցնենք, որ «Օրենսդրության կարգավորման ազգային կենտրոն»-ի կողմից ներկայացվել է տաքսի ծառայության ոլորտին վերաբերող օրենսդրական նախաձեռնություն, ըստ որի՝ առաջարկվում է տաքսիների դեղին համարնիշները փոխարինել ինքնակպչուն կտրոններով, ինչպես նաև վերացնել բուժզննման և տեխզննման գործառույթները: Այս առաջարկությունները տաքսու վարորդների շրջանում առաջացրել են դժգոհություններ:

Տաքսիստների հետ հանդիպեց ՀՀ տրանսպորտի և կապի նախարար Գագիկ Բեգլարյանը: Նախարարի խոսքերով՝ ընդունվել է մի օրենք, որը պարտաճանաչ վարորդներին ազատում է մի շարք վճարներից, ինչի արդյունքում նրանք գումարներ կտնտեսեն:

«Ես միշտ էլ ասել եմ, որ դեղին համարանիշներով տաքսու վարորդները համարվում են հանրապետության ամենապարտաճանաչ հարկատուները: Նրանք օրենքով աշխատում են: Ուստի հիմա փորձում ենք օրինական դաշտում գործող վարորդներին օգնել, լուծել նրանց խնդիրները»,- վարորդների հետ հանդիպման ժամանակ ասաց նախարարը:

Բեգլարյանը նշեց, որ ամիսներ առաջ ինքը հանդիպել է տաքսու վարորդներին, ովքեր բողոքել էին, որ դեղին համարների պատճառով չեն կարողանում իրենց իսկ սեփական մեքենան այլ նպատակների համար օգտագործել, մասնավորապես, չեն կարողանում կնունք, ծնունդ, հարսանիք և, ամենակարևորը՝ «աղջիկ ուզելու» գնան: «Հիմա մենք այդ խնդիրներին լուծում ենք տալիս, ձեր հոգսը թեթևացնում ենք, բայց դուք էլի բողոքում ե՞ք»,- տարակուսեց Գ.Բեգլարյանը:

Տաքսու վարորդ Վիկտորը դիմելով նախարարին՝ ասաց, որ ինքը 4 տարի հարկեր է մուծում, իսկ սպիտակ համարներով վարորդները խուսափել են դրանից: «Հիմա հավասարություն ենք ուզում, հարկերի թեթևացում և դեղին համարների պահպանում»,- ասացին վարորդները:

Գ.Բեգլարյանը նշեց, որ եթե վերացնում են դեղին համարները՝ նշանակում է, որ անհավասար դաշտ այլևս չի լինելու: «Ես ընդունում եմ, որ դուք չորս տարի գործել եք անհավասար դաշտում: Հիմա բոլորը լինելու են նույն դաշտում»,- ասաց նախարարը:

Լրագրողների հետ զրույցում Գագիկ Բեգլարյանը նշեց, որ նոր կարգը ի օգուտ վարորդների է: Ըստ նրա՝ իրենք առաջարկում են դեղին համարանիշի համար 17 հազար դրամ այլևս չվճարել, իսկ դրանց փոխարեն տրանսպորտի նախարարությունը տաքսիստներին անվճար տրամադրելու է ինքնակպչուն կտրոն:

Բացի այդ, ինչպես նշեց նախարարը, հանվելու է ամենօրյա բուժզննման և տեխզննման պահանջը: «Վարորդներն այլևս ավելորդ գումարներ չեն վճարելու: Եթե մինչև հիմա բուժզննման համար վճարում էին 5 հազար դրամ, իսկ հաշվապահական թղթերի դիմաց՝ 10 հազար դրամ, հիմա կվճարեն ընդամենը 12 հազար դրամ պետական հարկ՝ ամիսը կամ երեք ամիսը մեկ անգամ, և հեշտությամբ կաշխատեն այս դաշտում»,- նշեց նա՝ հավելելով, որ իրականում տաքսու վարորդներն ամբողջությամբ տեղյակ չեն օրենքի նախագծից, ուստի նրանց մոտ կա որոշ մտավախություն:

Ըստ Գ.Բեգլարյանի՝ այս ակցիաները կազմակերպվում են որոշ ՀԿ-ների կողմից, որոնք աշխատում են տաքսի վարորդների հաշվին: «Երբ զրուցում ես վարորդների հետ, նրանք հասկանում են և շնորհակալ են: Մնացածը շոու է: Այն վարորդները, ովքեր օրենքին չեն տիրապատում, նրանց հաշվին ՀԿ-ների ղեկավարները փորձում են գումարներ աշխատել»,- նկատեց նա:

Հարցին, թե ՀՀ կառավարությունը ինչո՞ւ 6 տարի առաջ տաքսիստներից պահանջեց դեղին համանիշներ հանել և այսօր էլ այլ պահանջներ է ներկայացնում, Գ.Բեգլարյանը նշեց, որ յուրաքանչյուր օրենքի թերությունը նկատվում է այն ժամանակ, երբ սկսում է այն գործել:

Պատասխանելով հարցին, թե տաքսիստները մտահոգություն ունեն, որ այս քայլերով փորձ է արվում իրենց «խոշորոցանել», մասնավորապես, խոսակցություններ կան, որ որոշ մարդիկ ցանկություն ունեն խոշոր տաքսապարկեր բացել, Գ.Բեգլարյանը նշեց. «100 տոկոս նման բան չկա: Այսօր Հայաստանում բազմաթիվ մարդիկ իրենց սեփական մեքենայով աշխատում են և պետությունը դեմ կլինի, որ մեկը դառնա մոնոպոլ»: Նախարարը հերքեց նաև շրջանառվող լուրերը, թե ինքը նպատակ ունի նման տաքսապարկեր բացել: «Այս փոփոխությունները կատարվել են ՀՀ նախագահի հանձնարարությամբ, չեմ պատկերացնում, որ պետությունը չի ուզենա այս փոփոխությունները ի օգուտ վարորդների լինի: Ինձ թվում է այսօրվանից վարորդները մեզ կվստահեն»,- ընդգծեց նախարար:

Նախարարի հետ հանդիպումից հետո վարորդներն ասացին, որ  նախարարի խոսքերը վստահություն են ներշնչում: «Հիմա ուզում եմ հավատալ, որ այդ որոշումը ի օգուտ մեզ է, բայց որքանո՞վ վստահ լինենք, որ հետագայում այլ որոշումներ չեն ընդունի»,- ասաց Մնացական Ղազարյանը՝ հավելելով, որ ընդունում է՝ նոր պայմանները նախորդից լավն են:

Վարորդներից մեկն էլ Գ.Բեգլարյանին ասաց՝ ի՞նչ անեն, որ նոր կառավարության ձևավորումից հետո նախարարը շարունակի պաշտոնավարել, նախարարն էլ պատասխանեց. «Ես նախարարի աթոռը տնից չեմ բերել: Այս երկրում կարևորը օրենքներն ու որոշումներն են: Մենք հասցնում ենք ընդունել, իսկ դուք էլ վայելեք: Ես այնտեղ կլինեմ, թե չեմ լինի, դա այնքան էլ կարևոր չէ»:


Լուսանկարներն` այստեղ