Ձեր վստահելի աղբյուրը

 ԱԻՄ առաջնորդ, ՀՀ նախագահի նախկին թեկնածու Պարույր Հայրիկյանի բուժումը արտերկրում իրականացնելու նպատակով ՀՀ կառավարության այսօրվա որոշմամբ ՀՀ առողջապահության նախարարությանը կտրամադրվի 20 մլն 500 հազ. դրամ`կառավարության պահուստային ֆոնդի հաշվին:
Կառավարության այս որոշումն իսկական շոկ էր լրատվամիջոցների ու հասարակության լայն զանգվածի համար: Թե ինչպես կարձագանքեր հայրենի կառավարության առատաձեռնությանը ինքը Հայրիկյնաը՝ մեզ չհաջողվեց պարզել, հեռախոսն անջատված էր, իսկ մերձավորներն ասացին, թե երկրում չէ, մեկնել է Հոլանդիա:
Այդուհանդերձ փորձեցինք պարզաբանում ստանալ Հայրիկյանի մտերիմ ընկերոջից՝ Կարո Եղնուկյանից՝ ի վերջո ինչո՞ւ կամ ի՞նչ հաշվարկներով է այդքան արժեցել Պարույր Հայրիկյանի առեղծվածային վիրահատությունը, ինչու այն չի կարող իրականացվել մեր երկրում, և վերջապես ինչու ուսի հատվածում կրակոցից ստացած մարմնական վնասվածքի հետևանքներն այդան խոր ազդեցություն ունեցան ոչ միայն Հայրիկյանի, այլև պետական բյուջեի վրա:

Կարո Եղնուկյանը միչև խնդրի բուն նկարագիրը ներկայացնելը` շտապեց կարծիք հայտնել լրատվամիջոցների ու սոցցացներում հասարակության բուռն արձագանքի վերաբերյալ՝ ասելով, թե իրականությունն իսկապես սոսկալի է և Հայրիկյանի առողջական վիճակն ամենևին էլ ուռճացված պատմություն չէ.

«Մուսկուլների ներվերի նկար, եթե տեսել եք երբևէ, կհիշեք՝ ներվերի հանգույցը ուսից սկսում` իջնում է դեպի մատները. այդ հանգույցի միջով է անցել փամփուշտը: Ասում են` Հայրիկյանը վիրավորվել է ուսից կամ այդ 50.000 դոլարը պետությունը հատկացրել է Հայրիկյանի ուսի համար: Ոչ ոչ, դա այդպես չէ, փաստորեն, եթե նկարագրելու լինեմ, ապա` փամփուշտը կրծքից մտել է մարմնի մեջ, անցել է այդ հանգույցի ճանապարհով, վիրավորել հանգույցի նյարդերը, ինչպես ժողովրդի լեզվով են ասում՝ գնդակը ներվերը իրար է խառնել: Գնդակի պատճառով դրանք սեղմվել, ճզմվել են և վիրահատությունն այդ մասում պիտի արվի: Դա բավականին նուրբ մասնագիտական վիրահատություն է և միայն Հոլանդիայի մասնագետները կարող էին դա հանձն առանել»,- այսպես հանգամանորեն ընկերոջ մարմնում փամփուշտի մխրճվելն ու հետևանքը նկարագրեց Եղնուկյանը և բացատրեց, թե ինչ կարող էր լինել Հայրիկյանի հետ, եթե կառավարությունը չկարևորեր և չհատկացներ այդ գումարը.

«Եթե չլիներ այս աջակցությունը, պիտի երևի թե, որոշ ֆոնդերից հանգանակություն հավաքեինք, որովհետև Հայրիկյանը չուներ այդ գումարները: Իսկ եթե նա չվիրահատվեր, ապա անդամալույծ կդառնար, նա արդեն չէր կարողանում օգտագործել իր աջ ձեռքը:

Կարո Եղնուկյանի խոսքով` Հայրիկյանը գումար չի պահանջել և դավադրություն որակեց այս մասին խոսակցությունները: Ըստ նրա` գումարի չափը որոշելու համար Պարույր Հայրիկյանի միջնորդութունն ավելորդ էր, քանի որ միջադեպից անմիջապես հետո Առողջապահության նախարարությունը կամովի հանձն է առել նրա ապաքինման և հետագա բուժսպասարկման ողջ ծախսերը:

Փաստորեն` սա ավելի շուտ հայրենի կառավարության բարի կամքի դրսևորո՞ւմ է ու ոչ քաղաքական դրդապատճառներով նրա պահանջի կատարո՞ւմ, ինչպես եզրակացնում են մեր համաքաղաքացիները:

-Ում հայեցողությամբ է պարոն Հայրիկյանը բժշկվելու արտերկրում և, մասնավորապես, որ երկրի որ բժշկական կենտրոնին է վստահվել Հայրիկյանի՝ այդքան բարդ վիրահատությունը:
-Մեկ ամիս է արդեն, որ խոսվում է այս մասին. այդ ընթացքում ուսումնասիրվում էր տարբեր երկրների տարբեր բուժհաստատությունների փորձն ու հնարավորություները:
Առողջապահության նախարարության ղեկավարությամբ ուսումնասիրվել է ԱՄՆ-ի, Ֆրանսիայի, Գերմանիայի, Իսրայելի և Հոլանդիայի բժշկական մի շարք կենտրոնների փորձը և որոշվել, որ վիրահատությունը պիտի անցկացվի Հոլանդիայում:

-Ե՞րբ է որոշվել:
-Երեկ չէ առաջի օրը որոշվեց և այս առավոտ նա մեկնեց Հոլանդիա՝ տիկնոջ ուղեկցությամբ:
Հայրիկյանը գումարի չափի մասին տեղեկություն չունի, նա միայն գիտի, որ նախարարությունն իր վրա է վերցնում առողջացման ծախսերը:Գումարի տեսանկյունից նա ոչինչ չգիտի, վստահեցնում եմ: Հայրիկյանին գումար չի տրվել և չի էլ տրվելու, այն փոխանցվելու է բժշկական կենտրոնին:

-Ո՞ր բժկական կենտրոնի մասին է խոսքը:
-Ես չգիտեմ, ճիշտն ասած, սպասում եմ Հայրիկյանը գնա տեղավորվի, որ զանգենք` իմանանք:
Գիտեմ միայն, որ նրանք դեռ պիտի հետազոտեին Հայրիկյանին, ապա նոր միայն որոշեին, երբ վիրահատեին և ինչ կուրսեր պիտի անցնի:

-Կարծիք կա, որ իրականում խնդիրը մեծ չէ և ավելի շատ ուռճացվում է թե միջադեպի պատմությունը և թե դրան հետևող առողջական և վիրահատութան հետ կապված և ծախսերի այս ողջ պատմությունը` ինչ ինչ նկատառումներից ելնելով: Ինչո՞ւ է այսպիսի կարծիք ձևավորվել:
-Տեսնում եմ` կառավարության այս որոշումը ինչ աղմուկ է բարզրացրել սոցիալական կայքերում, անհարմար է: Դժբախտաբար լրատվամիջոցներն էլ …Կրկնում եմ խնդիրը լուրջ է, նյարդային համակարգի վիրահատության մասին է խոսքը:
Սա մասնագիտական հարց է, սա քմահաճույքի հարց չէ, որ համարեք, թե Հայրիկյանն է որոշել ու պնդել՝ չէ ես այստեղ չեմ ուզում, կամ Փարիզ չեմ ուզում գնալ, և պիտի գնամ մեկ այլ երկրում բուժվեմ:

Հայաստանում չեն կարող բուժել, քանի որ ոչ տեխնիկա ունեն, ոչ էլ համապատասխան բժիշկ, ով կբուժեր պարոն Հայրիկյանի նյարդային համակարգը: Թերևս միակ տարբերակը արտերկրում բուժվելն էր, որը պիտի իրականացվի վիրահատական միջամտությամբ:

-Այսքան ժամանակ մեր երկրում միայն Հայրիկյա՞նն այդ խնդիրն ունեցավ: Քանի՞ զինվոր է վիրավորվել փամփուշտից, այդքան ծանր դեպքեր են եղել սահմանին, ինչո՞վ է այս դեպքն առանձնահատուկ, որ Կառավարության նման հոգածությանն է արժանանում:
- Այո, Կարմիր խաչի հիվանդանոցում որտեղ և Հայրիկայնը պառկած էր, իրենք բազմաթիվ անգամ են նույն  վնասվածքը ստացած զինվորներին ուղարկել Իսրայել՝ մասնագիտացված քույր կլինիկա:

-Ասացիք որպես կանոն նույն խնդրով զինվորներին ու քաղաքացիներին ուղեգրել են Իսրայել: Ուրեմն` ինչո՞ւ Հայրիկյանին էլ Կարմիր խաչը չուղեգրեց նույ քույր կլինիկան:

-Առողջապահության նախարարությունը գտավ, որ Հայրիկյանի պարագայում Հոլանդիան ավելի նախընտրելի է, քան Իսրաելը:

-Ժամանակին նույն կերպ կամ ավելի դաժան հանգամանքներում ԱԺ-ում տեղի ունեցած ահաբեկչության ժամանակ կրակոցից վիրավորվեց նաև ԱԺ պատգամավոր Անդրանիկ Մանուկյանը և, եթե չեմ սխալվում, այն ժամանակ պատգամավոր բուժման ծախսը պետությունն իր վրա վերցրեց` մասնակիորեն: Կառավարության այսօր դրսևորած վերաբերմունքի հիմքում,  ըստ Ձեզ, քաղաքականությո՞ւնն է եղել, թե բարի կամքի դրսևորում է սա ընդամենը:
- Ես չգիտեմ ինչ է եղել հոկտեմբերի 27-ից հետո, ինչ է այն ժամանակ կառավարությունը որոշել Անդրանիկ Մանուկյանի պարագայում... այդպես պետք է լիներ իրականում: Բայց ես չէի ցանկանա, որ Հայրիկյանի առողջացման համար հատկացված գումարը դառնար խոսակցության թեմա. դավադրություն է սա: Հայրիկյանին որևէ մեկը փող չի տվել: