Ձեր վստահելի աղբյուրը

Քիչ հավանական է, որ այս տարի Հայաստանն ու Ադրբեջանը համաձայնության հասնեն Լեռնային Ղարաբաղի հակամարտության կարգավորման հարցում, իսկ տարածաշրջանում պատերազմի վտանգը նախկինի պես առկա է: Այս մասին «Ռոյթերս» գործակալությանը տված հարզազրույցում հայտարարել է Լեռնային Ղարաբաղի Հանրապետության վարչապետ Արայիկ Հարությունյանը:

«Եթե տարին ավարտվի խաղաղ, ապա դա դրական կարելի է համարել, սակայն լավատեսություն չունեմ այս տարի հակամարտությունը կարգավորելու հարցում», - ասել է վարչապետը, ով Փարիզում մասնակցում է ֆրանսահայ ներդրողների հետ հանդիպմանը:

Գործակալությունը հիշեցնում է, որ Ադրբեջանը պարբերաբար սպառնում է ուժով վերցնել վիճարկվող տարածքները, և միևնույն ժամանակ խոսում է դիվանագիտական ճանապարհով խնդիրը լուծելու պատրաստակամության մասին:
Նշվում է, թե Հայաստանը անվտանգության վերաբերյալ համաձայնագիր ունի Ռուսաստանի հետ, մինչդեռ Ադրբեջանը` Թուրքիայի:

«Թե Ղարաբաղը, թե Ադրբեջանը չեն շահի պատերազմից, կարծում եմ` կողմերից որևը մեկը չի կարողանա լիակատար հաղթանակ ապահովել, բայց չենք կարող բացառել դա», - ասել է վարչապետը:

Հարությունյանը վերահաստատել է Արցախի դիրքորոշումն առ այն, որ իրենք առաջինը չեն հարվածելու, չնայած իշխանությունները, ինչպես և Ադրբեջանը, մեծացրել է զենքի ներմուծման ծավալները` սեփական պաշտպանությունն ապահովելու նպատակով:

«Կարծում եմ նոր պատերազմը մեծամասշտաբ հումանիտար ճգնաժամի կհանգեցնի և չափազանց արյունոտ կլինի», - ասել է Արցախի վարչապետը, հավելելով, թե վերջին տարիներին գրանցված սպառազինությունների մրցավազքի պայմաններում կորուստները շատ ավելին կլինեն:

Գործակալությունը տեղեկացնում է Հայաստանի և Ադրբեջանի միջև ԵԱՀԿ Մինսկի խմբի շրջանակներում ընթացիկ բանակցությունների մասին, որոնք մինչ օրս արդյունք չեն արձանագրել, և հույս հայտնում, որ Հայաստանի նախագահ Սերժ Սարգսյանի վերընտրումը կարող է նոր լիցք հաղորդել հակամարտության կարգավորմանը: Վկայակոչվում է նաև նախագահ Սարգսյանի խոսքերն ադրբեջանական կողմի հսկայական սպառազինության կուտակման և պատերազմը վերսկսելու պատրաստություն տեսնելու վերաբերյալ: Մինչդեռ Հայաստանի նպատակն է բանակցային գործընթացի շարունակությունը:

Արցախի վարչապետը զրույցում ասել է, թե հասարակական կարծիքը թե՛ Հայաստանում, թե՛ Ադրբեջանում ևս պատրաստ չէ ընկալելու փոխզիջումը, ինչն ավելի է բարդացնում նախագահների վիճակը` հանգուցալուծման որևէ տարբերակ ընդունելիս: