Հայրապետյան. «Պատրաստվում ենք հայտ ներկայացնել ՈՒԵՖԱ»
2009 թ. դեկտեմբերին մեր թղթակիցը բացառիկ հարցազրույց անցկացրեց Հայաստանի ֆուտբոլի ֆեդերացիայի նախագահ Ռուբեն Հայրապետյանի հետ` խոսելով հայաստանյան ֆուտբոլային կյանքի, հավաքականների ու մարզաձևի զարգացման խնդիրների մասին: Այն ժամանակ, քանի դեռ ակտիվորեն քննարկվում էին Հայաստան-Թուրքիա հարաբերությունների և դրանց վրա երկու երկրների ֆուտբոլային հավաքականների ընտրական հանդիպումների ազդեցության հարցերը, մեր թղթակիցը գաղափար էր առաջ քաշել. արդյոք Հայաստանի ֆուտբոլի ֆեդերացիան չի՞ կարող Թուրքիայի ֆեդերացիայի հետ համատեղ հայտ ներկայացնել ՈՒԵՖԱ` Եվրոպայի առաջնությունը անցկացնելու համար:
Ի՞նչ էր դա տալու Հայաստանին: Առաջին` խոշոր մրցաշարի անցկացումը երկրին հնարավորություն է տալիս եվրոպական մակարդակի հասցնել իր ենթակառուցվածքները: Երկրորդ` Հայաստան-Թուրքիա սահմանն ինքնըստինքյան կբացվեր` ապահովելու համար ֆուտբոլասերների ազատ տեղաշարժը մի երկրից մյուսը: Իսկ քանի որ ՈՒԵՖԱ-ն բարձր է գնահատում ֆուտբոլի դերը և աշխատում է մեծացնել նրա ազդեցությունը ժողովուրդների ու պետությունների հաշտեցման գործընթացում, կարելի էր ասել, որ մեր հայտը կարող էր լրացուցիչ առավելություն ունենալ եվրոպական ֆուտբոլային գերատեսչությունում: Մյուս կողմից` Թուրքիան դիմել էր ՈՒԵՖԱ-ին` կազմակերպելու «Եվրո-2016»-ը, սակայն զիջել էր Ֆրանսիայի հետ մրցակցությունում: Եվրոպայի 2020 թ. առաջնությունը կազմակերպելու նրա հայտը կարող էր լրացուցիչ կշիռ ունենալ` միանալով հայաստանյան հայտ հետ:
Ռուբեն Հայրապետյանի հետ հարցազրույցի այդ հատվածն այժմ ներկայացնում ենք մեր ընթերցողների ուշադրությանը:
- Ի դեպ, քաղաքականությունից կարելի է օգուտ քաղել, եթե, օրինակ, հիմք ընդունելով հայ-թուրքական հարաբերությունների գործընթացը, որի հանդեպ իր դրական վերաբերմունքը չի թաքցնում նաև ՈՒԵՖԱ-ն, Հայաստանը Թուրքիայի հետ միասին հանդես գա նախաձեռնությամբ` Եվրոպայի որևէ առաջնություն կազմակերպելու համար:
- Ցավոք, առաջիկա 20 տարվա ընթացքում մեր երկիրը պատրաստ չի լինի նման միջոցառման: Ենթադրենք` մարզադաշտ կառուցեցինք, որը նույնպես դժվար խնդիր է: Բայց օդանավակայանների, ճանապարհների, հյուրանոցների հարցում ինչպե՞ս կարող ենք համապատասխան մակարդակ ապահովել: Միանգամից ասեմ, որ պատկերացնեք. 300-400 հազար մարդ է ժամանելու Հայաստան: Որտե՞ղ ենք նրանց տեղավորելու: Ուկրաինան այսօր լուծում է մարզադաշտերի խնդիրը, սակայն դժվարությունների առջև է հայտնվել ենթակառուցվածքների բարելավման հարցում: Դոնեցկի «Շախտյորի» «Դոնբաս Արենա» մարզադաշտն այս պահին աշխարհում լավագույնն է: Բայց այնտեղ խաղեր չեն լինի, որովհետև պետությունն օդանավակայան չի կառուցել: Համապատասխան քանակով հիվանդանոցներ են պետք: Նման հզոր պետությունը չի կարողանում լուծել այդ խնդիրները, իսկ մենք նույնիսկ երազել չենք կարող: Հայաստանում ընդամենը 3100 հյուրանոցային համար ունենք: Ամենամեծ հյուրանոցը` «Արմենիա Մարիոթը», կարող է 400 մարդ տեղավորել: Այո, ես հայտ կներկայացնեմ, բայց միայն` ՈՒԵՖԱ-ի համաժողով կազմակերպելու նպատակով: Նույնիսկ ՖԻՖԱ-ի համաժողովը չենք կարող անցկացնել, որովհետև 2500-3000 մարդ է գալու, իսկ բոլորին պետք է տեղավորել 5 աստղանի հյուրանոցներում: Ենթադրենք` 500 մարդու կտեղավորենք «Արմենիայում», 500-ական էլ` «Երևան», «Գոլդեն Փելես», «Կոնգրես» հյուրանոցներում: Իսկ մյուսների՞ն… Պետության վրա հույս չենք կարող դնել հասկանալի պատճառներով: Մի մասն իր վրա պետք է վերցնի մասնավոր հատվածը, ինչպես արվել է Ուկրաինայում: Իշխանությունները գործարարներին հանձնարարեցին հյուրանոցներ կառուցել: Ռինատ Ախմետովը 5 աստղանի հյուրանոց է կառուցում` 600 տեղով, Օլեգ Մկրտչյանը` 520 տեղով 5 աստղանի հյուրանոց: Բայց պարզվում է` մասնավորը գործ է անում է, իսկ պետությունը` ոչ: Նույնիսկ Թուրքիայի պես պետությունը չի կարող հիմա մտածել մայրցամաքային խոշոր ֆուտբոլային միջոցառումներ անցկացնելու մասին…
Եվ ահա այսօր ՀՖՖ նախագահ Ռուբեն Հայրապետյանը ԶԼՄ-ների ներկայացուցիչների հետ հանդիպման ժամանակ հայտարարել է, որ Հայաստանը պատրաստվում է հայտ ներկայացնել ՈՒԵՖԱ` Եվրոպայի 2020 թ. առաջնության որոշ խաղեր մեր երկրում անցկացնելու նպատակով:
Հիշեցնենք, որ «Եվրո-2020»-ը, ըստ ՈՒԵՖԱ-ի գործադիր կոմիտեի որոշման, անցկացվելու է 13 երկրում:
«Անկեղծ ասած` ցանկանում էինք Չեխիայի հավաքականի հետ խաղն անցկացնել «Հանրապետական» մարզադաշտում` լի տրիբունաներով: «Հրազդանում» ազատ տեղեր շատ են լինում, սակայն այսուհետ նմանատիպ բոլոր հանդիպումները կանցկացվեն այնտեղ:
Ի դեպ, ՀՀ նախագահի հրամանով առաջիկա 5 տարվա ընթացքում «Հրազդան» մարզադաշտը պետք է վերակառուցել և դարձնել եվրոպական լավագույն արենաներից մեկը: Պատրաստվում ենք հայտ ներկայացնել ՈՒԵՖԱ` Եվրոպայի 2020 թ. առաջնության խաղեր անցկացնելու նպատակով»,- ասաց Հայրապետյանը:
Անշուշտ, մենք շատ ուրախ ենք, որ Հայաստանի ֆուտբոլային ֆեդերացիան վերջապես նախաձեռնություն կդրսևորի և կպայքարի մայրցամաքային մրցաշարի հանդիպումներ անցկացնելու համար: Բայց ուզում ենք նույն հարցը հղել ՀՖՖ նախագահ Ռուբեն Հայրապետյանին` իր իսկ ձևակերպումով:
«Ենթադրենք` մարզադաշտ կառուցեցինք, որը նույնպես դժվար խնդիր է: Բայց օդանավակայանների, ճանապարհների, հյուրանոցների հարցում ինչպե՞ս կարող ենք համապատասխան մակարդակ ապահովել…
Հայաստանում ընդամենը 3100 հյուրանոցային համար ունենք: Ամենամեծ հյուրանոցը` «Արմենիա Մարիոթը», կարող է 400 մարդ տեղավորել…
Նույնիսկ ՖԻՖԱ-ի համաժողովը չենք կարող անցկացնել, որովհետև 2500-3000 մարդ է գալու, իսկ բոլորին պետք է տեղավորել 5 աստղանի հյուրանոցներում: Ենթադրենք` 500 մարդու կտեղավորենք «Արմենիայում», 500-ական էլ` «Երևան», «Գոլդեն Փելես», «Կոնգրես» հյուրանոցներում: Իսկ մյուսների՞ն…»:
Լրահոս
Տեսանյութեր
ԱԺ նիստը մեկնարկեց մեկ րոպե լռությամբ՝ ի հիշատակ պատգամավոր Մհեր Սահակյանի
