«Հայաստանը կարող է տրամադրել ոչ թե արոտավայր, այլ` ոչխարների գլխաքանակ»
Իրաքի հետ նախնական պայմանավորվածություն է ձեռք բերվել Հայաստանում ոչխարի թվաքանակի ավելցուկն արաբական այդ երկրին վաճառելու վերաբերյալ: Այս մասին այսօրվա ասուլիսի ժամանակ հայտնեց ՀՀ Գյուղատնտեսության նախարարության Անասնաբուծության և անասնաբուժության վարչության պետ Աշոտ Հովհաննիսյանը, տեղեկացնելով, որ մեր երկրում ներկայումս ոչխարի թվաքանակի ավելցուկը կազմում է շուրջ 250 հազար գլուխ:
«Իրանում Իրաքի ներկայացուցիչների հետ հանդիպման ժամանակ նախնական պայմանավորվածություն է ձեռք բերվել Հայաստանից ոչխարի որոշ գլխաքանակ արտահանելու մասին», - ասաց նա, հավելելով, որ հարցը դեռ պետք է քննարկվի Գյուղատնտեսության նախարարությունում և այլ մակարդակներով:
Անդրադառնալով Սյունիքում Իրանի կողմից ոչխարների բուծման հնարավորությանը Աշոտ Հովհաննիսյանը հայտարարեց, որ սա զուտ նախնական պայմանավորվածություն է Սյունիքի մարզի և Իրանի Արևելյան Ադրբեջան նահանգների միջև:
«Սա զուտ հանդիպման ժամանակ ձեռք բերված նախնական պայմանավորվածություն է, որը պաշտոնական բնույթ չի կրում: Նման հարցը պետք է քննարկվի բարձր ատյաններում, և այսպիսի գործարքը այլ ձևով չի կարող իրականանալ: Գյուղատնտեսության նախարարությունը հակված է կարծելու, որ մենք, այո, կարող ենք Իրանի Իսլամական Հանրապետությանը տրամադրել ոչ թե արոտավայր, այլ գլխաքանակ, և Սյունիքում աճեցնել 50 հազար գլուխ ոչխար և դա վաճառենք Իրանին: Իսկ մեր արոտավայրերը պետք է լինեն մեր ֆերմերների համար», - ասաց վարչության պետը:
Ի պատասխան panorama.am-ի լրագրողի հարցին, թե այդ դեպքում ինչու՞ է Հայաստանում Իրանի դեսպանը հայտարարում, թե նման քայլով Թեհրանը ցանկանում է աջակցել մեր երկրում անասնապահության զարգացմանը, ՀՀ ԳՆ Անասնաբուծության և անասնաբուժության վարչության պետն ասաց.
«Ներկայումս մենք ունենք ոչխարհի թվաքանակի իրացման ավելցուկ, այն դեպքում, երբ մեր երկրում սպառման պահանջները 220-230 հազար են կազմում: Սակայն Իրանի Իսլամական Հանրապետությունը և ընդհանրապես` արաբական մի շարք երկրներ անսահմանափակ քանակությամբ ոչխար են ուզում գնել ոչ միայն Հայաստանից, այլ նաև` մեր հարևան Ադրբեջանից, Վրաստանից, քանի որ այդ երկրներում օգտագործվող մսի 70-80 տոկոսը ոչխարի միս է: Իրանը կարող է ավելացնել ոչխարի մսի ներկրման ծավալները, եթե մենք ունենանք համապատասխան առաջարկ, սակայն մեր հնարավորություները թույլ չեն տալիս անցնելու 250 հազարի սահմանագիծը»:
Ըստ բանախոսի, ընդհանուր առմամբ հետաքրքրությունը մեր երկրից ոչխարների արտահանման նկատմամբ մեծ է, քանի որ դրանց մեծ մասը հատուկ բուծված տեսակներ են և մեծապես մսի որակի վրա ազդում է նաև Հայաստանի էկոլոգիան:
Խոսելով ոչխարների թվաքանակի աճի դեպքում Սյունիքում բնապահպանական իրավիճակի հնարավոր փոփոխության մասին, Աշոտ Հովհաննիսյանը նշեց, որ այդ մարզում կա շուրջ 100 հազար հեկտար արոտավայր, որից միայն Սիսիանի շրջանում` 60 հազար, որի կեսը կարելի է օգտագործել անասունների գլխաքանակի` մինչև 150 հազարով ավելացման համար:
Նախորդող` «10 հազար զինված էթնիկ ադրբեջանցիներ կհաստատվեն Սյունիքում». արոտավայրերի վարձակալությանն է անդրադարձել «The Moscow Times»-ը
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
