Ձեր վստահելի աղբյուրը

Երևանի քաղաքապետ Տարոն Մարգարյանին մարտի 29-ին հանձնվել է քաղաքապետին առընթեր ճարտարապետական հանձնաժողովի խմբակային դիմումը Երևանի կենտրոնական ծածկած շուկայի ճակատագրի հանգուցալուծման վերաբերյալ:

Նամակում նշված է. «Մենք, քաղաքապետարանի ճարտարապետական հանձնաժողովի անդամներս, քաջատեղյակ ենք Մաշտոցի պողոտայի Ծածկած շուկայի խեղման հանդեպ քաղաքապետարանի և անձամբ Ձեր անհանդուրժողական դիրքորոշմանն ու նաև կիրառած վարչական պատժամիջոցներին: Սակայն շուկայի սեփականատիրոջ ցուցադրական անհնազանդությունը, օրինազանցության հարաճուն շարունակականությունը ու դրա հետ մեկտեղ հանրության զանգվածային բողոքարկումների հանդեպ պետական ատյանների թևաթափ կեցվածքը մտահոգիչ են ու անբացատրելի: Ճիշտ է, լիազոր բոլոր մարմինները կազմել են գործառույթը դատապարտող պատշաճ արձանագրություններ, սակայն դրանք բոլորն ի վերջո խորհուրդներ են միայն և ոչ պարտադրանք: Տպավորությունն այնպիսին է կարծես սեփականատերը ապահովագրված է անպատժելիության զորավոր մուրհակով:

Մինչդեռ զավեշտալի այս ներկայացմանը վերջակետ դնելու համար գոյություն ունի օրենսդրական հստակ ճանապարհ: Այն է` Երևանի Մաշտոցի պողոտայում գտնվող ու որպես հանրապետական նշանակության պատմաճարտարապետական հուշարձան պետության պահպանության տակ վերցված Կենտրոնական ծածկած շուկայի հետ կատարվածը որակավորել որպես մշակութային վանդալիզմ, իսկ սեփականատիրոջ նկատմամբ հարուցել դատական գործ` ՀՀ քրեական օրենսգրքի 264-րդ հոդվածի հիմքերով, պահանջելով նրանից հուշարձանին հասցված վնասի հատուցում ու զրկելով նրան գուքի նկատմամբ սեփականության իր իրավունքից: Այնուհետև Մաշտոցի պողոտայի Ծածկած Շուկան ազգայնացնել ու վերադարձնել Երևանի համայնքին»,- Երևանի քաղաքապետին առընթեր ճարտարապետական հանձնաժողովի` քաղաքապետ Տարոն Մարգարյանին ուղղված խմբակային դիմում հենց այս օրենսդրական ճանապարհն է առաջարկվում Փակ շուկան փրկելու համար:

Սա միակ օրինական ելքն է ստեղծված իրավիճակից արժանապատվությամբ դուրս գալու համար: Եվ քանի որ երևույթի հանդեպ ըմբոստացողը հանրությունն է, ապա և քրեական գործը, բնականաբար, պետք է հարուցի հանրային շահերը ներկայացնող ատյանը` քաղաքապետարանը: Սա ոչ միային մեր, հանձնաժողովի անդամների, այլև մտահոգ ողջ հանրության պահանջն է, ուղղված պետական ատյաններին, այդ թվում Երևանի քաղաքապետարանին:

Հարգանքով ու հստակ գործողությունների ձեռնարկման ակնկալիքով,
Հանձնաժողովի անդամներ` Մկրտիչ Մինասյան, Լևոն Ղալումյան, Ալբերտ Զուրաբյան, Գուրգեն Մուշեղյան, Սաշուր Քալաշյան, Ասլան Մխիթարյան, Լևոն Վարդանյան, Աշոտ Ալեքսանյան, Սարգիս Սարդարյան, Ալեքսանդր Բադալյան, Կարո Այվազյան, Արսեն Առուստամյան, Գագիկ Հովհաննիսյան, Հարրի Ռաշիդյան, Հրաչյա Վարդանյան»:

Նշենք, որ նամակը վերցրել ենք Ճարտարապետների միության ֆեյսբուքյան էջից:

Նախորդող նորություններ` Փակ շուկա. Հրապարակում ենք մշակույթի նախարարության գիտամեթոդական խորհրդի մասնակիցների անունները

Մշակույթի նախարարություն. Ապամոնտաժել Փակ շուկայի նորակառույց ծավալի երկաթբետոնյա հիմնական հատվածն ընդունելի ծավալով

Ովքեր չեն ասում ու ովքեր են ասում ամբողջ ճշմարտությունը Փակ շուկայի մասին- մաս 2

Ովքեր չեն ասում ու ովքեր են ասում ամբողջ ճշմարտությունը Փակ շուկայի մասին- մաս 1

 Փակ շուկա… Մինչ նախագիծը քննարկվում է, «վանդալը բարբարոսաբար ոչնչացնում է հուշարձանը»