«Ենթադրելի է, որ ադրբեջանական կողմը մտադրվել է նախագահի երդմնակալության նախօրեին ապակայունացնել իրավիճակը»
Վերջին օրերին հայ-ադրբեջանական սահմանի մոտ հակառակորդի կողմից զինտեխնիկայի և հատուկ ստորաբաժանումների կուտակումներ է նկատվում: Այս և մի շարք հարցերի շուրջ Panorama.am-ը զրուցեց ռազմական փորձագետ Դավիթ Ջամալյանի հետ:
«Հայոց երկու պետությունների սահմանի այս կամ այն տեղամասում իրավիճակն ապակայունացնելու ադրբեջանական կողմի մտադրությունն ըստ էության արտառոց չէ, ավելին՝ միանգամայն կանխատեսելի է: Բազմիցս նշվել է, որ վերջին շրջանում թշնամու դիվերսիոն ակտիվության հիմքում եղել է ոչ թե ռազմական, այլ զուտ քաղաքական-քարոզչական նպատակահարմարություն: Եվ ահա այս համատեքստում կարևոր է բացահայտել այն նպատակը, որ հետապնդում է պաշտոնական Բաքուն պետական սահմանում իրավիճակը կտրուկ ապակայունացնելու ամեն կոնկրետ դեպքում: Տվյալ դեպքում նման մտադրությունը կարող է պայմանավորված լինել հետևյալ նպատակով:
Ենթադրելի է, որ ադրբեջանական կողմը մտադրվել է նախագահ Սարգսյանի երդմնակալությանն նախօրեին ապակայունացնելով իրավիճակը սահմանում՝ ներազդել հայաստանյան ներքաղաքական զարգացումների վրա:
Մասնավորապես իմանալով, որ մեզանում զինվորի մահը ցավոտ է ընկալվում՝ ադրբեջանական կողմը, ամենայն հավանականությամբ, մտադրվել է դիվերսիաների միջոցով հնարավորինս մեծ թվով զոհեր պատճառել մեզ, որպեսզի նախագահի երդմնակալության նախօրեին բնակչության մի մասի դժգոհություններին հաղորդվի հակաարցախյան երանգ, որպեսզի մեր հասարակության ընդգծված ընդդիմադիր շերտը անհանդուրժողականությամբ համակվի նաև երկրի պաշտպանությանն ուղված այն միջոցառումներին, որոնք հետևողականորեն իրականացնում է մեր երկրի նախագահը: Մասնավորապես միանգամայն հավանական է, որ պաշտոնական Բաքուն մտադրվել է մեր հայրենակիցների մի մասի մոտ առկա դժգոհությունները պրոյեկտել սահմանի պաշտպանության ամրապնդմանն ուղղված մեր նախագահի ձեռնարկումների վրա, որպեսզի այդ ձեռնարկումներն ընկալվեն ոչ թե որպես անհրաժեշտություն այլ՝ զոհերի պատճառ: Այսինքն՝ անել այնպես, որպեսզի նախագահ Սարգսյանի ակնհայտ ձեռբերումներից մեկը՝ երկրի պաշտպանունակության ամրապնդումը և մասնավորապես մարտական հերթապահության համակարգի կատարելագործումը մեր հանրության առավել դժգոհ շերտն ընկալի իբրև ոչ թե ձեռքբերում, այլ՝ «գլխացավանք»:
Վերը նշվածը հարկ է դիտարկել մեզանում հակաարցախյան դիրքորոշումներ ձևավորելու, Արցախը պաշտպանելու գաղափարը վարկաբեկելու թուրք- ադրբեջանական քարոզչական սցենարի համատեքստում: Բաքվում պարզապես ձգտում են առավելագույնս օգտագործել մեր երկրում ստեղծված հետընտրական որոշակի լարվածությունը՝ հանրության շրջանում հակաարցախյան դիրքորոշումներ ձևավորելու նպատակով: Բաքվի համար պակաս կարևոր չէ նաև երդմնակալության նախօրեին, ցավալի կորուստներ պատճառելով, մեր երկրում նախագահ Սարգսյանի դիրքերը թուլացնելու նպատակը, ով Արցախի պաշտպանության գաղափարի կրողն է:
Ադրբեջանական կողմը պատրաստվել, բայց դեռ չի հասցրել իրականացնել իր մտադրությունը: Հարկ է հաշվի առնել, որ ցանկանած հատուկ գործողության հաջողության գրավականը հանկարծակիությունն ու անկանխատեսելիությունն է, որը ադրբեջանական կողմն արդեն իսկ կորցրել է, քանզի հայկական կողմին հաջողվել է ֆիքսել թշնամու հատուկ ստորաբաժանումների տեղաշարժը և կուտակումները պետական սահմանի որոշ տեղամասերում: Իսկ դա նշանակում է, որ զինված ուժերը պատրաստ են ընդունել «անկոչ հյուրերին», քանզի վստահ եմ, որ զորքերում զգոնության մակարդակը բարձրացված է: Հիշեցնեմ նաև, որ անցյալ տարի պետական սահմանի ողջ երկայնքով ձևավորվեց հակադիվերսիոն պաշտպանության համակարգ: Այդ աշխատանքների ողջ ընթացքը գտնվում էր պաշտպանության նախարար Սեյրան Օհանյանի ուշադրության կենտրոնում: Արդյունքում այսօր մեր հենակետերին թշնամու աննկատ մոտենալու հավանականությունը շեշտակիորեն նվազել է:
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
