Ձեր վստահելի աղբյուրը

«Երևանի Դավիթաշեն թաղամասում ոչնչացվում է կամ արդեն ոչնչացվել է հանրային զբոսավայրերից մեկը՝ «Այգին»»: Այս կարգի ահազանգեր այս օրերին կարելի է հանդիպել Facebook սոցիալական ցանցում: Խոսքը Դավիթաշենի նախկին թաղապետ, ԲՀԿ խմբակցության անդամ Ռուբեն Գևորգյանի տարածքի մասին է, որը նա ձեռք էր բերել, բարեկարգել ու նվիրել թաղամասին, սակայն վերջին տարիներին զբոսայգու տարածքը փակ էր: Panorama.am-ը զրուցեց պատգամավորի հետ այս, ինչպես նաև ներքաղաքական անցուդարձի շուրջ:

-Պարոն Գևորգյան, ի՞նչ է կատարվում այգու հետ, ինչո՞ւ է այն փակ, կամ ոչնչացվում, ինչպես այդ մասին ահազանգում են, անհանգստանում….
-Այգին ես եմ քանդել, բայց չեմ ոչնչացրել: Դժվար դավիթաշենցին անհանգստանա այգու համար, որովհետև ամեն ինչից տեղյակ է: Պարզապես առջևում ընտրություններ են, քաղաքական գործընթացներ են և որոշ քաղաքական բանսարկուներ` տեղի, տարածքի, ուզում են այս իրավիճակն օգտագործել ընդդեմ մեզ, քանի որ մենք ներկայացնում ենք «Բարգավաճ Հայաստան» կուսակցությունը: Սա պարզապես քաղաքական պայքարի միջոց է, ինչ-որ ցեխ են ուզում շպրտել այս ֆոնի վրա:

-Օգտագործելով այգու շինարարությո՞ւնը:
-Ոչ, օգտագործելով այդ երևույթը, որովհետև ժողովուրդը չի գրում, ժողովուրդը քաջ գիտի, որ այդ այգին 15-20 տարի առաջ հիմնադրել եմ ես և այսօրվա սերունդը, կարելի է ասել, իր հասակն առել է այդ այգում, մանկությունն անցկացրել այդտեղ, երբ Դավիթաշենում այգի չկար: Այգին իմ սեփական տարածքի վրա եմ հիմնել, թեև կարող էի այդտեղ այլ օբյեկտներ կառուցել` խաղատներ, սուպերմարկետ…

Բայց այսօր այգին չի արդարացնում իրեն այն իմաստով, որ որոշ ծառեր ալերգիկ ֆոն են ստեղծել, այդ իսկ պատճառով որոշեցի դրա տարածքում հիմնել մանկական բազմաֆունկցիոնալ կենտրոն` իրեն շրջապատող մշտադալար ծառերով: Այսինքն տեղի է ունենում փոփոխություն, որի արդյունքում այգին հանդես կգա ավելի ժամանակակից տեսքով ու բնույթով:

-Ե՞րբ կավարտեք:
-Առավելագույնը 2 տարուց: Խոսքը լուրջ նախագծի մասին է, այն կարժենա 10 մլն դոլար, և այդ ներդրումը անձամբ եմ կատարում: Նախագծի շրջանակում շուրջ 250 աշխատատեղ կստեղծվի դավիթաշենցիների համար:

-Պարոն Գևորգյան, նշեցիք, որ քաղաքական նպատակներով բանսարկուներն են այդ բացասական աղմուկը բարձրացրել ու շահարկում այս թեման: Ձեր կարծիքով` ինչո՞ւ, չգիտե՞ն վերջնարդյունքում ինչ է լինելու:
-Ոչ, շատ էլ լավ էլ գիտեն, պարզապես քանի դեռ երևում է այգու քանդված վիճակը, հողային աշխատանքներն են տեսանելի, բոլոր քաղաքական «սևամորթ» ուժերը բնականաբար կուզենան այդ պահը կարճ ժամանակում օգտագործել: Քաղաքականությունն այնպիսի գործընթաց է, երբ ամեն մի առիթ, ու անգամ լավ առիթը, օգտագործվում է ինչ-որ մեկին սևացնելու համար: Իսկ ժողովուրդը լավ գիտի, ով է այդ նախագծի ետևում կանգնած, այդ իսկ պատճառով անհանգստություն ցուցաբերել չի կարող. ի վերջո, ես առաջին թաղապետն եմ եղել ու ցանկացած դավիթաշենցի կփաստի, որ արել եմ ամենը թաղամասը բարեկարգելու համար:

-Երևանի ավագանու նախորդ ընտրությունների ժամանակ Դավիթաշենում բավականին լարված իրավիճակ էր, անգամ բախումներ եղան ՀՀԿ-ԲՀԿ անդամների միջև: Այդ լարվածության նախադրյալներն այսօր տեսանելի՞ են Ձեզ համար, ինչպիսի՞ նախընտրական մթնոլորտ է այսօր:
-Չեմ կարծում, որ կրկնվի… Նման լարվածություն գուցե ստեղծում են որոշ քաղաքական նոր դեմքեր, բայց քանի որ որոշ դեմքեր իրենց արդեն քաղաքականության մեջ գտել են, երևի մարդիկ ընկալեն, որ քաղաքականությունը, ի վերջո, ընդվզումների ու ընդհարումների դաշտ չի: Այն ունի իր օրենքները ու ձևաչափերը և պետք է շարժվենք դրանցով: Իսկապես չեմ կարծում, որ նման բաներ լինեն այս շրջանում, բայց բացառել էլ պետք չէ` եթե քաղաքականության մեջ ես, ուրեմն ամեն ինչին պետք է պատրաստ լինես:

-Պարոն Գևորգյան, Դուք  փորձառու եք, ինչո՞ւ Ձեր անունը չկա Երևանի ավագանու ընտրությունների ԲՀԿ ցուցակում:

-Ինչո՞ւ պետք է լինեի. դա երբևիցէ ինձ չի հուզել: Եթե ես չեմ պատրաստվում մասնակցել ավագանու ինստիտուտին, ապա ինչո՞ւ իմ դեմքով ուղղակի ցուցակում լինեի: Ես դրա կարիքն իսկապես չունեմ, որովհետև իմ տարածքում որպես Գևորգյան Ռուբեն արդեն ներկայացնում եմ «Բարգավաճ Հայաստան» կուսակցությունը, ունեմ իմ ընտրազանգվածը ու դավիթաշենցու աջակցությունը:

ԲՀԿ ցուցակում 14-րդ հորիզոնականում ներկայացված է իմ դուստրը` Արմենուհի Գևորգյանը, ով , ի դեպ, այս այգու սեփականատերն է, նախագիծը հենց նրա նախաձեռնությամբ է իրականացվում: Թեկուզ և բիզնես շահը հետապնդելով, բայց առաջին հերթին նա դավիթաշենցու համար է նախաձեռնել նախագիծը:

Նշենք, Panorama.am-ը կապ հաստատեց Դավիթաշեն վարչական շրջանի կառուցապատման վարչության պետ Գագիկ Գևորգյանի հետ, ով նշեց, որ Ռ.Գևորգյանի սեփական տարածքում մանկական նոր բազմաֆունկցիոնալ կենտրոնի շինարարությանը թույլտվությունը տրվել է Երևանի քաղաքապետարանի կողմից: