Ձեր վստահելի աղբյուրը

Ապրիլի 9-ին մեկնարկելու է երաժիշտ-կատարողների «Վերածնունդ» միջազգային հինգերորդ մրցույթ-փառատոնը` նվիրված Արամ Խաչատրյանի ծննդյան 110-ամյակին և Սպիտակի երկրաշարժի 25 տարելիցին: Փառատոնն անցկացվում է «Գյումրին ԱՊՀ երկրների մշակութային մայրաքաղաք» ծրագրի շրջանակներում: Այս մասին ասուլիսում հայտարարեց մշակույթի նախարարի տեղակալ Արթուր Պողոսյանը: «Մենք երաժշտարվեստի ոլորտում այսպիսի մեծ ներկայացուցչական փառատոն չունենք»,- ասաց փոխնախարարը` ընդգծելով, որ հնչելու է բարձրարվեստ երաժշտություն:

Երևանի Կոմիտասի անվան պետական կոնսերվատորիայի Գյումրու մասնաճյուղի տնօրեն Կարինե Ավդալյանը նշեց, որ փառատոնը տարիների ընթացքում (սկսած 2007 թվականից) որակական փոփոխությունների է ենթարկվել. «Եթե նախկինում փառատոնը որպես մրցույթ էր դիտվում, այսօր արդեն ժյուրիի անդամները ձգտում են համերգներ տալ Հայաստանում»: Փառատոնի օրերին` ապրիլի 15-18-ը, անցկացվելու է նաև գիտաժողով, նաև վարպետության դասեր:

Ըստ կազմկոմիտեին ներկայացված հայտերի, երաժշտական մրցույթին մասնակցելու են 2415 երաժիշտ կատարողներ՝ աշխարհի 30 երկրներից: Մրցույթներն անցկացվում են 13 անվանակարգերում՝ 5 տարիքային խմբերով: Ամենակրտսեր մասնակիցը 5 տարեկան է, ամենամեծը՝ 51: Կ. Ավդալյանն ասաց, որ իրենց ուրախացնում է լարային գործիքների անվանակարգում հայտերի քանակը:

Երևանի Կոմիտասի անվան պետական կոնսերվատորիայի ռեկտոր Շահեն Շահինյանն իր խոսքում նշեց, որ փառատոնի օրերը տոն են գյումրեցիների համար: Մասնակցության առումով, ըստ նրա, փառատոնն առաջիններից է նմանատիպ փառատոների ցանկում: ««Վերածնունդ» վերնագիրը լիովին համապատասխանում է փառատոնի»,- նշեց Շ.Շահինյանը:

«Վերածնունդ» երաժիշտ-կատարողների հինգերորդ միջազգային մրցույթ-փառատոնի հանդիսավոր բացման արարողությունը տեղի կունենա ապրիլի 10-ին Գյումրու դրամատիկական թատրոնում, իսկ հաղթողների մրցանակաբաշխությունը և գալա համերգը` ապրիլի 18-ին: 

«Վերածնունդ» փառատոնի շրջանակներում երաժշտական մրցույթները կանցկացվեն ապրիլի 11-17-ը՝ Գյումրի քաղաքում: Ժյուրիի կազմում են հանրահայտ կատարողներ, նշանավոր արվեստագետներ: «Վերածնունդ» մրցույթ-փառատոնի կազմկոմիտեի նախագահն է Մարդկային ռեսուրսների զարգացման «Փյունիկ» համահայկական հիմնադրամի հոգաբարձուների խորհրդի նախագահ, ՀՀ հատուկ հանձնարարություններով դեսպան, պատմական գիտությունների դոկտոր, պրոֆեսոր Լևոն Սարգսյանը:

«Հիմնադրամը կարևորում է բոլոր ծրագրերը: Հիմնադրամի ամբողջ գործունեությունն ուղղված է դեպի երիտասարդ սերնդի զարգացումը, իսկ մշակութային ծրագրերը երիտասարդների դաստիարակության գործունեության շատ կարևոր մասն է կազմում»,- ասուլիսում ասաց Լ. Սարգսյանը: Միաժամանակ «Փյունիկ» համահայկական հիմնադրամի հոգաբարձուների խորհրդի նախագահը նշեց, որ նման փառատոների անցկացումը Հայաստանը ճանաչելու գործընթացի կարևոր մաս է, «ինչ որ տեղ նաև դիվանագիտություն է` ճանաչում են հայ ժողովրդին, դրական կարծիք են կազմոււմ»:

Իրենց անվանակարգերում բացարձակ 13 հաղթողները կարժանանան Մեծ մրցանակի, իսկ 48 ենթաանվանակարգերում հաղթողները՝ առաջին, երկրորդ, երրորդ կարգի մեդալների, դիպլոմների և «Վերածնունդ» միջազգային հինգերորդ մրցույթ-փառատոնի դափնեկրի կոչման: Մրցույթ-փառատոնի մասնակիցների համար սահմանված է նաև բազմաթիվ այլ մրցանակներ և հուշանվերներ:

«Վերածնունդ» միջազգային հինգերորդ մրցույթ-փառատոնի կազմակերպիչներն են՝ Մարդկային ռեսուրսների զարգացման «Փյունիկ» համահայկական հիմնադրամը, ՀՀ մշակույթի նախարարությունը, Երևանի պետական կոնսերվատորիայի Գյումրու մասնաճյուղը: «Վերածնունդ» մրցույթ-փառատոնը անցկացվում է «Գյումրին ԱՊՀ երկրների մշակութային մայրաքաղաք» ծրագրի շրջանակներում, որի գլխավոր հովանավորներն են «ՎիվաՍել-ՄՏՍ» ընկերությունը, Զանգեզուրի պղնձամոլիբդենային կոմբինատը և «ՀայՌուսգազարդ» ընկերությունը: Փառատոնն անցկացվում է ՀՀ առաջին տիկին Ռիտա Սարգսյանի բարձր հովանու ներքո: