Ձեր վստահելի աղբյուրը

Մի քանի տարի գենդերային խնդիրներով զբաղվող ՀԿ-ների ու Աշխատանքի ու սոցիալական հարցեր նախարարության մասնագետների կողմից մշակված, լրամշակված ու տարբեր քննարկումներ անցած «Ընտանեկան բռնության մասին» օրենքի նախագիծն այդպես էլ իրավական ուժ ունեցող փաստաթուղթ չի դառնա:

Նախագծի մշակման, այլ օրենքների համապատասխանեցման ու այլ իրավական ակտերում փոփոխությունների կատարման նպատակով գենդերային բռնության դեմ պայքարի միջգերատեսչական հանձնաժողովի շրջանակում ստեղծվել էր աշխատանքային խումբ: Սակայն կառավարությունը հավանություն չտվեց նախագծին` պատճառաբանելով, որ առաջարկվող փոփոխությունները կատարվեն այլ իրավական ակտերում` Քրեական, Վարչական, քրեադատավարական ու այլ օրենսգրքերում, չնայած այն բանին, որ մի քանի ՀԿ-ներ ստորագրահավաք են սկսել օրենքն այս պահին ընդունելու պահանջով:

Աշխատանքի և սոցիալական հարցերի նախարարության կանանց հիմնահարցերի բաժնի պետ Արմենուհի Թանաշյանը Panorama.am-ին հայտնեց, որ կառավարությունը արդարադատության նախարարությանը հանձնարական է տվել` նախագծում ներառված մեխանիզմները ցույց տալ լրամշակվող իրավական ակտերում:

«Սահմանումը, մեխանիզմները, գերատեսչությունների` այդ հարցով լիազորությունները կլինեն ոչ թե մեկ օրենքում, այլ մի քանի իրավական ակտերում»,-ասաց Թանաշյանը, նկատելով, որ այսօր խնդիր կա, որ ընտանեկան բռնությունն այսօր որևէ օրենքով հանցատեսակ չի համարվում, ինչ վերաբերում է դրա կանխարգելմանը, ապա մասնագետը հույս ունի մեխանիզմները կընդգրկվեն Վարչական իրավախախտումների մասին օրենսգրքում:

«Սա ավելի արագ լուծում է, քան եթե սպասեինք առանձին օրենք լիներ, հետո փոփոխություններ կատարվեին այլ իրավական ակտերում»,-ասաց Թանաշյանը:

Նշենք, որ «Ընտանեկան բռնության մասին» ՀՀ օրենքի նախագծի ընդունման կապակցությամբ անհրաժեշտ կլիներ փոփոխություներ կատարել «Ոստիկանության մասին» ՀՀ օրենքում, ՀՀ քրեական օրենսգրքում, Վարչական իրավախախտումների վերաբերյալ ՀՀ օրենսգրքում, Հայաստանի Հանրապետության վարչական դատավարության օրենսգրքում և Քրեական դատավարության օրենսգրքում:

Հարցին, թե ստորագրահավաքի արդյունքում հնարավոր է, նախարարությունը կրկին նախագիծը ներկայացնի կառավարությանը, Թանաշյանն ասաց, որ ըստ էության նախարարությունն իր դիրքորոշումն արդեն հայտնել է:

Վերջում թվեր. Ոստիկանության քրեական հետախուզության երրորդ վարչության պետի տեղակալ, ոստիկանության գնդապետ Նելլի Դուրյանն այս տարվա փետրվարին հայտնեց, որ 2012 թվականի ընթացքում ՀՀ ոստիկանությունում գրանցվել է ընտանեկան բռնության 766 դեպք, որից 621-ն ուղղված է եղել իգական սեռի ներկայացուցիչների դեմբ, 145-ը արական սեռի ներկայացուցիչների, իսկ անչափահասների դեմ ընտանիքում գրանցվել է բռնության 15 դեպք: Ինչ վերաբերում է կանանց նկատմամաբ բռնություններին, ապա 2012-ին գրանցվել է սպանության 4 դեպք, սպանության հասցնելու մեկ դեպք, դիտավորությամբ առողջությանը վնաս հասցնելու 2 դեպք, առողջությանը թեթև վնասվածք պատճառելու 125 դեպք, ծեծի 423 դեպք:

Նախագծին կարելի է ծանոթանալ այստեղ:

Նախորդող հրապարակում`
ՀԿ-ները կպայքարեն` «Ընտանեկան բռնության մասին» օրենք ունենալու համար