Ձեր վստահելի աղբյուրը

Երևանի պետական համալսարանի Ժուռնալիստիկայի ֆակուլտետի խորհրդի անդամներն այսօր դեկան ընտրեցին. նրանց մասնակցությամբ փակ, գաղտնի քվեարկությամբ այս պաշտոնում վերընտրվեց Նաղաշ Մարտիրոսյանը:

Գործող դեկանի թեկնածությունն առաջադրել էին ֆակուլտետի Ռադիոհեռուստատեսային ժուրնալիստիկայի և Մամուլի պատմության և տեսության ամբիոնները, և նա միակ թեկնածուն էր, քանի որ այլ թեկնածու, նաև ինքնաառաջադրված չկար: Նախքան քվեարկության մեկնարկը` Ն.Մարտիրոսյանը ներկայացրեց իր տեսլականը առաջիկա հինգ տարիների համար` ընդգծելով, որ բոլոր ոլորտներում ձեռքբերումները և հաջողությունները հնարավոր է պահպանել և զարգացնել, եթե սկսված աշխատանքները լինեն շարունակական:

Ինչ վերաբերում է անհապաղ լուծման կարիք ունեցող խնդիրներին, որոնք այսօրվանից օրակարգային կլինեն վերընտրված Ն.Մարտիրոսյանի համար, ապա վերջինս Panorama.am-ի հետ զրույցում առանձնացրեց ամենաառաջնայինները.

«Ամենից շատ ես կարևորում եմ լրատվական դաշտի հետ աշխատանքն ու փոխգործակցությունը, առանց որի հնարավոր չէ պատրաստել լրագրող, ինչպես հնարավոր չէ որակյալ բժիշկ պատրաստել միայն բժշկական համալսարանի պատերի ներսում` լրագրող պետք է պատրաստել առաջատար լրատվամիջոցների հետ համագործակցությամբ: Կարծում եմ, հայաստանյան առաջատար լրատվամիջոցները` թե առցանց, թե մամուլը, պետք է ուսումնաարտադրական յուրատեսակ բազա հանդիսանան, որովհետև նրանք շահագրգիռ են որակյալ լրագրող պատրաստել, որոնցից յուրաքանչյուրը հետագայում հնարավոր է դառնա հենց իրենց աշխատակիցը»,- ասաց մեր զրուցակիցը:

Արդեն երկրորդ անգամ ընտրված Ն.Մարտիրոսյանի համար կարևոր է նաև ժամանակակից դասագրքերի թարգմանությունն ու դրանք կրթական գործընթացներում կիրառելը, քանի որ, ըստ նրա, կազմակերպել լրագրողական կրթությունը` հաղորդակից չլինելով օտարերկրացի գիտնականների, տեսաբանների այս ոլորտի ձեռքբերումներին, այսօր ուղղակի մերժելի է:

Ն.Մարտիրոսյանը հավաստիացրեց, որ շարունակական է լինելու նաև 2011թ-ին մեկնարկած սփյուռքի լրագրողների վերապատրաստման ծրագիրը, ընդ որում դրա շրջանակում անցկացվող դասընթացներում լրագրողներն առնչվելու են ոչ միայն լրագրողական վարպետությանն ու ոլորտի օրենսդրական խնդիրներին, այլև այնպիսի կարևորագույն հարցերի, ինչպիսիք են հայ-թուրքական հարաբերությունները, ցեղասպանագիտությունը, Հայաստան-Ադրբեջան հարաբերություններին առնչվող հարցերի շրջանակը և այլն:

«Այս տարին ինձ համար մի տեսակ հոբելյանական էր. 35 տարի առաջ «Պիոներ կանչ»-ում տպագրվել է իմ առաջին հրապարակումը, 30 տարի առաջ ավարտել եմ դպրոցը, հինգ տարի է ես Ժուռնալիստիկա ֆակուլտետի դեկանն եմ»,- քվեարկության արդյունքների հրապարակումից և այն խորհրդի անդամների կողմից հաստատվելուց հետո հայտարարեց Ն.Մարտիրոսյանն ու շնորհակալություն հայտնեց ԵՊՀ ռեկտոր Արամ Սիմոնյանից, ով նախքան այդ ելույթում կարևորել էր
Ն .Մարտիրոսյանի գործունեությունն ու ֆակուլտետի հաջողությունները:

Նշենք, որ Ն.Մատիրոսյանը վերընտրվեց միաձայն` քվեարկության մասնակից 27 խորհրդի անդամները միաձայն «կողմ էին» քվեարկել նրա օգտին: Նշենք նաև, որ ըստ կանոնադրության` ֆակուլտետի դեկանի ընտրությունը կազմակերպվում է հինգ տարին մեկ, իսկ նույն անձը ընտրվելու անսահմանափակ հնարավորություն ունի: