Ձեր վստահելի աղբյուրը

Ալեքսանդր Վարպետյանն այլևս Հայաստանում չէ: Նա գնացել է: Այս մասին Panorama.am-ին հայտնեցին ԱԱԾ մամուլի կենտրոնից, մանրամասնելով, որ նրա մուտքը Հայաստան արգելված է դեռ 2002 թվականից ու այդ մասին նա իմացել է:

Այսօր Վարպետյանին` Հայաստան չթողնելու վերաբերյալ հայտարարություն է տարածել Հայազն միությունը, որտեղ ասված է.

«ՀՀ ԱԱԾ-ն տարիներ շարունակ արգելում է Ֆրանսիայի քաղաքացի Ալեքսանդր Վարպետյանի մուտքը Հայաստան: Օրերս այս հանգամանքը նոր հնչեղություն ստացավ: Ենթադրվում է, որ նման սահմանափակումներ են գործում նաև ուրիշ օտար քաղաքացիություն ունեցող հայերի նկատմամբ:

Ընդհանրապես հայտնի է, որ իրավասու ծառայությունները լիազորված են, անվտանգության նկատառումներով, առանց ենթականերին որևէ բացատրություն տալու, արգելել առանձին օտարերկրացիների մուտքը երկիր: Սակայն դա չի նշանակում, թե նման սահմանափակումները կարող են կիրառվել կամայականորեն, առանց լուրջ հիմնավորման, առավել ևս, ազգությամբ հայերի նկատմամբ:

ԱԱԾ-ն պարտավոր է հիմնավոր բացատրություն տալ, թե տվյալ օտարերկրացի հայը հատկապես ինչպես է սպառնում երկրի անվտանգությանը: Առավել ևս, նման բացատրությունը անհրաժեշտ է, երբ առկա է հանրային պահանջ:

Կարծում ենք, որ պարոն Վարպետյանի դեպքում, եթե անգամ կարող են լինել ինչ-ինչ նկատառումներ կապված նրա հրապարակային ելույթների հետ, միևնույն է, ազգային անվտանգությանը սպառնալու մասին պնդումները խիստ չափազանցված են, ինչի արդյունքում նաև արհեստականորեն կարևորվում է տվյալ անձի գործունեությունը:
Պահանջում ենք. բոլոր այն դեպքերում, երբ մուտքի իրավունքից զրկված օտարերկրացին ազգությամբ հայ է, տալ այդ սահմանափակման շատ հիմնավոր բացատրություն, հակառակ դեպքում անմիջապես վերացնել հայրենիք մուտք գործելու արգելքը»:

Նշենք, որ դեռ 2007-ին «Հետք»-ի նամակին ի պատասխան, ոստիկանության անձնագրային եւ վիզաների վարչության պետի տեղակալը պատասխանել է. «2002 թ.-ից սկսած Ֆրանսիայի քաղաքացի Ալեքսանդր Վարպետյանի` ՀՀ կացության կարգավիճակ ստանալու, ինչպես նաեւ Հայաստանի Հանրապետություն նրա հրավերի դիմումները մերժվել են «ՀՀ-ում օտարերկրյա քաղաքացիների իրավական կարգավիճակի մասին» ՀՀ նախկին օրենքի 9-րդ հոդվածի եւ 25-րդ հոդվածի 12-րդ պարբերության պահանջների համաձայն»:

«Օտարերկրացիների մասին» ՀՀ օրենք 8-րդ հոդվածի (Օտարերկրացուն Հայաստանի Հանրապետության մուտքի վիզա տրամադրելը (ժամկետի երկարաձգման) մերժելը, մուտքի վիզան ուժը կորցրած ճանաչելը կամ մուտք գործելն արգելելը ) 1-ին կետի համաձայն` օտարերկրացուն մուտքի վիզայի տրամադրումը (ժամկետի երկարաձգումը) մերժվում է, տրամադրված մուտքի վիզան ուժը կորցրած է ճանաչվում կամ մուտքը Հայաստանի Հանրապետություն արգելվում է, եթե`

գ) գոյություն ունեն հավաստի տվյալներ, որ նա իրականացնում է այնպիսի գործունեություն, մասնակցում, կազմակերպում կամ հանդիսանում է այնպիսի կազմակերպության անդամ, որի նպատակն է՝

- վնաս պատճառել Հայաստանի Հանրապետության պետական անվտանգությանը, տապալել սահմանադրական կարգը, թուլացնել պաշտպանունակությունը,

- իրականացնել ահաբեկչական գործունեություն,

- սահմանով ապօրինաբար (առանց համապատասխան թույլտվության) տեղափոխել զենք, ռազմամթերք, պայթուցիկ նյութեր, ռադիոակտիվ նյութեր, թմրանյութեր, հոգեներգործուն նյութեր կամ

- իրականացնել մարդկանց առեւտուր (թրաֆիքինգ) եւ (կամ) անօրինական սահմանահատումներ.

զ) գոյություն ունեն նրա կողմից Հայաստանի Հանրապետության պետական անվտանգությանը կամ հասարակական կարգին այլ լուրջ եւ հիմնավոր սպառնալիքներ:Համաձայն 2007 թ. փետրվարի 4-ին ուժի մեջ մտած «Օտարերկրացիների մասին» ՀՀ օրենքի 8-րդ հոդվածի 1-ին կետիգ եւ զ ենթակետերի պահանջների` ներկայումս Ա. Վարպետյանին ՀՀ մուտքի վիզա տրամադրելու հարցը վերանայել հնարավոր չէ»:

Նախորդող հրապարակումներ`

Փոստանջյանի հարցումը` Ալեքսանդր Վարպետյանի տեղաշարժվելու իրավունքը սահմանափակելու վերաբերյալ

«Անհասկանալի է, թե ինչու է Ալեքսանդր Վարպետյանի մուտքը հայրենիք արգելվել». Մտերիմները բաց նամակով դիմել են ՀՀ նախագահին