Ձեր վստահելի աղբյուրը

Թուրքիայում հրապարակվող «Ժամանակ» թերթի խմբագիր Արա Գոչունյանը անկախ Հայաստանի 3-րդ նախագահի 6-րդ երդմնակալությանը մասնակցում է մեծ ուրախությամբ: «Մենք ուրախ ենք, որ մեր ժողովուրդը դարերի փորձառությամբ այս քսան տարիների ժամանակահատվածը լավ է արժևորել: Եվ այդ արժեվորման երևույթի մեջ նկատում ենք, որ մեր հանրապետության նախագահները միշտ կանգնած են իրենց երդմանը և այդ գիտակցությունով առաջնորդվելով ղեկավարել են մեր հանրապետությունը: Այս տրամադրություններով է, որ մենք հաջողություն ենք մաղթում պարոն Սերժ Սարգսյանի առաջիկա պաշտոնավարման ժամկետի համար», Panorama.am-ի թղթակցի հետ զրույցում ասաց պարոն Գոչունյանը:

-Նախկին թեկնածու Րաֆֆի Հովհաննիսյանը վիճարկում է ընտրությունների արդյունքները և Ազատության հրապարակում նոր երդման արարողություն է անում: Ինչպե՞ս եք դրան վերաբերում:
-Մենք ուրախությամբ ենք հետևում, որ Հայաստանում ժողովրդավարության մակարդակն ամրապնդվում է: Ժողովդավարություն, բնականաբար, չի նշանակում միայն իշխանություն: Ժողովրդավարություն նշանակում է նաև ընդդիմություն: Ընդդիմությունը ցանկացած երկրում ժողովրդավարությունը կատարելագորելու համար անհրաժեշտ նախադրյալ է: Մենք այսօր Հայաստանում, երբ խոսում ենք մարդու հիմնարար ազատությունների, ժողովրդավարության կատարելագործման մասին, դա իհարկե չի վերաբերում իշխանության թևին: Ես այս գծին ամենայն հանգստությամբ եմ վերաբերում և մաղթում եմ, որ առաջիկայում, ՀՀ քաղաքացիները իրենց քաղաքացիական պատասխանատվությունների և պահանջների հավասարակշռության մեջ իրենց վերաբերմունքը հստակեցնեն քաղաքական դաշտի ցանկացած ուժի կամ համախմբան նկատմամբ:

-Ձեզ մոտ Հայաստանի նախագահի ընտրությունների արդյունքները կասկածներ չե՞ն առաջացնում:
-Մեզ մոտ ընտրությունների արդյունքները կասկածներ չեն առաջացնում: Ստամբուլահայությունը իմանում է, թե Հայաստանում ինչպիսի մթնոլորտ է տիրում: Իմանում է, թե Հայաստանը ինչ ճանապարհով անցնելով, այստեղ է եկել և իմանում է նաև, որ այս Հայաստանի անցած ճանապարհի մեջ Սերժ Սարգսյանը, որպես պետական գործիչ, որպես հայ, նախևառաջ, ինչ ներդրում է ունեցած և հետևաբար ամենայն վստահությամբ է վերաբերում նախագահի հաջորդ շրջանի պաշտոնավարման կապակցությամբ:

-Այդ պաշտոնավարման գալիք տարիներին որևէ ակնկալիք ունե՞ք հայ-թուրքական հարաբերությունների զարգացման հարցում:
-Մեր ակնկալիքներն ու ցանկությունները միշտ էլ մնում են. սպասում ենք դրականին` գիտակցելով, որ բեկումնային պահը բավական բարդ հանգամանքներից է կախված: Բայց իմանալով Հայաստանի ու Թուրքիայի նախագահների քաղաքական կամքը, որը դրսևորված է շոշափելի մոտավոր անցյալին, դա երևի, մեծ հենարան է առաջիկայում ներկայանալիք առիթը բաց չթողնելու տեսակետից:

-Հիմա այդ հարաբերություններում ի՞նչ վիճակ է:
-Երկու կողմերն էլ, իհարկե, ձախողումների պայմաններում փորձում են պատասխանատվությունը մյուսի վրա թողնել: Այս պահի դրությամբ այնպես է երևում, որ գնդակը Թուրքիայի դաշտում է: Բայց մենք ավելի փորձում ենք կենտրոնանալ արդյունքների վրա, որոնք կախված են ուժերի իրական հարաբերակցությունից: Այդ տեսակետից լոզունգային բաներից ավել պետք է իրական պատկերը տեսնենք, իսկ իրական պատկերը այն է, որ երկու հարևան երկրների համար փակ սահմանները և հարաբերություն չունենալը անբնական երևույթ է, որը պետք է հաղթահարել: