Ձեր վստահելի աղբյուրը

«Մեծարգո պարոն նախագահ, հիմք ընդունելով ՀՀ սահմանադրության 55-րդ հոդվածի 4-րդ կետը և հաշվի առնելով, որ 2013 թվականի ապրիլի 9-ին ՀՀ նախագահը ստանձնել է իր պաշտոնը ներկայացվում է ՀՀ կառավարության հրաժարականը», -քիչ առաջ Հայաստանի նախագահ Սերժ Սարգսյանի ներկայությամբ և նախագահի նստավայրում հայտարարեց վարչապետ Տիգրան Սարգսյանը և հրաժարականի դիմումը ներկայացրեց ՀՀ նախագահին:

Հայաստանի նախագահ Սերժ Սարգսյանը ընդունեց կառավարության հրաժարականը և դիմելով արդեն նախկին կառավարության անդամներին, հայտարարեց.

«Մեծարգո պարոն վարչապետ և կառավարության անդամներ ընդունելով կառավարության հրաժարականը, ես շնորհակալություն եմ հայտնում համատեղ աշխատանքի համար: Ես համոզված եմ, որ մեր համատեղ գործունեությունը եղել է արդյունավետ: Կասկածից վեր է, որ մեր քաղաքացիների մի հսկայական զանգված դժգոհ է մեր աշխատանքից, բայց հարգելի գործընկերներ, ուզում եմ, որպեսզի դուք համոզված լինեք, որ մարդիկ դժգոհ են ոչ թե մարդկանցից, այլ եղած պրոբլեմներից: Դուք ակնհայտորեն աշխատել եք բարդ պայմաններում և լուծել եք շատ դեպքերում անհնարին թվացող խնդիրներ: Դուք դիմագրավել եք մարտահրավերներին, և դա Ձեզ պատիվ է բերում: Անկախ նրանից, թե ձեզնից ով կաշխատի կառավարության նոր կազմում, դուք ծառայել եք հայ ժողովրդին և վստահ եմ, որ ծառայելու եք մինչև Ձեր խոր ծերություն, որովհետև կոչումը ծառայել ժամանակավոր չի լինում, որովհետև ծառայել ձեզ համար, մեր բոլորիս համար նշանակում է ապրել: Ուզում եմ, որ ձեզնից յուրաքանչյուրը համոզված լինի, որ անկախ բոլոր գնահատականներից, դուք կառավարության նոր կազմի համար ստեղծել եք բարենպաստ պայմաններ: Ես վստահ եմ, որ Հայաստանի նոր կառավարությունը շարունակելով Ձեր լավագույն ավանդույթները անպայման կկատարի իր առջև դրած խնդիրները: Իսկ դրանք բազմազան են: Մեկ անգամ ևս շնորհակալություն եմ հայտնում Ձեզ և հաջողություն եմ մաղթում»:

Այնուհետև նա ստորագրեց կառավարության հրաժարականի հրամանագիրը և խնդրեց կառավարության անդամներին ժամանակավորապես պաշտոնավարել, մինչև նոր կառավարության կազմավորումը:

Նշենք, որ հրամանագիրը ուժի մեջ է մտնում ստորագրման պահից:

Կառավարության հրաժարականից առաջ, արդեն նախկին վարչապետ Տիգրան Սարգսյանը, շնորհավորեց Սերժ Սարգսյանին նախագահի պաշտոնն ստանձնելու կապակցությամբ և ասաց, որ իրենց համար մեծ պատիվ էր աշխատել Հայաստանի նախագահի հետ: «Ուզում եմ նշել, որ այս տարիների ընթացքում Ձեր քաղաքական ղեկավարության ներքո մեր թիմը փորձել է կատարել Ձեր կողմից մեր առջև դրված բոլոր խնդիրները: Իհարկե մենք ունեցել ենք դժվար օրեր, ունեցել ենք հաջողություններ, բացթողումներ սխալներ: Պարոն նախագահ, ապագայի ամենահուսալի խորհրդատուն անցյալն է: Ձեր անցած ուղին ձեր փորձը և գիտելիքները ձեր մարդկային հատկանիշները այն երաշխիքներն են, որոնք մեզ հույս են ներշնչում, որ մեր պետությունը զարգանալու է և մենք ունենալու ենք նոր վերելքներ և նոր հաղթանակներ», -հայտարարեց Տիգրան Սարգսյանը: