Ձեր վստահելի աղբյուրը

Երևանի ավագանու ընտրություններում Հայ Ազգային կոնգրես կուսակցության ընտրական ցուցակում ընդգրկված Զոյա Թադևոսյանը և Կոնգրեսի շատ անդամներ ապրիլի 9-ին գտնվել են Ազատության հրապարակում ու իրենց համար տարօրինակ է, որ Րաֆֆի Հովհաննիսյանն իր ելույթում բացականչել է. «Դաշնակցություն, ո՞ւր ես, ՀԱԿ, ո՞ւր ես, Օրինաց, ո՞ւր ես, Բարգավաճ, ո՞ւր ես»:

Panorama.am-ի թղթակցի հետ զրույցում տիկին Թադևոսյանն ասաց, որ «այդ ընդդիմության» առաջնորդը անտեղյակ է քաղաքական իրավիճակին: «Երեկ Բաղրամյան պողոտայում հենց ՀԱԿ-ի ակտիվիստներն էին կանգնած, իսկ Պռոշյանի հատվածում ես իմ բազմաթիվ ընկերների հետ կանգնած եմ եղել: Դա սխալ գնահատական է, և ցավում եմ, որ հենց այդ տրամաբանությամբ առաջնորդվելով, ամենաակտիվ քաղաքական ուժի վրա ցեխ շպրտելով որոշում էին իրենց ճանապարհը հարթել ընդդիմության տիտղոսը զավթելու նպատակով: Դա ողորմելի քայլ է»,- մեզ հետ զրույցում ասաց տիկին Թադևոսյանը:

Նա նկատեց, որ ինքը պարբերաբար հեռախոսով կապ է հաստատել Բաղրամյան պողոտայում գտնվող իրենց կողմնակիցների հետ, որպեսզի հասկանան` ինչ իրավիճակ է այնտեղ, կամ արդյոք որևէ բան պատահել է նրանց հետ:

Նշենք, որ երեկ ժամը 18:00-ին Ազատության հրապարակում տեղի ունեցած հանրահավաքում Րաֆֆի Հովհաննիսյանը կոչ էր արել «արժանապատիվ, հայի նման, լուռ, ըստ Սահմանդրության» քայլել դեպի Բաղրամյան 26: Այստեղ ոստիկանության ու հանրահավաքի կողմնակիցների միջև տեղի ունեցավ ընդհարում, և ոստիկանապետ Վլադիմիր Գասպարյանի հետ բանակցություններից հետո Րաֆֆի Հովհաննիսյանը մի խումբ մարդկանց հետ շրջանցելով Բաղրամյանը`Սարյան փողոցով ու ոստիկանապետի հետ միասին բարձրացան դեպի Ծիծեռնակաբերդի բարձունք:

Թադևոսյանը հստակեցրեց, որ ՀԱԿ-ը հասարակության մեջ տեղի ունեցող գործընթացներին երբեք անտարբեր չի եղել: «Փետրվարի 18-ից սկսած տեղամասերում մենք պայքարել ենք: Մենք չենք ծախվել, պահել ենք բոլոր ձայները, այդ օրն էլ մենք այնտեղ էինք: Դա չտեսնելու մեջ ես միտում եմ տեսնում: Շատ վատ է, որ քաղաքական գործիչներն այդ տրամաբանությամբ են առաջնորդվում: Դա նշանակում է, որ ուզում են քաղաքական դաշտը սեփականացնել», -ասաց մեր զրուցակիցը:

Ազատության հրապարակում հավաքված ժողովուրդը, Թադևոսյանի խոսքով, նախապես տեղյակ չի եղել, որ մոմերը վառած բարձրանալու է դեպի Ծիծեռնակաբերդ:

«Նա մարդկանց ժամը վեցին հրավիրում է հանրահավաքի, ու արդեն մոմերը առած պատրաստ է, այսինքն` նա նախապես ուներ իր ծրագիրը: Բայց որից ժողովուրդը տեղեկացված չէր: Դա շատ վատ է, ուրեմն, եթե դու պատասխանատվությունը շպրտում ես ժողովրդի վրա, բարի եղիր ժողովրդին ասել` դու ինչ ես անում: Գուցե այդ ժողովուրդը այդ մոմավառությանը չուզենար մասնակցել: Դու խաբեությամբ մարդկանց բերում ես հրապարակ, չգիտեմ ինչ նպատակի համար: Բերում ես հրապարակ ժողովուրդը սպասում էր զարգացումների: Ցերեկը, երբ կար 50 հազար մարդ, ինչո՞ւ չբերեցիր Բաղրամյան, ինչո՞ւ չփակեցիք Բաղրամյան փողոցը: Ես չեմ ասում գնայիք այնտեղ ավերածություններ անեիք կամ հակաօրինական գործողություններ անեիք, հանգիստ գնայիք, կանգնեիք: Ժողովուրդը ցանկանում էր իր ցասումը պարպել, և դա մի միջոց էր»,- նշեց ՀԱԿ անդամը:

Քաղաքական գործչի խոսքով, ապրիլի 9-ի հետ ժողովուրդը հույսեր էր կապում, թեպետ շատերը կասկածում էին, քանի որ այդպիսի «միջոցառումը իրավական ուժ չունեցող միջացառում էր»: Սակայն ապրիլի իննին կատարվածը ցույց տվեց, որ հարթակում կանգնածը, որը ընտրություններում մեծ թվով ձայներ է ստացել, քաղաքական գործիչ չէ: «Նա լավ մարդ է, իսկ լավ մարդը կարող է զբաղվել հասարակության համար ավելի օգտակար գործով, քան քաղաքականությունն է», -հավելեց տիկին Թադևոսյանը:

Դեպի Ծիծեռնակաբերդ երթի ժամանակ Րաֆֆի Հովհաննիսյանը լրագրողների հետ զրույցում ասել էր, որ Բաղրամյանում կանգնածները արյուն են ուզում, իսկ «մենք Ծիծեռնակաբերդում կավարտենք մեր երթը և կվերագտնենք մեր ընտանիքներին ու կգնանք գիշերելու»:

Այս առնչությամբ տիկին Թադևոսյանն ասաց, որ քաղաքական գործիչը պատասխանատվություն վերցնող անձն է, իսկ Րաֆֆի Հովհաննիսյանը, ըստ Թադևոսյանի, այդ պատասխանատվությունը երբեք չվերցրեց իր վրա: «Երեկ, երբ հավաքել էր ժողովրդին Ազատության հրապարակում, ասաց դուք եք անում, ես չեմ անում: Իսկ դա նշանակում է պատասխանատվությունից հրաժարվել ու դա գցել հասարակության վրա, որպեսզի ինչ-որ վատ իրադարձության դեպքում, Աստված ոչ անի, ժողովուրդը պատասխան տար: Իսկ ժողովրդի պատասխան տալու դեպքում դուք շատ լավ հիշում եք հինգը տարիների մեր պայքարը` ամեն մի քաղբանտարկյալի համար: Եվ երբ մեզ մեղադրում էին թե ինչո՞ւ չեք գնում կտրուկ գործողությունների, մենք պատասխանում էինք` քաղբանտարկյալներ ունենք: Քանի դեռ մեր վերջին քաղբանտարկյալն ազատության մեջ չէր, մենք չէինք կարող գործողությունների գնալ: Իսկ տարիների ընթացքում մենք, այո, ջլատվեցինք որովհետև դառն էր քաղաքական պայքարը», -հավելեց Զոյա Թադևոսյանը` նկատելով, որ մյուս քաղաքական ուժի անցած ճանապարհից պետք էր դասեր քաղել: 

Նրա կարծիքով, օդի մեջ հայտարարությունների ժամանակն անցել է և պետք էր համախմբան կոչեր անել:

Իսկ թե ինչ է սպասվում ապրիլի 12-ին կայանալիք հաջորդ հանրահավաքին, ՀԱԿ անդամը վստահ է. «Ապրիլի 12-ը ցույց կտա, որ ժողովուրդն այլևս չի հավատում Րաֆֆի Հովհաննիսյանին: Ես ունեմ շատ ու շատ ընկերներ, որևէ մեկը այլևս չի գնա այնտեղ: Այդ գործիչը մոռացվում է»: