Ձեր վստահելի աղբյուրը

Ազգային ժողովն այսօր սկսեց քննարկել դեռ նախորդ քառօրյայի օրակարգից մնացած ԱԺ ՀԱԿ խմբակցության հեղինակած 2008-ի մարտի 1-ի իրադարձությունների ուսումնասիրման համար ԱԺ ժամանակավոր հանձնաժողով ստեղծելու մասին որոշման նախագիծը:

Այն խորհրդարանականներին ներկայացնելիս ԱԺ ՀԱԿ խմբակցության անդամ Գագիկ Ջհանգիրյանը հայտարարեց, որ թեպետ այդ օրերին 83-ից ավելի մարդ է դատապարտվել, սակայն սպանության կամ հրազենի կիրառման վերաբերյալ որևէ մեղադրանք չի եղել:

«Սրանից կարելի է հետևություն անել, որ մարտի մեկի իրադարձությունների հետ կապված ոչինչ էլ բացահայտված չէ ու հարյուրավոր հանցագործներ ազատության մեջ են, մինչդեռ այդ հանցագործություններն ուղղակի հնարավոր չէր չբացահայտել՝առկա ակնհայտ փաստերի առկայության պարագայում: Դրա պատճառն այն է, որ ակտիվ քննություն չի իրականացվել», հավելեց Ջհանգիրյանը:

Նա տեղեկացրեց, որ իշխանությունների հետ ընդհանուր համաձայնության են եկել հանձնաժողովի կազմի հարցում և ըստ այդեմ, հանձնաժողովի կազմում որոշել են ներգրավել Հանրապետական խմբակցության երկու պատգամավորների, իսկ մյուսներից՝ մեկակական:
«Անկախ պատգամավոր Էդմոն Մարուքյանը գրավոր դիմում է ինձ ներկայացրել, որ իրեն ևս ներգրավենք հանձնաժողովի կազմում: Ես սկզբունքորեն դեմ չեմ, սակայն այստեղ միայն մի հանգամանք կա՝ չխախտվի քաղաքական հավասարակշռությունը և նաև կարևոր է հանձնաժողովի մթնոլորտն ու ուժերի հավասարակշռությունը», նկատեց Գագիկ Ջհանգիրյանը:

Նրա խոսքով, նախապես որոշվել էր հանձնաժողովի աշխատանքների վերաբերյալ եզրակացությունը ներկայացնել այս տարվա նոյեմբերի 29-ին: Սակայն ժամանակավոր հանձնաժողովի ստեղծման մասին նախագծի քննարկման ձգձգման պատճառով Ջհանգիրյանը խորհրդարանին խնդրեց ևս մեկ-երկու ամսով եզրակացության ներկայացման ժամկետը երկարաձգել:

Խորհրդարանում այս պահին պատգամավորները իրենց կարծիքներն են ելույթներում ներկայացնում: