Ձեր վստահելի աղբյուրը

«Ինքնաբացարկ դեռևս չեմ հայտնել: Կա նման միտք: Վերջնական որոշում չեմ կայացրել: Դժվար թե լինի»,- այսպիսին էր «Ես Yes!» ամսագրի գլխավոր խմբագիր Անի Քոչարի պատասխանը Panorama.am-ի հարցին, թե հնարավո՞ր է, որ ինքնաբացարկ հայտնեք: Նշեք, որ նա ընդգրկված է Երևանի ավագանու «Բարև Երևան» դաշինքի ցուցակում, 10-րդն է:

Նա նաև մանրամասնեց, թե ինչու չի դիմի նման քայլի. «Դժվար թե հայտնեմ: Կարծում եմ` այս պարագայում տարաբնութ խոսակցությունների տեղիք կտա իմ ինքնաբացարկը: Բոլոր այն մարդիկ, ովքեր մշտապես փորձում են ընդդիմախոսել, այլ քաղաքական ուժ են ներկայացնում, փորձելու են իմ արածը որակել որպես ոչ այլ, քան դավաճանություն, որակել, որ զգալով, որ գուցե մեր դաշինքը չունենա այնքան մեծ հաջողություն, որոնք «Ժառանգության» առաջնորդի հաղթանակի հասնելու դեպքում կլիներ, փորձում եմ լքել խորտակվող նավը: Նույնիսկ մեծ ցանկության դեպքում ինքնաբացարկ չեմ հայտարարի, քանի որ այս փուլում, կարծում եմ, բացասական ազդեցություն կունենա դաշինքի հեղինակության վրա: Վերջին զարգացումների հետ կապված, գտնում եմ, որ ճիշտ չի լինի, որ նման բան անեմ: Այսինքն նման բան չեմ անի: Կարծում եմ` ամեն ինչ առջևում է»:

Նրա խոսքով, «Բարև Երևանն» ունի ժամանակ իր քարոզարշավի ընթացքում երևանցիներին տեղեկացնելու, իրազեկելու, նաև համոզելու, որ իրենք կարող են աշխատել քաղաքի համար, քաղաքի համար սրտացավ մարդիկ են:

Ինչ վերաբերում է ապրիլի 9-ին կատարված դեպքերին, «Ժառանգություն» կուսակցության առաջնորդ Րաֆֆի Հովհաննիսյանի քայլերին, Անի Քոչարը նշեց, որ «առաջնորդի մասով հիասթափություն չունեմ», այլ հիասթափված է ընդհանուր իրադարձությունների զարգացումից, այն բանից, որ Րաֆֆի Հովհաննիսյանի վրա անընդհատ ճնշում էր լինում հենց ժողովրդի կողմից: «Բաներ տեղի ունեցան ժողովորդի պահանջով, ժողովրդի ճնշման տակ: Արդյունքում ունեցանք անկազմակերպ, համպատրաստի զարգացումներ, իրադարձություններ»,- կարծում է նա:

Ա. Քոչարի դիտարկմամբ, այս պարագայում Ր.Հովհաննիսյանի` որպես մարդու, քաղաքական գործի ընկալումները, պայքարի ձևերը, պայքարի շարունակականությունը չի համընկանում ժողովրդի ցանկության հետ, քանի որ ժողովուրդը հոգնել է շարունակական պայքարից, հոգնել է կամ չի ցանկանում մշտապես հավաքների, հանրային ակցիաների, միջոցառումների մասնակցել: «Կա մի զանգված, որ կարծում է կգա ու այդ օրը իշխանափոխություն կամ հեղափոխություն կանի ու կսկսի լավ ապրել: Հնարավոր չէ մեկ օրում կամ մեկ ամսում ինչ-որ բան փոխել: Րաֆֆի Հովհաննիսյանը գիտակցում և պատկերացնում է, որ դա մեկ օրում հնարավոր չէ անել»,- ասաց ավագանու թեկնածուն:

Ըստ նրա, հասարակության դժգոհող հատվածը չպետք է սպասի, որ ընտրությունից ընտրություն իր դժգոհությունը, բողոքն արտահայտի, այլ իր իրավունքները պաշտպանելու համար պետք է մշտապես պայքարի, պահանջատեր լինի իր իրավունքների համար: «Չեմ կարծում, որ եթե Րաֆֆի Հովհաննիսյանը լինի նախագահ, բոլոր խնդիրները կլուծվեն: Դրա համար պետք է բոլորն իրենց վրա աշխատեն: Շատ ավելի արդյունավետ կարող է լինել, որ յուրաքանչյուր քաղաքացի իր տեղում, իր հնարավորությունների սահմաններում պայքարի, դրսևորվի անհանդուրժողականություն անօրինականության նկատմամբ, լինի պահանջատեր»,-կարծում է Անի Քոչարը:

Նա անկեղծացավ ու ասաց, որ իր կարծիքով այս շրջանում Հայաստանում իշխանափոխություն չի լինի՝ միաժամանակ հավելելով, որ միգուցե «Ժառանգության» անդամները համաձայն չլինեն իր հետ: Նա կրկնեց, որ ինքը կուսակցական չէ: «Սակայն սա չի նշանակում, որ շաժումը չի կարող հաջողություն ունենալ: Շարժման հաջողությունը միայն երկրի առաջին դեմքի փոփոխությամբ չէ: Շարժումը նպաստում է, որ իշխանությունները սկսեն հաշվի նստել ժողովրդի հետ, գոնե այն զանգվածի, որ պահանաջատեր է: Այս առումով՝ հավատում եմ հաղթանակին: Իսկ ինձ համար այդ հաղթանակը երկրում բարեփոխումներն են»,- նման դիտարկում արեց Անի Քոչարը: