Ձեր վստահելի աղբյուրը

Այսօր մարզահամերգային համալիրում Հայ Ազգային կոնգրես կուսակցության հիմնադիր համագումարի ժամանակ ելույթ է ունեցել Լևոն Տեր-Պետրոսյանը, որի ժամանակ խոսել է երկրում բուրժուադեմոկրատական հեղափոխություն կատարելու մասին իրենց ցանկությունների, ինչպես նաև այդ ճանապարհին «Բարգավաճ Հայաստան» կուսակցության հետ ՀԱԿ-ի համագործակցության մասին:
Տեր-Պետրոսյանի ելույթի այդ հատվածը ներկայացնում ենք ամբողջությամբ.

«Մեր խնդիրն է իրականացնել բուրժուադեմոկրատական հեղափոխություն: Ի՞նչ է նշանակում բուրժուադեմոկրատական հեղափոխություն` արտադրողական ուժերը պետք է ազատված լինեն կապանքներից ժամանակին դրանք ֆեոդալական կապանքներն էին, իսկ այսօր` ավազակապետական կապանքներն են, ոչ մի տարբերություն չկա:

Մինչև խոշոր բուրժուազիան Հայաստանում չազատագրվի ավազակապետական կապանքներից, Հայաստանը բարգավաճ և ժողովրդավարական պետություն չի դառնա, մեզ մոտ միջին և մանր բիզնեսը զարգանալու անգամ բողբոջելու հնարավորություն չի ունենա: Այստեղ համակրանքների հակակրանքների հարց չկա: Մի կարծեք, թե ֆրանսիական բուրժուաները, որ 18-րդ դարում հեղափոխություն էին անում, ավելի լավն էին ու ավելի կրթված, քան այսօրվա մեր օլիգարխները: Ուղղակի մարդիկ էին ու հասկացան մի բան` ավելի ձեռնտու է ազատվել այդ կապանքներից, գործել օրինական դաշտում, բարգավաճել, ծաղկել` միաժամանակ բարգավաճեցնելով, ծաղկեցնելով սեփական երկիրը, ուրիշ ոչինչ:

Հիմա նույն բանը փորձեցինք անել Հայաստանում, և շատերը սվիններով ընդունեցին մեր գաղափարը, թե ինչպես կարելի է հանկարծ «Բարգավաճ Հայաստանի» հետ համագործակցել, չէ որ նրանք, չէ որ նրանք…իհարկե բոլորն էլ հասկացան, բոլորն էլ այդ համակարգի մաս էին, կոալիցիայի անդամ էլ էր Բարգավաճը: Բայց ի՞նչ վատ բան էր, եթե կարողանայինք իշխանությունից պոկել այսօր մեկին, վաղը մյուսին, հետո էն մյուսին: Քանի դեռ բուրժուազիան ու իշխանությունը սերտաճած են, հնարավոր չէ այս երկրում բան փոխել:
Մի կարծեք, թե մեզ չի հաջողվել այս հարցում որևէ բան փոխել: 2008-ին Խաչատուր Սուքիասյանն ո՞վ էր: Նորից այդ խոշոր բուրժուազիայի այդ օլիգարխիայի մի մասն էր, նույն վերաբերմունքը կար նրա նկատմամբ, ինչպես մյուսների:

Բայց եկավ, բացահայտ միացավ մեր շարժմանը: Ոչինչ չստացավ դրա դիմաց, հակառակը իշխանությունները առաջին հարվածը հասցրին հենց նրան: Իշխանությունները շատ ավելի լավ են հասկանում, քան այսպես կոչված քաղաքական ուժերը, նրանք հասկացան որտեղ է վտանգը և ամենադաժան հարվածը հասցրին հենց Խաչատուր Սուքիասյանին` պարզապես սնանկացնելով նրան:

Իսկ եթե իշխանությունից պոկվեն մի քանիսը կամ բոլորը, իշխանությունը անզոր կգտնվի նրանց բոլորի դեմ պայքարելու համար: Այսօր նույն ճանապարահն է ընտրել Գագիկ Ծառուկյանը և ինչ են անում` փոխանակ նպաստեն այդ պրոցեսին, անեն ամեն ինչ, որ դա գնալով խորանա: Այդ մարդը որևէ քայլ չարեց, որ կասկածներ հարուցի, որ նա իսկապես փորձում է փոխել իշխանությունը: Ես չեմ ասում որ նա լրիվ պոկվել է, նա չի կարող` հսկայական տնտեսություն ունի հազար ու մի բաներով կապված է:

Բայց փորձում է, գնում է այդ ճանապարհով: Քայլեր կատարում է` դուրս եկավ կոալիցիայից, չսատարեց Սերժ Սարգսյանին ընտրություններում, խորհրդարանական ընտրություններում առանձին մասնակցեց, չմասնակցեց երդմնակալության արարողությանը, այսօր պատրաստ է ավագանու ընտրություններում ճակատ տալ: Ինչպե՞ս կարելի է մի ուժ, որը նպաստում է, չեմ ասում պայքարում է մի չարիքի դեմ, վանել : Ես չեմ բացառում, որ առաջիկա ավագանու ընտրություններում լուրջ հարված ստանա Բարգավաճը, որովհետև Սերժը զգում է վտանգը և չի կարող թույլ տալ ունենալ այն հաջողությունը, ինչը ունեցավ խորհրդարանական ընտրություններում»:

Նշենք, որ ՀԱԿ կուսակցության հիմնադիր համագումարում միաձայն ՀԱԿ նախագահ ընտրվեց Լևոն Տեր-Պետրոսյանը: 


Նախորդիվ`

Լևոն Տեր-Պետրոսյանն ընտրվեց նախագահ (Տեսանյութ)

«Իմ մանկության երազանքը չի եղել Վովայի հետ աղոթելը». Տեր-Պետրոսյան (Տեսանյութ)


Լևոն Տեր-Պետրոսյան. Գագիկ Ծառուկյանը չի կարող պոկվել իշխանություններից (Տեսանյութ)

Կտրոնով հաց` ՀԱԿ-ի համագումարում (լուսանկարներ)