Ձեր վստահելի աղբյուրը

Պռոշյանի գյուղապետ Հրաչ Մուրադյանի սպանության մեջ մեղադրվող 31-ամյա Արայիկ Պետրոսյանը չի հասցրել գրկել-սիրել մարտի 31-ին ծնված իր երեխային. ապրիլի 2-ից նա կալանքի տակ է ԱԱԾ «Երևան-Կենտրոն» քրեակատարողական հիմնարկում: Պետրոսյանների բազմանդամ ընտանիքի համար դա բավական չէր ու ապրիլի 15-ին գիշերն էլ ձերբակալվել է Արայիկի եղբայրը՝ Արտակ Պետրոսյանը: Վերջինի ձերբակալությունը, սակայն, կապ չունի գյուղապետի սպանության հետ. նա կասկածվում է խուլիգանության համար, մեղադրանք դեռ չի առաջադրվել, կալանք չի կիրառվել: 

Եվ Պետրոսյանների փաստաբան Գիվի Հովհաննիսյանը, և Պետրոսյանների հայրը՝ Արշալույս Պետրոսյանը պնդում են, որ Արայիկ Պետրոսյանն անմեղ է, չի սպանել գյուղապետին, իսկ նրա նկատմամբ կիրառված կալանքը՝ ապօրինի:

Հիշեցնենք՝ Արայիկ Պետրոսյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 2-րդ կետով (Սպանությունը, որը կատարվել է անձի կամ նրա մերձավորի՝ կապված այդ անձի կողմից իր ծառայողական գործունեության կամ հասարակական պարտքի կատարման հետ) և 235-րդ հոդվածի 1-ին մասով (Ապօրինի կերպով հրազեն, բացի ողորկափող հրազենից և դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը):

«Տղաս այդ գործում անմեղ է, որովհետև ինքը եղել է տանը, արթնանալուց հետո, դուրս է եկել, տարել է երեխաներին դպրոց, բոլոր հարևաններն էլ տեսել են 9:20-ի սահմաններում Արտակը, հետո` Արայիկը դուրս են եկել աշխատանքի», -Panorama.am-ի թղթակցի հետ զրույցում պատմեց Արայիկ Պետրոսյանի հայրը՝ Արշալույս Պետրոսյանը: Նրա խոսքով, իր որդու և ընդհանրապես, իր ընտանիքի ու սպանված գյուղապետ դաշնակցական Հրաչ Մուրադյանի հարաբերությունները լավ են եղել, նրանց միջև ոչ մի թշնամանք չի եղել և հիմա էլ այդ բարեկամությունը շարունակվում է:

«Մարդկային հարաբերություններ են ունեցել, տարաձայնություններ չի եղել, գյուղում ոչ մեկը, առավել ևս գյուղապետի հարազատներն ու ընտանիքը չեն հավատում, որ Արայիկը նման բան կաներ: Ամպը գոռում է Արայիկը մտնում է տուն, զանավեսկեն քաշում է, մտնում է տեղաշորի տակը: Ուր մնաց զենքը ձեռքին մարդ սպանի», -ասաց Արշալույս Պետրոսյանը:

Այն, որ առաջադրված մեղադրանքը «ակնհայտ ապօրինի» է, պնդում է նաև Արայիկի փաստաբանը. Գիվի Հովհաննիսյանն ասաց, որ նախաքննական մարմինը որևէ հիմնավորում չի ներկայացրել Արայիկ Պետրոսյանին կալանավորելու համար: Հիմնավորում, թերևս համարվել է փորձագետի եզրակացությունը, որի համաձայն, Արայիկ Պետրոսյանի դեմքից և քթից, նրա կողմից դեպքի օրը շահագործված «ՎԱԶ-2121» մակնիշի ավտոմեքենայի սրահից դատաքիմիական փորձաքննությամբ հայտնաբերվել են կրակոցի արգասիքներ հանդիսացող անտիմոնի մետաղացման հետքեր:

Սակայն, փաստաբանի խոսքով դա չի կարող ապացույց լինել մարդուն կալանավորելու ու առավել ևս նրա նկատմամբ ծանր մեղադրանք առաջադրելու համար: Անտիմոնը, ըստ փաստաբանի, կենցաղում հաճախ է հանդիպում, հետևաբար Արայիկ Պետրոսյանի վրա էլ շատ հնարավոր էր դրա առկայությունը:

Այժմ փաստաբան Հովհաննիսյանը Կենտրոն և Նորք Մարաշ վարչական շրջանների ընդհանուր իրավասության դատարանի՝ 2-ամսյա կալանք կիրառելու մասին մարտի 5-ին կայացրած որոշումը բողոքարկելու համար Վերաքննիչ բողոք է ներկայացրել: Փաստաբանը հաստատակամ է՝ հայաստանյան դատական ատյաններում մերժումների դեպքում ապօրինի կալանքի մասին բողոքներն ուղղելու է Մարդու իրավունքների եվրոպական դատարան:

Ինչ վերաբերում է Արայիկի եղբոր՝ Արտակ Պետրոսյանի ձերբակալությանը, ապա, ըստ փաստաբանի, այս դեպքը կապ չունի գյուղապետի սպանության գործի հետ, սակայն որոշ առնչություն ունի գյուղապետի ընտրությունների հետ:

Արշալույս Պետրոսյանը պատմեց, որ դեռ սեպտեմբերին Պռոշյանում կայացած գյուղապետի ընտրություններից հետո, երբ վերընտրվել էր Հրաչ Մուրադյանը, նրա համակիրների կազմակերպած միջոցառման ժամանակ Արտակ Պետրոսյանի ու գյուղապետի համակիրների միջև քաշքշուկ է եղել, որը, սակայն շատ շուտ հարթվել է:

Փաստաբանը կասկածներ ունի, որ այս գործը փորձում են կապել սպանության գործի հետ, որպեսզի կարողանան հիմնավորել սպանության շարժառիթը: «Դրանով փորձում են հասարակությանը ցույց տալ՝ տեսեք գյուղապետի անվան հետ կապված քաշքշուկ է եղել, որ վեր է ածվում թշնամության ու հանգում սպանության: Բայց նման խնդիր չկա, որևէ վիճաբանություն գյուղապետի հետ չի եղել, որևէ թշնամանք չի եղել», -մեզ հետ զրույցում նշեց փաստաբան Գիվի Հովհաննիսյանը:

Արշալույս Պետրոսյանն ասաց, որ իր որդիները անչափահաս երեխաների խնամակալներ են, ընտանիքը պահողը և իր համար անհասկանալի է՝ ո՞ւմ էր ձեռնտու, որ իր երեխաները քավության նոխազ լինեին:

Հասմիկ Համբարձումյան