Ձեր վստահելի աղբյուրը

 Առջևում Երևանի ավագանու ընտրություններն են: Ինչպե՞ս է գնահատում նախընտրական քարոզարշավի առաջին տասնօրյակն ու, իհարկե, Երևանի առջև ծառացած խնդիրները «Առաքելություն» կուսակցությունը` մեզ ներկայացրեց կուսակցության  ցուցակը գլխավորող Մեսրոպ Առաքելյանը:

-Ի՞նչ առաջնային նպատակ է իր առջև դրել «Առաքելություն» կուսակցությունը առաջիկա Երևանի ավագանու ընտրություններում:
-«Առաքելություն» կուսակցությունը նոր է հայտնվել քաղաքական դաշտում և ճանաչելիության առումով զիջում է ընտրություններին մասնակցող մյուս քաղաքական ուժերին: Սակայն դա, կարծում եմ, նորմալ է: Ցանկացած կուսակցություն և քաղաքական գործիչ ինչ-որ մի պահի սկսում է իր գործունեությունը և հենց այդ պահից սկսում է հայտնի դառնալ հանրությանը:

Ինչ վերաբերում է Երևանի ավագանու գալիք ընտրություններին, ապա դրանք մեզ համար գերնպատակ չեն և այնպիսի տպավորություն չստեղծվի, որ կուսակցությունը սկսել է իր գործունեությունը, անցկացրել է իր հիմնադիր համագումարը բացառապես ավագանու ընտրություններին մասնակցելու համար: Ի տարբերություն քաղաքական դաշտում առկա մի շարք կուսակցությունների և ուժերի, մենք նոր ենք սկսում մեր քաղաքական գործունեությունը և այս ընտրություններից հետո մեր առջև ամենևին կանգնած չեն լինելու հուսահատության, քաղաքական գործունեությունը շարունակելու նպատակահարմարության, քաղաքական դաշտում լինել-չլինելու և նմանատիպ այլ հարցեր: Մենք միտված ենք դեպքի ապագա, դեպի մեր առջև դրված գլոբալ ծրագրերի իրականացում: Մենք կարծում ենք, որ ներկայումս ՀՀ քաղաքական դաշտում հասունացել է նոր քաղաքական սերնդի ի հայտ գալու անհրաժեշտությունը: Մենք Երևանի ավագանու ընտրություններին մասնակից միակ երիտասարդական ուժն ենք, միակ կուսակցություն ենք, որը երբևէ` որևիցե ձևաչափով իշխանության մաս չենք կազմել: Թող տպավորություն չստեղծվի, որ մենք ընդամենը օրիգինալ դրսևորման ցանկություն ունենք: Ամենևին: Մենք բոլորին հայտնի խնդիրների լուծման գործում առաջարկում ենք նոր, բավականին իրատեսական մոտեցումներ: Հաշվի առնելով այս ամենը, կարծում եմ, մենք կունենանք հանրության վստահության այն քանակը, որը և հնարավորություն կտա աստիճանաբար կյանքի կոչել մեր բոլոր ծրագրերը:

-Ինչո՞ւ պետք է ընտրողը իր ձայնը տա «Առաքելությանը»:
-Ես չէին ցանկանա այս պահին ներկայացնել մեր առավելությունները, կամ փնովել այլ քաղաքական ուժերի: Մենք ներայացրել ենք խնդիրների բավականին արդյունավետ և իրատեսական լուծումներ:

-Նախընտրական փուլում, կարծես թե, առաջին պլան է եկել հետևյալ բանավեճը՝ Ավագանու ընտրությունները քաղաքակա՞ն, թե՞ ապաքաղաքական պրոցես է: Ո՞րն է այս հարցում Ձեր տեսակետը:
-Քաղաքական, թե` կենցաղային ընտրություներ բանավեճը և նմանատիպ տարանջատումը մեզ համար այդքան էլ ընդունելի չէ: Սկսենք նրանից, որ եթե ընտրություններին մասնակցում են քաղաքական կուսակցությունները, բնական է, որ ընտրություններ արդեն իսկ քաղաքական են: Ընդ որում` եթե համեմատելու լինենք խորհրդարանական ընտրությունների հետ, ապա Երևանի ավագանու ընտրությունները անցկացվում են բացառապես համամասնական ընտրակարգով: Այսինքն` որևէ այլ ձևով Երևանի ավագանում ներկայացված լինելու հնարավորություն ներկայիս ընտրական համակարգը չի ընձեռում: Անշուշտ Երևանում առկա են խնդիրներ որոնք պահանջում են, քաղաքի` որպես համայնքի գործառույթների շրջանակներում լուծումներ: Սակայն այստեղ կա մի շատ կարևոր հանգամանք: Մենք չենք բացառում քաղաքական գործոնը, քանի որ քաղաքական կուսակցությունների դիրքորոշումը, նախկինում իրենց ներկայացած ծրագրերը պատկերացում են տալիս այն մասին, թե ինչ սկզբունքներով են իրենք պատրաստվում լուծել այս կամ այն խնդիրը:

-Ինչպե՞ս կգնահատեք նախընտրական քարոզաշավի առաջին տասնօրյակը: Ներկա պահին ինչպե՞ս եք գնահատում ձեր հնարավորությունները առաջիկա ընտրություններում:
-Քարոզարշավի առաջին տասնօրյակը մեր կուսակցության համար գնահատում ենք դրական: Այն ինչ-որ պլանավորել էինք իրականացրել, իրականացվել է: Քարոզչության իրականացման ընթացքում որևէ խոչնդոտ, բացառությամբ որոշ դեպքերում անբարենպաստ եղանակի, մենք չենք հանդիպել: Կցանկանայի նշել, որ Երևանի ավագանու ընտրությունների նպատակի, ձևաչափի վերաբերյալ հասարակության տեղեկացվածության աստիճանը բավականին ցածր է:

-Երևան քաղաքի առջև ծառացած խնդիրներից որո՞նք են, ձեր կարծիքով, պահանջում հրատապ լուծում:
-Հանրության առջև ծառացած հարցերից կարևոր է, նախևառաջ, քաղաքային տրանսպորտի գործունեության բարելավման և կանոնակարգման խնդիրը: Բոլոր քաղաքական ուժերը բնականաբար արծարծել են այդ խնդիրը: Եվ դա բնական է: Եթե հասարակության 80-90 տոկոսը առնչվում է այս խնդիր հետ, այն ինքնստինքյան դառնում է առաջնային:

-Դուք ձեր ծրագրում ներառել եք տրանսպորտային սպասարկումը բացառապես քաղաքապետարանին հանձնելու դրույթը: Ինչպե՞ս եք տեսնում դրա իրագործումը:
-Ներկայումս 10-15 ընկերություններ Երևան քաղաքում իրականացնում են տրանսպորտային սպասարկում: Որևէ պարագայում մասնավոր սեկտորից ինչ-որ բան խլել մենք չենք պատրաստվում: Դա առհասարակ հակասում է մեր կուսակցության ծրագրային դրույթներին, այն առումով, որ մենք առհասարակ շուկայի ազատականացման կողմակից ենք: Սակայն մենք կարծում ենք, որ այն ամենը, ինչ հանրային բարիք է, այսինքն գինը և որակը չի ձևավորվում հանրային առաջարկի և պահանջարկի արդյունքում, պետք է կառավարվի համայնքի մասնակցությամբ: Այսօր տրանպորտային համակարգում առկա է սահմանված գին և սահմանված պայմանական որակ: Սա արտադրանք չէ, որ քաղաքապետարանը սկսի ինչ-որ բան արտադրել և պետական վարչական լծակների շնորհիվ խնդիրներ առաջացնի մրցակցային ոլորտում: Տրանսպորտային սպասարկումը բացառապես քաղաքապետարանին հանձնելու գործառույթը կարող է տեղի ունենալ աստիճանաբար: Ներկայումս մասնավոր ընկերություններում աշխատում են վարորդներ, որոնք կարող են շարունակել աշխատել արդեն նոր համակարգի գործունեության պայմաններում: Այս նորարարությունը Երևանին կտա համակարգային սպասարկում, կլինեն ընդհանուր ստանդարտներ և մոտեցումներ: Ներկայումս մասնավոր ընկերությունների գործունեության արդյունքում, նույնիսկ ներկայիս անարդյունավետ և անկազմակերպ համակարգի պայմաններում, տարեկան 5-6 մլրդ դրամ շահույթ է գոյանում: Որակի, արդյունավետության, կենտրոնացվածության պայմաններում հնարավոր է այդ շահույթը հասցնել մինչև 9 մլրդ դրամի: Դա իր հերթին հնարավորություն կտա մեկ տարում փոխել ամբողջ տրանսպորտային պարկը: Սույն թվերը մանրակրկիտ հաշվարկի արդյունք են: Մեր տնտեսական խումբը, ուսումնասիրելով մասնավոր ընկերությունների գործունեությունը, իրականացրել է սույն հաշվարկը:

-Ձեր ծրագրում ներառված է նաև Մետրոպոլիտենի ցանցի ասիճանական ընդլայնման հարցը: Հաշվի առնելով այն հանգամանքը, որ սույն ծրագրերի իրականացումը կապված է ահռելի գումարների հետ, ինչպե՞ս եք պատկերացնում դրանց կյանքի կոչման տեսլականը:
-Կարծում եմ, որ մետրոպալիտենի ցանցի ընդլայնման հարցը առկա է եղել բոլոր իշխանությունների օրոք: Ոչ ոք չի հերքում, որ դա իրոք կապված է ահռելի գումարների հետ: Դա մեր ծրագրային այն եզակի կետերից մեկն է, որտեղ մենք դիտարկում են խնդիր աստիճանական լուծում: Այստեղ մենք որևէ պոպուլիստական նպատակ չենք հետապնդում: Կարծում եմ, որ ամբողջ քաղաքով մեկ մետրոպոլիտենի ցանցի ընդլայումը հավանական է, որ նույնիսկ հնարավոր չլնինի իրականացնել ավագանու գործունեության չորս տարի ընթացքում: Պահանջվելիք գումարների իրոք ահռելի են, և նույնիսկ դրանց առկայության դեպքում առկա են լուծանը սպասող շատ ավելի հրատապ խնդիրներ:

Այնուամենայնիվ, մենք գտնում ենք, որ նույնիսկ մետրոպոլիտենի ներկա ցանցի պարագայում առկա է ուղևորների հոսքի ավելացման հնարավորություն, ինչը հնարավորություն կտա ավելացնել եկամուտները և իրականացնել աստիճանական ընդլայնում: Այսօրվա մետրոպոլիտենի կայարանները այդքան էլ արդյունավետ տեղակայված չեն: Այսօր մետրոպալիտենի ամենաակտիվ կայարանը դա «Բարեկամություն» կայարան է: Դա պայմանավորված է ոչ թե նրանով, որ այստեղ քաղաքի ամենաբանուկ հատված է, այլ նրանով որ «Բարեկամության» կայարանը ներգրավված է համանուն հրապարակի գետնանցումային ցանցին: Մենք գտնում ենք, որ մետոպալիտենի ցանցը պետք է միանա կայարանի մոտակա գետնացումային ցանցին: Դրա վառ օրինակը կարող է հանդիսանալ, «Երիտասարդական» մետրոյի և մոտակա գետնացումների ցանցի միավորումը: Սա ստեղծում է լրացուցիչ հարմարավետություն և քաղաքացիները հակված են օգտվել Մետրոպոլիտենի ծառայություններից, քան թե այլ տրանսպորտային միջոցներից: Այս ամենը հնարավորություն կտա ավելի արդյունավետ դարձնել մետրոպոլիտենի գործունեությունը, այն դարձնել շահութաբեր:

-Եթե «Առաքելություն» կուսակցությանը չհաջողվի ներգրավվել Երևանի ավագանու կազմում, ինչպիսի՞ քաղաքական գործունեություն է պատրաստվում իրականացնել կուսակցությունը այդ դեպքում:
-Իհարկե, մենք որևիցե պարագայում այդ սցենարը չենք քննարկում: Սակայն հարկ է նշել, որ մեր կուսակցությունը միտված է ապագայում իրականացնել լրջագույն ծրագրեր: Անկախ Երևանի ավագանու կազմում մեր մասնակցության աստիճանից: Ինպես դուք նշեցիք, տեսականորեն չբացառելով Երևանի ավագանու կազմում ներկայացած չլինելու հնարավորությունը, մենք փորձելու ենք մեր ծրագրերը քայլ առ քայլ ներկայացնել հանրությանը: Մենք կարծում ենք, որ ՀՀ յուրաքանչյուր քաղաքացի պետք ստանձնի պատասխանատվություն երկրում ստեղծված ներկա իրավիճակը շտկելու գործում: Բնակչության 90 տոկոսը այսօր միայն պահանջում է խնդիրների լուծում, այնինչ այսօր յուրաքանչյուրը պետք ստանձնի այդ պատասխանատվությունը, յուրաքանչյուրը ունի սույն խնդիրները լուծելու առաքելություն: Մեր առաքելությունը հանրությանը պահանջատեր դարձնել է:

Մենք երաշխավորում ենք, որ որևիցե պարագայում չենք պատրաստվում կասեցնել կամ սառեցնել քաղաքական գործունեությունը: Այստեղ կարևոր է այն փաստը, որ առկա խնդիրները և առկա իրավիճակը մենք իրատեսական ենք գնահատում և չենք պատրաստվում հուսահատվել: Միևնույն ժամանակ մենք մեզ ազգի փրկիչներ չենք հայտարարում և սին խոստումներ չէին տալիս, որ վաղվանից ամեն ինչ լավ է լինելու: Քայլ առ քայլ մենք իրականացնելու ենք մեր առաքելությունը: