Հայաստանյան որոշ բանկեր լուրջ խնդիրներ ունեն
Հայաստանի բանկային համակարգում ճգնաժամ է հասունանում: Հիմնական պատճառը, ըստ «Ժողովուրդ»-ի տեղեկությունների, կապված է վարկային համակարգի հետ: Բանն այն է, որ մի շարք խոշոր գործարարներ մեծ թվով տարաբնույթ վարկեր են վերցրել ու հիմա չեն կարողանում մարել: Օրինակ` գործարարներից մեկն իր կոնյակի գործարանն է գրավադրել` ցույց տալով, թե քանի տակառ կոնյակ ունի, սակայն ամիսներ անց կոնյակը վաճառել է, և հիմա բանկերից մեկը բացահայտել է, որ տակառները դատարկ են. կա միայն գործարանի շենք: Նման մի պատմություն էլ թռչնաֆաբրիկայի սեփականատերերից մեկն է սարքել, փաստաթղթեր է ներկայացրել, սակայն հիմա ֆաբրիկան չկա:
Բանկային խնդիրն ավելի է սրվել «Արմավիա»-ի սննկացումից հետո, քանի որ տարբեր բանկերի այս ընկերության վարկային պարտքերը հասնում են 50-60 մլն դոլարի:
«Ժողովուրդ»-ի աղբյուրների պնդմամբ`իրավիճակը լրջորեն մտահոգել է նաև Կենտրոնական բանկին, որտեղ խորհրդակցություններ են անցկացվել: Եվ ահա երեք օր առաջ ՀՀ ԿԲ խորհրդի նիստում անդրադարձ է եղել բանկերի կողմից վարկերի տրամադրման պայմաններին:
Թերթը նշում է, որ այս համատեքստում շրջանառվում են հետեւյալ բանկերի անունները՝ «Զարգացման հայկական բանկ», «Հայբիզնեսբանկ», «Արդշինինվեստբանկ», հարթ չէ իրավիճակը նաև «ՎՏԲ-Հայաստան բանկում»: