Ձեր վստահելի աղբյուրը

«Հայաստանի միջնակարգ դպրոցներում ավելի քան 120 անուն գրքեր կան, որոնց մեծ մասը արդեն տարիների շարունակ գործում են, ընդունված են ուսուցիչների կողմից: Իհարկե, կան մի քանի գրքեր, որոնք չեն համապատասխանում սահմանված պահանջներին: Դրանք անընդհատ թարմացվում են կրթության և գիտության նախարարության կողմից հայտարաված մրցույթներով»,- լրագրողների հետ հանդիպման ժամանակ ասաց 1-4-րդ դասարանների մաթեմատիկայի դասագրքերի հեղինակ, «Զանգակ» հրատարակչության գլխավոր տնօրեն Սոկրատ Մկրտչյանը: Նրա խոսքով, սահմանված չափորոշիչներին չհամապատասխանող գրքերը փոխարինվում են նորերով, այսինքն՝ «անընդհատ փոխարինում է տեղի ունենում»:

Դասագրքերում, ըստ Ս. Մկրտչյանի, պետք է ներկայացված լինեն պետական չափորոշիչներով նախատեսված առարկայական ծրագրերի բոլոր կետերը, լինեն պարզ, մատչելի լեզվով գրված, իսկ տարրական դասարանների դասագրքերի դեպքում, հաշվի առնելով երեխաների տարիքային առանձնահատկությունները, շարադրանքը պետք է այնպես լինի, որ յուրաքանչյուր միտք, առաջադրանք հասանելի լինի նրանց: «Բազմաթիվ պահանջներ կան, որոնք պետք է բավարարվեն: Իսկ թե բավարարվում են այդ պահանջներին, թե ոչ՝ արդեն երևում է այն ժամանակ, երբ դասագիրքը գործում է դպրոցներում կամ անցնում են փորձաշրջան»,- ասաց նա:

Ս. Մկրտչյանի խոսքով, դասագրքերին ներկայացված ու մանկավարժական ամենագլխավոր պահանջներից մեկն այն է, որ այն բովանդակային միջուկից բացի, նպաստի երեխաների սոցիալիզացմանը. օրինակ մաթեմատիկայի դասագիրքը զուտ մասնագիտական գիտելիքներից պետք է կարողանա լուծել աշակերտի սոցիալականացման խնդիրը, հասարակության անդամ դառնալու խնդիրը: «Այսօր մեր դասագրքերի գերթե մեծ մասը լուծում են այդ խնիդրը»,- համոզված է նա:

Հրատարակիչը նաև նշեց, որ դասագրքերի մեծամասնությունը համապատասխանում է նաև առողջապահության նախարարության կողմից հաստատված նորմերին. «2006 թվականից գործում են առողջապահության նախարարության կողմից հաստատված նորմեր, որոնք պարտադրվում են մեզ կրթության և գիտության նախարարության կողմից: Դասագրքերը նախքան դպրոց մտնելը անցնում են համապատասխան լաբորատորիայով, որը իրականացնում է առողջապահության նախարարությունը՝ ստուգելով թղթի, կազմի որակը, գրքի քաշը, այն ներկերը, որոնցով տպագրվել է գիրքը, տառատեսակների չափերը: Եթե չեն բավարարում սահմանված նորմերը, հրատարակչությունը տուգանքների է ենթարկվում, հաջորդ անգամ զրկվում է մրցույթին մասնակցելու հնարավորությունից»: