Ձեր վստահելի աղբյուրը

Երևան է ժամանել Ռոբերտ ֆոն Ռեկովսկին, ով համաշխարհային ակտիվների կառավարման ոլորտում ունի ավելի քան 23 տարվա աշխատանքային փորձ: Հայաստանում նա կունենա գործնական հանդիպումներ և իր հարուստ փորձն ու գիտելիքները կկիսի հայ գործարարների հետ:

Ռոբերտ ֆոն Ռեկովսկին Ամերիաբանկի Տնօրենների խորհրդի անկախ անդամ լինելուց բացի, հանդիսանում է Fidelity Investments ընկերությունում Emerging Markets Strategy-ի (որն աջակցում է զարգացող երկրների կապիտալի և ֆիքսված եկամտով գործառնությունների շուկաների բաժիններին) փոխնախագահը: Fidelity Investments-ը ֆինանսական ծառայությունների շուկայում աշխարհի խոշորագույն ընկերություններից է, որի կառավարման տակ գտնվող ակտիվները 2012թ. դեկտեմբերի դրությամբ կազմում էին շուրջ 1,4 տրիլիոն ԱՄՆ դոլար: Նա կառավարել է ամերիկյան և կանադական ներդրողների մի շարք ինստիտուցիոնալ և մանրածախ ներդրումային հիմնադրամներ զարգացող շուկաներում: Ի թիվս այլ պաշտոնների, նա Բոստոնի արտաքին հարաբերությունների կոմիտեի, Բոստոնի տնտեսագիտական ակումբի (Boston Economic Club) և World Boston-ի անդամ է: 2012թ-ի հունիսից Ռեկովսկին հանդիսանում է «Ամերիաբանկ» ՓԲԸ տնօրենների խորհրդի անկախ անդամ:

Ինչպես լրագրողների հետ հանդիպման ժամանակ նշեց Ամերիաբանկի զարգացման տնօրեն Տիգրան Ջրբաշյանը, Ռոբերտ ֆոն Ռեկովսկին ունի համաշխարհային ճանաչում և մեծ փորձառություն ակտիվների կառավարման ոլորտում: Նրա խոսքերով` Ռեկովսկին հանդիսանում է զարգացող շուկաների հիմնական ներդրողներից մեկը համաշխարհային մակարդակով:

«Հետաքրքիր է նաև Ռեկովսկու դերակատարումը որպես Ամերիաբանկի խորհրդի անկախ անդամի: Նա իր ներկայությամբ կօժանդակի բանկի զարգացմանն ու ծրագրերի իրականացմանը»,- ասաց Տ.Ջրբաշյանը:
Ռոբերտ ֆոն Ռեկովսկին նշեց, որ իր համար կարևոր նշանակություն ունի անկախ անդամի դերի ստանձնումը Ամերիաբանկում: Նա հայտնեց, որ մի քանի տարի առաջ «Հայաստան 2020» նախագծի շրջանակներում համագործակցել է հայ գործարարների հետ: Ի դեպ նա եղել է այդ նախագծի համակարգող խորհրդի անդամ:

Պատասխանելով հարցին, թե ինչո՞վ է պայմանավորված Հայաստանի հանդեպ հետաքրքրությունը, Ռ. Ֆոն Ռեկովսկին նշեց, որ Հայաստանի հանդեպ հետքրքրությունը ձևավորվել է «Հայաստան 2020» նախագծի շրջանակներում: «Այդ նախագծի ընթացքում էլ իմ հետաքրքրությունը Հայաստանի նկատմամբ աճեց: Բացի այդ, ես ունեմ հայկական արմատներ` մորական կողմից և այցելելով Հայաստան`ցանկություն ունեցա այստեղ ևս օգտագործել իմ գիտելիքներն ու փորձը»,- ասաց նա:

Խոսելով Ամերիաբանկի կառավարման համակարգում իր դերի մասին, նա հայտնեց, որ բազմաթիվ զարգացող շուկաների հարյուրավոր ընկերություններում կատարելով ներդրումներ` հուսով է, որ կկարողանա օգտակար լինել Ամերիաբանկին՝ իր հետ բերելով կորպորատիվ կառավարման լավագույն փորձի վերաբերյալ իր գիտելիքներն ու փորձը:

Անդրադառնալով Հայաստանի տնտեսությանը` Ռեկովսկին նշեց, որ հաշվի առնելով մի շարք ոլորտներում գրանցված աճի բարձր տեմպերը` ներդրումների տեսանկյունից Հայաստանի շուկան կարելի է համարել զարգացող: «ԱՊՀ երկրների համեմատ Հայաստանի տնտեսության տարբեր ոլորտներում աճի տեմպեր են գրանցվում: Իհարկե արժեթղթերի շուկայում ներդրումների հնարավորությունը բավականաչափ սահմանափակ է, սակայն հուսադրող են կենսաթոշակային ոլորտում բարեփոխումները: Կարծում եմ, որ դրա արդյունքում իրավիճակը կարող է դեպի լավը փոխվել»,- նշեց Ռեկովսկին:

Նշենք, որ լրագրողների հետ հանդիպումից հետո Ռոբերտ ֆոն Ռեկովսկին մասնակցեց «Գլոբալ տնտեսական հեռանկարները և զարգացող շուկաների դերը» թեմայով քննարկմանը, որը կազմակերպվել էր Ամերիա ընկերությունների խմբի և Համաշխարհային տնտեսական համաժողովի Global Shapers Community-ի երևանյան գրասենյակի հետ համատեղ: