Ձեր վստահելի աղբյուրը

Մարդու իրավունքների պաշտպան Կարեն Անդրեասյանը, պարզվում է, իսկապես չի ցանկանում կամ քայլեր չի ձեռնարկում, որպեսզի գրասենյակի աշխատակիցները վերջապես վերապատրաստվեն ու ստանան պետական ծառայողի դասային աստիճան: Այդ եզրակացությանն ենք եկել ավելի վաղ մեր հրապարակած «Մարդու իրավունքների պաշտպանի գրասենյակում իրավունքներ են խախտվում. Մեղավորը կառավարությո՞ւնն է» հոդվածին ՀՀ Ֆինանսների նախարարության արձագանքից:

Ընթերցողին տեղեկացնենք, որ Մարդու իրավունքների պաշտպանի աշխատակազմի մի խումբ ներկայիս ու նախկին աշխատակիցներ Panorama.am-ի թղթակցի հետ զրույցում դժգոհել էին, թե երկար ժամանակ աշխատելով գրասենյակում որպես պետական ծառայողներ չեն կարողանում ստանալ դասային աստիճան ու իրենց համար դժվար է այլ հիմնարկում աշխատանքի անցնելը: Նախորդ հոդվածում մանրամասն, վկայակոչելով օրենսդրական կարգավորումները, տեղեկացրել էինք նաև ինչպես պետք է ծառայողները ստանան աստիճան, նշել էինք , որ այն ստանալու համար պետք է վերապատրաստվեին, իսկ վերապատրաստումը պետք է կատարվեր պետական միջոցներով: ՄԻՊ գրասենյակից հայտնել էին, որ իրենք դիմել են կառավարությանը, սակայն մերժում էին ստացել, և գումարներ չէին հատկացվել աշխատողների վերապատրաստման համար:

Ներկայացնում ենք Ֆինանսների նախարարության լրատվական ծառայության գրավոր պատասխանը գումարներ հատկացնելու մասին մեր հարցմանը.

«Յուրաքանչյուր տարվա բյուջետային գործընթացն սկսվում է ՀՀ վարչապետի համապատասխան որոշմամբ, որով սահմանվում են ինչպես միջնաժամկետ, այնպես էլ տվյալ տարվա բյուջետային հայտերի ներկայացման կարգը, ժամանակացույցը, իսկ անհամաձայնության դեպքում` առարկությունների ներկայացման ընթացակարգը:

ՀՀ ֆինանսների նախարարության մեթոդական ցուցումներով տրվում են հայտերի հաշվարկների և ձևաչափերի կազմման և ներկայացման մանրամասն ցուցումները: Նշված հայտերի հիման վրա ՀՀ կառավարության որոշմամբ միջնաժամկետ կտրվածքով /3-տարիների համար/ սահմանվում են ծրագրերի ֆինանսավորման չափաքանակները, ինչն էլ հիմք է հանդիսանում դրանք տվալ տարվա ՀՀ պետական բյուջեի նախագծում ընդգրկելու համար:

Մարդու իրավունքների պաշտպանի գրասենյակի կողմից վերապատրաստումների մասով չեն պահպանվել բյուջետային հայտերի ներկայացման վերոնշյալ պահանջները և այդ տարիների միջնաժամկետ ծախսերի ծրագրերում նրա համար ֆինանսավորման չափաքանակներ չեն սահմանվել, իսկ ներկայացված հայտերը տվյալ տարիների բյուջեների նախագծերում չեն ընդգրկվել: Միաժամանակ, պետական բյուջեի նախագծում չընդգրկվելու հետ կապված, Մարդու իրավունքների պաշտպանի գրասենյակից որևէ առարկություն չի ստացվել, հետևաբար` նաև լրացուցիչ չի քննարկվել:

Տեղեկացնում ենք նաև, որ Մարդու իրավունքների պաշտպանի գրասենյակի կողմից սահմանված կարգով ներկայացվել են ՀՀ 2014-2016 թվականների պետական միջնաժամկետ ծախսերի ծրագրի հայտերը և ներկայումս գտնվում են քննարկման փուլում»:

Նախորդող հրապարակում. Մարդու իրավունքների պաշտպանի գրասենյակում իրավունքներ են խախտվում. Մեղավորը կառավարությո՞ւնն է