Լևոն Խալիկյան. «Հայաստանում և Եվրոպայում վաճառվող ապրանքը պետք է լինի նույն որակի»
«ՀՀ շուկայի վերահսկողության պետական տեսչության ինստիտուցիոնալ կարողությունների հզորացում և ներդաշնակեցում ԵՄ չափանիշներին» Թվինինգ ծրագրի նպատակն է Հայաստանի շուկայի վերահսկողությունը մոտեցնել Եվրոպական չափանիշներին: Այս մասին Panorama.am-ի հետ զրույցում նշեց ՀՀ էկոնոմիկայի նախարարության Շուկայի և սպառողների շահերի պաշտպանության պետական տեսչության պետ Լևոն Խալիկյանը:
Նա դրական գնահատելով 2012 թվականի մայիսից Հայաստանում մեկնարկած Թվինինգ ծրագրի ընթացքը,, նշեց, որ ծրագրի արդյունքում կունենանք արդիական ու արդյունավետ գործող ՀՀ շուկայի վերահսկողության պետական տեսչություն, շուկայի պատշաճ վերահսկողություն, ինչպես նաև բարելավված գործարար մթնոլորտ: «Մեր նպատակն է, որպեսզի Հայաստանում վաճառվող ապրանքը լինի նույն որակի, ինչ Եվրոպայում է»,- ընդգծեց տեսչության պետը:
Ըստ Լ.Խալիկյանի՝ ծրագրի մեկնարկից սկսած Եվրոպայից ժամանած փորձագետները մասնակցել են տեսչության կողմից իրականացված ստուգումներին, ինչպես նաև՝ նոր օրենսդրական նախաձեռնությունների մշակմանը: Բացի այդ, տեսչության աշխատակիցները մասնակցել են Մեծ Բրիտանիայում և Լիտվայում կազմակերպված ստուգումներին: Այս տարի ևս, ըստ Լ.Խալիկյանի, տեսչության աշխատակիցները կմեկնեն Մեծ Բրիտանիա և Լիտվա՝ մասնակցելու այնտեղ կազմակերպվող ստուգումներին:
Լևոն Խալիկյանն ասաց, որ տեսչությունն անցել է նոր ռիսկերի վրա հիմնված ստուգումների իրականացմանը, այսինքն՝ թեթևացվել է տնտեսավարող սուբյեկտների բեռը, և վերջիններիս մոտ չեն կարող ցանկացած պահի տեսուչների կողմից կամովի ստուգումներ իրականացվել։ Ըստ տեսչության պետի, ստուգումները պետք է լինեն հիմնավորված և ռիսկերի հիման վրա գնահատված։
Նա տեղեկացրեց, որ ստուգումներն իրականացվելու են երեք աստիճանով՝ բարձր, միջին և ցածր ռիսկայնության խմբեր: Բարձր ռիսկայնության խմբում ստուգումները կիրականացվեն տարին մեկ անգամ, միջինում՝ երեք տարին մեկ, իսկ ցածրում՝ հինգ տարին մեկ անգամ: Լ.Խալիկյանը նշեց, որ մինչ օրս տնտեսավարողները տեղյակ չէին իրենց մոտ կայանալիք ստուգումների մասին, սակայն տարեսկզբից էկոնոմիկայի նախարարության պաշտոնական կայքում տեղադրվել է ինֆորմացիա այն տնտեսվարողների մասին, որոնց մոտ այս տարի իրականացվելու են ստուգումներ։ Այժմ պարզ ու թափանցիկ ներկայացված է նաև ստուգուների ողջ ընթացքը։
«Մեր նպատակն է շուկայում բացառել խախտումները, եթե տնտեսվարող սուբյեկտները տեղյակ են, որ այդ տարի իրենց մոտ կատարվելու են ստուգումներ, ապա նրանք կփորձեն առանց խախտումների աշխատել»,- ասաց Լ.Խալիկյանը: Նա նաև նշեց, որ տեսչության մոնիթորինգի բաժինը հսկողություն է իրականացնում և եթե նկատի, որ խախտումներ կան, բնականաբար, դա կարձանագրի:
Հիշեցնենք, որ 1 մլն եվրո ընդհանուր բյուջեով Թվինինգ ծրագիրը Հայաստանում իրականացվում է Հյուսիսային Իռլանդիայի Անդրծովյան համագործակցության, Լիտվայի Ոչ պարենային ապրանքների պետական տեսչության, ինչպես նաև ՀՀ էկոնոմիկայի նախարարության Շուկայի և սպառողների շահերի պաշտպանության պետական տեսչության օժանդակությամբ:
Նախորդող հրապարակում` Փորձաքննության ենթարկված հայկական ապրանքներն առանց արգելքի կարտահանվեն ԵՄ երկրներ
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
