Ձեր վստահելի աղբյուրը

Այսօր «Ժողովուրդ» թերթի հայցը մերժելը Հայաստանում ստեղծված հակասահմանադրական իրավիճակի հետևանք է:

Այդ մասին Panorama.am-ի թղթակցի հետ զրույցում ասաց «Արնի Քնսալթ» փաստաբանական գրասենյակի փոխտնօրեն, փաստաբան, տեղեկատվական վեճերի խորհրդի անդամ Արա Ղազարյանը` մեկնաբանելով Աջափնյակ և Դավթաշեն վարչական շրջանների ընդհանուր իրավասության դատարանի` «Ժողովուրդ» թերթի հայցը մերժելու մասին որոշումը:

Հիշեցնենք` թերթի լրագրող Սոնա Գրիգորյանը խնդրում էր գործարար Խաչիկ Խաչատրյանից ներողություն խնդրել հարցազրույց վերցնելու ընթացքում լրագրողին վիրավորելու և նրան «պռաստիտուտկա» անվանելու համար:

«Դատարանն այլ բան չէր կարող անել, որովհետև մենք Հայաստանում ունենք հակասահմանադրական իրավիճակ, այն է` ոչ հրապարակային վիրավորական կամ զրպարտող բյնույթի հայտարարությունների դեմ քաղաքացիները պաշտպանված չեն, որովհետև չկա իրավական կարգավորում», -հավելեց փաստաբանը

Նրա խոսքով, Քաղաքացիական օրենսգրքի 1087 հոդվածը և Վճռաբեկի նախադեպային որոշումը (2012 թվական) պաշտպանում են միայն հրապարակային հայտարարությունները:

Փաստաբանը մեկնաբանելով Վճռաբեկի նախադեպային որոշումը, ասաց, որ ձայնագրությունը, որը արված է հեռախոսով հրապարակայնություն չի կարող ապահովել: «Վճռաբեկ դատարանն ասում է, որպեսզի հրապարակային լինի հայտարարությունը պետք է այնպես լինի, որ հայտարարության պահին երրորդ անձը ՀԱՂՈՐԴԱԿԻՑ դարձվի: Հրապարակային չէ նաև, եթե նման դեպքերում անձը միջոցներ է ձեռնարկել, որպեսզի հայտարարությունը հրապարակային չդառնա, օրինակ, եթե Ձեզ էլեկտրոնային նամակ եմ ուղարկում և երրորդ անձին չեմ ուղարկում նույն նամակը, ապա դա ոչ հրապարակային հայտարարություն է համարվում: Իսկ ահա փողոցում մի քանիսի ներկայությամբ արված վիրավորանքը կարող է հրապարակային համարվել», -հավելեց փաստաբանը:

Եվ քաղօրենսգիրքը, և Վճռաբեկ դատարանը քաղաքացիներին չի պաշտպանում ոչ հրապարակային վիրավորական արտահայտություններից: «Այդ արտահայտությունների առջև մարդիկ անպաշտպան են, և սա հակասահմանադրական իրավիճակ է, ու «Ժողովուրդը» ունի հնարավորություններ և շատ օգտակար գործ արած կլինի, եթե այս գործը հասցնի մինչև վերջ ու դիմի Սահմանադրական դատարան», հավելեց փաստաբանը:

Բացի այդ, Սահմանադրական դատարան դիմելու համար այս պարագայում մեկ այլ բարենպաստ իրավիճակ էլ կա և դա Սահմանադրական դատարանի թիվ 914 որոշումն է, որի համաձայն «օրենսդրական բացը կարող է հանդիսանալ Սահմանադրական դատարանի քննության առարկա միայն այն դեպքում, երբ օրենսդրության մեջ առկա չեն այդ բացը լրացնելու այլ իրավական երաշխիքներ»:

«Շատ մեծ հնարավորություններ ունի «Ժողովուրդը» որ եթե այս գործը տանի Սահմանադրական դատարան կարող է ստեղծվել նախադեպ կամ Սահմանադրական դատարանի որոշում, որից հետո օրենսդիրը փոփոխություններ կանի օրենքում», -նկատեց փաստաբանը:

Ահա հենց այս հակասահմանադրական իրավիճակում դատարանը, ըստ Արա Ղազարյանի, որոշում է կայացրել, և դա օրինաչափ որոշում է ու բխում է օրենքից: «Դատարանն այլ որոշում չէր կարող ընդունել, նա մեկնաբանել է, հիմնվել է իր նախադեպային որոշումների վրա: Օրինաչափ որոշում է, բայց օրենքը չի արտահայտում իրավունքը իր ամբողջ ուժով, այսինքն` օրենքը թերի է», -հավելեց փաստաբանը:

Նա ասաց, որ կխորհրդակցի Տեղեկատվական վեճերի խորհրդի անդամների հետ ու հնարավոր է ՏՎԽ-ն կարծիք կհրապարակի այս գործի առնչությամբ:

Նախորդող հրապարակում. «Պռաստիտուտկա»-ն վիրավորանք չէ՞. Դատարանը մերժել է «Ժողովուրդ» թերթի հայցը