Ձեր վստահելի աղբյուրը

Պոլսո հայոց պատրիարքի փոխանորդ Արամ արքեսպիկոպոս Աթեշյանը թուրքական հեռուստաընկերություններից մեկին տված հարցազրույցում ասել է, որ Թուրքիայում 100 հազար ծպտյալ հայ է ապրում:

«Իհարկե, խոսքն այսօրվա սերունդի մասին է, ում ծնողները հայեր են: Թուրքիայում այսօր հայ ծնողներ ունեցող, սակայն մահմեդական ներկայացող, հայերեն իմացող, թաքուն խաչ կրող մոտ հարյուր հազար հայ կա: Իսկ եթե խոսենք նրանց մասին, ում տատիկ պապիկներն են հայեր, ապա նրանց թիվը կհատի միլիոնը»-ասել է Աթեշյանը:

Ըստ թուրքական «Հաբեր7» լրատվական կայքի` նա նաև նշել է, որ այդ ծպտյալ հայերը եկեղեցի չեն գալիս, որպեսզի ինքնությունը չբացահայտվի: Քրիստոնեություն չեն ընդունում` վախենալով, որ կհեռացվեն աշխատանքից, հատկապես նրանք, ովքեր պետական համակարգում են աշխատում: Ըստ Աթեշյանի` այնուամենայնիվ, կան որոշները, ովքեր խիզախություն են ցուցաբերում ու գնում են եկեղեցի:

«Օրինակ անցած Սբ. Զատիկին, Ստամբուլի արարողություններից հետո, Դիարբեքիրում պատարագ մատուցեցի, մոտ 400 հոգի մասնակցեց»,-նշել է Աթեշյանը ու ավելացրել, որ Թուրքիայի Թունջելի շրջանի բնակչության 90%ը ծպտյալ հայեր են:

Պոլսո հայոց պատրարքին լրագրողը հարցազրույցում պատմել է, որ իր ընտանիքը նույնպես ժամանակին բռնի մահմեդականացվել է: «Ես 1954թ. եմ ծնվել , 4-5 տարեկան եմ եղել, քույրս մահմեդականցվել է», -ասել է նա:

Ըստ Աթեշյանի`ծպտյալները հիմնականում ոչ մզկիթ են գնում, ոչ եկեղեցի, սակայն ամուսնանալիս ճշտում են, ով է արմատներով հայ, նրա հետ են ամուսնանում: Լրագրողի այն հարցին, թե ծպտյալները երբ են իրենց երեխաներին ասում իրենց ինքնության մասին, Աթեշյանը պատասխանել է. «Վերջին շունչը քաշելուց առաջ: Տատիկներն ու պապիկները իրենց կյանքի վերջին օրերին են միայն թոռներին պատմում իրենց ինքնության մասին»:

Եվ վերջում խոսելով հայ-թուրքական հարբերությունների մասին` Աթեշյանն ասել է, որ Թուրքիայի հայերը Հայաստանը դիտում են, որպես հայրենիք, իսկ Թուրքիային` մայրենիքը : «Մենք Թուրքիայի հայերս` մոր ու հոր միջև ծագած վեճի զոհն ենք: Նրանք կռվում են, մենք` լացում: Մենք անհամբերությամբ սպասում ենք, թե երբ են նրանք հաշտվելու»,- ասել է Աթեշյանը: