«Գլխիդ գործ ենք սարքելու». Գյումրիի ոստիկանությունում սպառնացել են կին փաստաբանին
Գյումրիի կրակոցների գործի շրջանակներում Շիրակի մարզում աշխատող Հայաստանի Փաստաբանների պալատի անդամ Թամարա Յայլոյանին ոստիկանության Գյումրիի բաժանմունքում սպառնացել են ու խոչընդոտել նրա մասնագիտական գործունեությանը: Թամարա Յայլոյանը կրակոցների օրը` ապրիլի 23-ին, եղել է Վարդան Ղուկասյանի եղբոր որդու` Կոլյա Ղուկասյանի փաստաբանը, որը եղել է վկայի կարգավիճակում:
«Այդ օրը ես և իմ պաշտպանյալը հարցաքննությունից ու մյուս գործողություններից հետո պատրաստվում էինք դուրս գալ բաժանմունքից, բայց ոստիկաններն ասացին, որ Կոլյա Ղուկասյանի հետ օպերատիվ աշխատանք ունեն, և ես էլ փորձեցի գնալ ու Շիրակի մարզի ոստիկանապետ Կարեն Բաբակեխյանից ճշտելու, թե ինչ օպերատիվ աշխատանքների մասին է խոսքը: Պետը ինձ իհարկե, չընդունեց: Հետո ես վերադարձա Կոլյա Ղուկասյանի մոտ, բայց նրան չգտա: Ոստիկաններից մեկը եկավ և քաշելով տարավ ինձ պետի ընդունարան ու ես սկսեցի բարկանալ, թե ինչու են ինձ քաշքշում: Դուրս եկա այդտեղից ու գնացի Կոլյա Ղուկասյանին գտնելու, բայց ինձ թույլ չտվեցին տեսնել նրան ու աշխատակիցներից մեկը սկսեց գոռալ վրաս` գլխիդ գործ ենք սարքելու, հերիք է այդ գործերով մասնակցես, շատ վատ վերջ ես ունենալու և այլն: Ու հետո ձեռքիցս քաշելով հանեցին ոստիկանությունից դուրս»,- Panorama.am-ի թղթակցի հետ զրույցում կատարվածը ներկայացրեց փաստաբան Թամարա Յայլոյանը:
Նա հրաժարվեց իրեն վիրավորած, իր հասցեին սպառնալիք հնչեցրած ու իր նկատմամբ ուժ կիրառած ոստիկանության ծառայողի անունն ասել, բայց նշեց, որ նա ոստիկանության բարձրաստիճան պաշտոնյա է եղել: Ապրիլի 29-ին փաստաբանը Փաստաբանների պալատի նախագահ Ռուբեն Սահակյանին կատարվածի վերաբերյալ նամակ է գրել, խնդրելով, որ ընթացք տրվի դեպքի վերաբերյալ իր հայտարարությանը:
«Ես ակնկալում եմ, որ բացատրեն ոստիկանությանը, որպեսզի նրանք չխոչընդոտեն իմ աշխատանքը: Իմ նպատակը չէ, որ որևիցե մեկին քրեական պատասխանատվության կանչեն այլ նպատակս այն է, որ վերջ տան նման ավանդույթներին: Ես ցանկանում եմ ինձ ապահովագրել` բա որ իրենց սպառնալիքներն ի կատար ածե՞ն», -հավելեց փաստաբանը` նկատելով, որ իր նկատմամբ ոստիկանության ծառայողների կողմից իր մասնագիտական գործունեության խոչընդոտման առաջին դեպքը չէ:
Փաստաբանն ասաց, որ ոստիկանությունում սովորել են, որ փաստաբանները ենթարկվեն իրենց, այլ ոչ թե պաշտպանեն իրենց պաշտպանյալի շահերը: «Ես փորձել եմ հասկանալ, թե այդ որ օրենքի համաձայն իրենք վկայի հետ օպերատիվ աշխատանք են կատարում: Նրանք երևի ուզում էին, որ ես լինեմ սովորական փաստաբան, որն իրենց հետ համագործակցի: Բայց ես այնտեղ գնացել եմ անձի շահերը ներկայացնելու, այլ ոչ թե ոստիկանության», -նկատեց փաստաբանը:
Տիկին Յայլոյանի հետ կատարվածը փաստաբանների շրջանում մտահոգությունների տեղիք է տվել: Panorama.am-ի թղթակցի հետ զրույցում Փաստաբանների պալատի փոխնախագահ Արա Զոհրաբյանը տեղեկացրեց, որ հնարավոր է իրենք ուրբաթ գնան Գյումրի և իրենց զորակցությունը հայտնեն փաստաբան Յայլոյանին:
Զոհրաբյանի փոխանցմամբ, ՓՊ նախագահ Ռուբեն Սահակյանը տեղյակ է կատարվածի մասին և պատրաստվում է ոստիկանապետին գրություն է ուղարկել: Ոստիկանապետին ուղղվելիք գրության բովանդակության մասին Արա Զոհրաբյանը դժավարացավ որևէ բան ասել: «Հավաբանար կպահանջվի մեղավորներին պատասխանատվության ենթարկել», -նկատեց փաստաբանը` դատապարտելով ոստիկանության ծառայողների կողմից փաստաբան Յայլոյանի լիազորություններին խոչընդոտելը: «Ընդհանրապես, փաստաբանի լիազորություններին չի կարելի խոչընդոտել: Թամարա Յայլոյանին անձամբ եմ ճանաչում, և բոլորս գիտենք նրա համեստությունը ու նրա խոսքերին հավատում եմ», -հավելեց Արա Զոհրաբյանը:
Լրահոս
Տեսանյութեր
ՈՒՂԻՂ. Մեկնարկեց ՍԴ նիստը, օրակարգում երկու միջազգային համաձայնագրի սահմանադրականության հարցերն են
