Ձեր վստահելի աղբյուրը

Հայաստանում, Վրաստանում, Ադրբեջանում, ինչպես նաև Ալբանիայում և մասամբ նաև Կոսովոյում սեռով պայմանավորված աբորտները` ընտանիքում տղա երեխայի գերապատվությունը ահագնացող միտում ունի: Ավելին` այս երկրները ուղղակիորեն կանգնած են ժողովրդագրական աղետի առջև: Այս մասին «Նորածինների սեռերի անհամամասնությունը Հայաստանում. ժողովրդագրական տվյալներ և վերլուծություն» ուսումնասիրության արդյունքների շնորհանդեսի մեկնարկին լրագրողների հետ ճեպազրույցում հայտարարեց ՄԱԿ-ի Բնակչության հիմնադրամի հայաստանյան գրասենյակի գործադիր ներկայացուցիչ Գարիկ Հայրապետյանը:

Ինչ վերաբերում է մեր հարևան Թուրքիային, ապա այս երկրում ծնելիությունը բավականին բարձր ցուցանիշի վրա է գտնվում ու թեև այսօրվա դրությամբ անհանգստացնող միտում չկա, բայց ժամանակի ընթացքում հնարավոր է, որ խնդրին առնչվեն նաև այս պետությունում:

«Մեր հասարակության մեջ կնոջ դերը շատ ավելի նվազ է, քան տղամարդու դերը: Մեր հետազոտությունները ցույց են տալիս, որ ծնողները իրենց հույսը ավելի շատ կապում են տղա երեխայի հետ` այն մտայնությամբ, որ տղան հետագայում նրանց կպահի: Բայց եթե մենք շարունակենք այդ կերպ մտածել և արմատախիլ չանենք հասարակության մեջ այդ մոտեցումը, ինչպես նաև փոփոխություններ չլինեն գենդերային հավասարության ոլորտում, օրինակ` ինչո՞ւ կինը պետք է նույն պաշտոնը զբաղեցնելիս 20-25 տոկոսով պակաս աշխատավարձ ստանա և այլն, ապա իրավիճակը կմնա նույնը ու մեր երկիրը տասնամյակ հետո լուրջ աղետի առջև կկանգնի»,- ասաց Գ.Հայրապետյանը:

Նրա խոսքով, կառավարությունը որոշակի քայլեր այս ուղղությամբ արդեն ձեռնարկել է, մասնավորապես` վերջին երկու-երեք տարիներին Հայաստանում առաջին անգամ ընդունվել է գենդերային հավասարության ռազմավարության մասին գործողությունների ծրագիրը, ինչպես նաև Ազգային Ժողովն առաջիկայում երկրորդ ընթերցմամբ կքննարկի «Կանանց և տղամարդկանց հավասար իրավունքների և հավասարությունների մասին» օրենքի նախագիծը.

«Ինչ-որ քայլեր արվում են և կարծում եմ, որ բոլորն արդեն ակնհայտ խնդիրը տեսնում են ու նաև տեսնում են ինչ-որ բան անելու անհրաժեշտություն»,- նշեց Գ.Հայրապետյանը:

Նշենք, որ ուսումնասիրությունն իրականացվել է ՄԱԿ-ի Բնակչության հիմնադրամի պատվերով` Փարիզի Բնակչության և զարգացման կենտրոնի Զարգացման հետազոտական ինստիտուտը ներկայացնող դոկտոր Քրիստոֆ Գիլմոտոյի կողմից, ով հղիության սեռով պայմանավորված արհեստական ընդհատումների հիմնախնդրով զբաղվող խոշորագույն գիտնականներից մեկն է աշխարհում: Անցկացվել է 2012-2013 թթ-ին: