Ձեր վստահելի աղբյուրը

 Երևանի ավագանու ընտրությունները ցույց տվեցին քաղաքական դաշտում առկա ուժերի իրական կշիռը: Պատասխանելով Panorama.am-ի այն հարցին, թե ինչպե՞ս կմեկնաբանեք ընտրությունների արդյունքները, այս մասին նշեց քաղաքագետ Ալեքսանդր Մարկարովը:

«Գնահատելով ընտրությունների արդյունքները մենք պետք է ուշադրություն դարձնենք մի քանի ասպեկտների վրա: Առաջին նկատառումը, իմ կարծիքով, այն էր, թե ի՞նչ ցուցանիշով ՀՀԿ-ն կկարողանար հաղթանակ տանել: Արդյունքում գրանցվեց ոչ թե մինիմալ 40 տոկոս, այլ Երևան քաղաքի մասշտաբով ձայների մեծամասնություն: Երկրորդ նկատառում այն էր, թե այսօր ստեղծված իրավիճակում ո՞ր ուժը կարող է հավակնել հանդես գալ որպես իր նշանակությանբ երկրորդ քաղաքական ուժ: Այս հարցը ևս, առնվազն քաղաքի մասշտաբով, ստացել է իր պատասխանը»,- նշեց Ա. Մարկարովը:

Քաղաքագետի կարծիքով, ԲՀԿ-ն կարողացավ ցույց տալ, որ չնայած նրան, որ չի մասնակցել նախագահական ընտրություններին, այնուամենայնիվ ի զորու է հանդես գալ որպես երկրորդ քաղաքական ուժ:

«Երրորդն նկատառում այն էր, թե ո՞ր քաղաքական ուժ էր հանդես գալիս որպես հիմնական ընդդիմադիր ուժ և ինչպիսի՞ն է այդ ուժի քաղաքական կշիռը: Ընտրությունների արդյունքները ցույց տվեցին, որ ներկա պահի դրությամբ այս ուժի դերում հանդես է գալիս «Ժառանգություն» կուսակցությունը` «Բարև Երևան» դաշինքի տեսքով: Ինչ վերաբերում է այս քաղաքական ուժի կշռին, ապա ընտրությունների արդյունքները պարզորոշ ցույց տվեցին, որ այս քաղաքական ուժի իրական ընտրազանգվածը տատանվում է 8 տոկոսի շրջանակներում: Ընտրություններին այլ ուժերի մասնակցության դեպքում, այս քաղաքական ուժը չի ստանում լրացուցիչ ձայներ, ինչ և մատնանշում է իր ընտրազանգվածի իրական քանակությունը: Պետք է արձանագրենք նաև, որ նախագահական ընտրություններին չմասնակցելու փաստը, բացասական անդրադարձավ նաև ՀԱԿ-ի և ՀՅԴ-ի վարկանիշի վրա: Իմ կարծիքով հենց դա է հիմնական պատճառը, որը այս քաղաքական ուժերը չկարողացան գոնե կրկնել նախորդ խորհրդարանական ընտրությունների իրենց արդյունքները»,- ասաց Ա. Մարկարովը:

Ինչ վերաբերում է ՕԵԿ-ին, ապա ըստ քաղաքագետի, այս ուժի ոչ բավարար արդյունքների հիմնական պատճառը ընդդիմադիր դաշտից իշխանական դաշտ անցումն էր:

«Այն քաղաքացիները, որոնք նախընտրում էին իրենց ձայները տալ իշխանությանը, որպես առաջին նախընտրություն տեսնում էին ՀՀԿ-ին, ինչի արդյունքում ՕԵԿ-ը գրանցեց իր իրական ընտրազագվածին համապատասխան արդյունք»,- նշեց Ա. Մարկարովը:

Իր հերթին «Առաքելություն» կուսակցության գրանցած արդյունքները, ըստ բանախոսի, նույնպես բավականին սպասելի էին:

«Ցանկացած ընտրությունների ժամանակ կան փոքր, լուրջ քաղաքական նշանակություն չունեցող ուժեր, որոնց ծրագիրը և գաղափարները որևէ արձագանք չեն գտնում էլեկտորատի մոտ»,- նշեց Ա. Մարկարովը:

Հիշեցնենք, որ նախօրեին կայացած Երևանի ավագանում ընտրությունների նախնական արդյունքներով առաջատարը Հայաստանի Հանրապետական կուսակցությունն է, որը ստացել է 235512 ձայն կամ բոլոր ձայների 55.89%-ը: Երկրորդը «Բարգավաճ Հայաստան» կուսակցությունն է, որին ձայն են տվել 97189 ընտրողներ կամ կամ 23.07%-ը: Նվազագույն շեմը հաղթահարել է նաև «Բարև Երևան» դաշինքը՝ 35732 ձայնով, ինչը հավասար է ընտրողների ձայների 8.48%-ին: Մյուսների մոտ պատկերը հետևյալն է. «Հայ ազգային կոնգրես» կուսակցություն՝ 18499 ձայն կամ 4.39%-ը, Հայ Յեղափոխական Դաշնակցություն կուսակցություն՝ 15999 կամ 3.80 %, «Օրինաց երկիր» կուսակցություն՝ 15733 ձայն կամ 3.73 %, «Առաքելություն» կուսակցություն՝ 2692 ձայն կամ 0.64%: