Ձեր վստահելի աղբյուրը

Մայիսյան հաղթանակների կապակցությամբ արդեն 5-րդ տարին զոհված ազատամարտիկների ընտանիքների անդամների համար «Երևան» բժշկական կենտրոնում կազմակերպվում է բարեգործական ակցիա: Հետազոտություններ, տարատեսակ բուժումներ, վիրահատություններ, լաբորատոր, գործիքային զննություններ. այս ամենն Արցախյան ազատամարտում զոհված ազատամարտիկների ընտանիքների անդամներին տրամադրվում է անվճար:

 Ինչպես Panorama.am-ի թղթակցի հետ զրույցում նշեց «Երևան» բժշկական կենտրոնի տնօրեն, վիրաբույժ Տարոն Տոնոյանը, ՀՀ կառավարության որոշման համաձայն` զոհված ազատամարտիկների ընտանիքի անդամներն իրավունք ունեն բուժօգնություն ստանալ պետական պատվերով, այնուամենայնիվ իրենց կենտրոնի բարեգործական ակցիային ամեն տարի դիմել և շարունակում են դիմել մեծ թվով նման ընտանիքներ: «Թեև օրենքով զոհված ազատամարտիկների ընտանիքի անդամները պետք է պետպատվերով բուժօգնություն ստանան, սակայն չգիտես ինչու զոհվածի ընտանիքի անդամ չի համարվում նրա ամուսնացած աղջիկը: Իսկ մենք չենք առաջնորդվում այդ կանոններով: Մենք սպասարկում ենք բոլորին` զոհվածի թե կնոջը, թե երեխաներին, թե ծնողներին, թե նրա հարազատներին, նույնիսկ դեպքեր ենք ունեցել, որ նրանց հարևաներին ենք օգնել, քանի որ այդ մարդիկ միշտ եղել են այդ ընտանիքների կողքին»,- ասաց Տ.Տոնոյանը:

Նրա խոսքերով` բուժման կարիք ունեցողները ապրիլին հերթագրվում են, իսկ մայիսին արդեն նրանց տրամադրվում է համապատասխան բուժօգնություն: Տ.Տոնոյանը նշեց, որ ամեն տարի բուժօգնություն են ստանում զոհված ազատամարտիկների ընտանիքների 500-600 անդամներ: Նա նշեց, որ մայիսի 6-ի դրությամբ կա արդեն հերթագրված 520 անձ, սակայն հերթագրումը շարունակվում է, իսկ բուժօգնությունը կտրամադրվի այնքան ժամանակ, միչև որ սպասարկվեն բոլոր հերթագրվածները: Գլխավոր բժիշկը վստահեցնում է, որ բաց դռների միամսյակի ընթացքում զոհված ազատամարտիկների ընտանիքների համար կիրականացվի ցանկացած վիրահատություն, հիվանդանոցն ունի այդ հնարավորությունը:

Տարոն Տոնոյանը տեղեկացրեց, որ դեղորայքի և բուժպարագաների ծախսը 2009թ-ին ֆինանսավորել է Շենգավիթ թաղապետարանը, երեք տարի ֆինանսավորել է Հայ Յեղափոխական Դաշնակցություն կուսակցությունը, իսկ այս տարի, ըստ նրա, ֆինանսավորել է մի մարդ, ով խնդրել է չհրապարակել իր անունը:

Ըստ նրա` ակցիան քաղաքական բնույթ չի կրում, անձնագիր չեն հավաքում, միակ նպատակը բարեգործությունն է: «Զոհված ազատամարտիկների ընտանիքները չեն կարող երբեք շահարկման թեմա դառնալ: Հայրենիքի համար իրենց կյանքը զոհաբերած մարդկանց ընտանիքների համար ինչ-որ բան անել և նրանցից մի բան պահանջելն անբարոյականություն է: Այդ ընտանիքները պետք է մեր հասարակությունում կարևոր նշանակություն ունենան, նրանք պետք է ամենահպարտ մարդիկ լինեն և չպետք է որևէ մեկի առջև խեղճանան»,- ասաց բժիշկը:

Տարոն Տոնոյանն, ով ևս Արցախյան ազատամարտի մասնակից է, նշում է, որ իրենց ակցիան գալիս է ապացուցելու` միայն խոսքերով չէ, որ հիշում են զոհված ազատամարտիկներին: «Կենտրոնում աշխատում են Արցախյան պատերազմին մասնակցած բժիշկներ և ոչ միայն նրանք, այլ ամբողջ աշխատակազմը բավականին ոգևորված, պարտքի զգացումով և պատասխանատվությամբ է կատարում իր աշխատանքը: Աշխատակազմը անհամբեր սպասում է, թե երբ է գալու մայիս ամիսը, քանի որ նրանք ստանում են մեծ բավականություն և ուրախ են, որ կարողանում են օգտակար լինել զոհված ազատամարտիկների ընտանիքներին»,- ասաց Տարոն Տոնոյանը:

Հարցին, թե հնարավո՞ր է, որ հետագայում անվճար բուժօգնություն ստանան նաև ազատամարտիկները , կենտրոնի տնօրենը նշեց, որ մայիսին ազատամարտիկներին ևս բուժօգնություն տրամադրում են, թեև նրանք իրավունք ունեն բոլոր հիվանդանոցներում էլ բուժօգնություն ստանալ: «Բայց սա մտածելու տեղիք է տալիս, թե ինչո՞ւ չեն օգտվում իրենց իրավունքներից և սպասում են` մայիսը գա և նոր դիմեն մեզ: Կամ մեզ շատ են վստահում, կամ` այլ տեղերում նույն ուշադրությանն ու վերաբերմունքին չեն արժանանում»,- նկատեց նա:

Նշենք նաև, որ հիվանդանոցում ներկայումս ընթանում են վերանորոգման աշխատանքներ, հիվանդանոցը վերազինվում է նաև ժամանակակից բժշկական սարքավորումներով: «Նոր ծրագրեր ունենք և կարծում եմ, որ դրանք շուտով կյանքի կկոչենք»,- ասաց Տարոն Տոնոյանը:

Կենտրոնի տնօրենի խոսքերով, իր համար կարևորը՝ կենտրոնում առողջ մթնոլորտ և աշխատանքային մշտական առաջընթաց լինի, փոխադարձ հարգանքի վրա հիմնված միասնական թիմ ձևավորվի։ Նա գտնում է, որ «մեկը բոլորի համար, բոլորը մեկի համար» կարգախոսը առաջին հերթին պետք է օգտագործվի բժշկության մեջ:

Այդուհանդերձ, Տ.Տոնոյանը նշում է, որ որքան էլ վերաբերմունքը լավ լինի, որքան էլ մատուցվող ծառայությունները մատչելի լինեն, սակայն, եթե բուժսպասարկումը որակյալ չլինի, ապա այդ բոլորը դառնում է «օճառի փուչիկ»: «Փորձում եմ անել ամեն ինչ, որպեսզի հիվանդներին որակյալ բուժսպասարկում տրամադրենք: Ես շեշտը դնում եմ լավ կադրերի վրա, և փորձում եմ նրանց համար բոլոր պայմանները ստեղծել, որպեսզի նրանք տեղից տեղ չգնան, սիրեն հիվանդանոցը իրենց տան նման և խղճները հանգիստ աշխատեն: Իհարկե այս ամենի հետ մեկտեղ կարևոր է նաև վարձրատրությունը, ինչը փորձում ենք ապահովել»,- նշեց Տարոն Տոնոյանը: